استانا اكىمى جەڭىس قاسىمبەك قۇرىلىسى ۇزاققا سوزىلعان نىسانداردى ارالادى. 9 تۇرعىن ءۇيدىڭ ۇلەسكەرلەرىمەن كەزدەسكەن قالا باسشىسى قۇرىلىستى اياقتاۋ بويىنشا اۋقىمدى جۇيەلى جۇمىستار جۇرگىزىلىپ جاتقانىن, ءاربىر ءۇي بويىنشا قادامدىق ءىس-شارالار جوسپارى جاسالعانىن ءمالىم ەتتى.
«قالاداعى قۇرىلىسى ۇزاققا سوزىلعان نىسانداردى ارالاۋدى ءارى قاراي دا جالعاستىرامىز. «قورعالجىن كۆارتالى», «ميرنىي دوم», «ارابي 2 – گرانيتنىي 2», «زەرە-2», «ارىستان», «Future Home», «سادوۆىە كۆارتالى», «تەرريتوريا كومفورتا-1 2-كەزەك» تۇرعىن ءۇي كەشەندەرىنىڭ ۇلەسكەرلەرىمەن كەزدەستىم. ۇلەسكەرلەرمەن بىرگە قۇرىلىس بارىسىن باقىلاۋدا ۇستايمىز. قۇرىلىسى ۇزاققا سوزىلعان عيماراتتاردىڭ جاعدايى ءارتۇرلى. ءبىر جەرىندە ءۇيدىڭ تەك جاقتاۋى عانا بار بولسا, ەندى ءبىر تۇسىندا تەك قازانشۇڭقىرى عانا قازىلعان. ماسەلەن «ارىستان» تۇرعىن ءۇي كەشەنىنىڭ قۇرىلىسى 11 جىل بۇرىن باستالعان. ال نىساندى وتكىزۋ كەزىندە تەك 20-30%-ى عانا دايىن ەدى. «سادوۆىە كۆارتالى» تۇرعىن ءۇي كەشەنى 8 جىل بۇرىن پروبلەمالىق دەپ تانىلسا, نىساندى وتكىزۋ كەزىندە ىرگەتاسى عانا بولاتىن. مىڭداعان ۇلەسكەر وتباسى باسپاناسىن كۇتىپ ءجۇر. مەملەكەت باسشىسىنىڭ تاپسىرماسىنا سايكەس, قۇرىلىسى ۇزاققا سوزىلعان نىسانداردى اياقتاۋ بويىنشا اۋقىمدى, جۇيەلى جۇمىس جۇرگىزىپ جاتىرمىز. ءار ءۇي بويىنشا قادامدىق ءىس-شارالار جوسپارى بار» دەپ جازدى جەڭىس قاسىمبەك الەۋمەتتىك جەلىدەگى پاراقشاسىندا.
اكىم بيىل قۇرىلىسى ۇزاققا سوزىلعان 30 تۇرعىن ءۇي كەشەنىن اياقتاۋ جوسپارلانعانىن جەتكىزدى. «بۇل – شامامەن 4 مىڭ ۇلەسكەر وتباسى. ولاردىڭ ءبىر بولىگىن اياقتادىق. ۇلەسكەرلەر كەزدەسۋلەردە اباتتاندىرۋ, ينجەنەرلىك جەلىلەر سالۋ جانە تاعى باسقا ماسەلەلەردى كوتەرەدى. ءبىز ءوز تاراپىمىزدان مەردىگەرلەرگە بارىنشا كومەك كورسەتەمىز. دەگەنمەن ولاردىڭ ۇلەسكەرلەردى جالعان ۋادەمەن ۇمىتتەندىرۋىنە جول بەرمەيمىز. ءبىزدىڭ مىندەتىمىز – ۇزاققا سوزىلعان قۇرىلىستاردى اياقتاۋ جانە ۇلەسكەرلەرگە پاتەر كىلتىن تاپسىرۋ» دەدى ج.قاسىمبەك.
