ءبىلىم بەرۋدىڭ جاڭا جۇيەسى جىل سايىن ورىن الادى. بيىلعى جاڭالىق نە؟ ءبىلىم جانە عىلىم مينيسترلىگى تاعى نە ويلاپ تاپتى؟ بۇگىنگى اتا-انا تەك وسىعان الاڭدايتىن بولدى. استاناداعى №80 مەكتەپ-گيمنازياسىنىڭ العاشقى قوڭىراۋ سالتاناتىنا قاتىسقان ەلىمىزدىڭ ءبىلىم جانە عىلىم ءمينيسترى ەرلان ساعاديەۆ 1, 2, 5, 7-سىنىپتار بيىل ءبىلىم بەرۋدىڭ جاڭا جۇيەسى – 5 كۇندىك وقۋ بويىنشا باستايتىنىن ايتتى. وسىعان بايلانىستى ساباق ءوتكىزۋ ۋاقىتى 5 مينۋتقا قىسقارتىلىپ, 40 مينۋت بولدى.
جاڭا وقۋ جىلىن تىڭ جاڭالىقتارمەن باستاپ كەپ جىبەرگەن ءمينيستردىڭ بۇل جاڭالىعىنا قالا مەكتەپتەرى دايىن با؟ ەندى بالالار ەپتەپ 5 كۇندىك وقۋ جۇيەسىنە كوشىپ, ساباق ۋاقىتىنىڭ ۇزاقتىعى ءار ءپان ءۇشىن 45 مينۋتتان 40 مينۋتقا ازاياتىن بولدى. بۇل ءبىر جاعىنان وقۋشىلارى ورىن تاپپاي وتىرعان ءۇش اۋىسىمدى مەكتەپتەردەگى جاعدايدىڭ رەتتەلۋىنە وڭ اسەر بەرۋى مۇمكىن.
Aل ءبىر سىنىپتا 35-36 وقۋشىسى وتىرعان مۇعالىمگە وڭاي تيمەسى انىق. ءار بالادان ءۇي تاپسىرماسىن سۇراۋعا كەمىندە 1 مينۋتتى ەسەپتەسە, بۇل ۋاقىت تەك ءۇي تاپسىرماسىن سۇراۋمەن اياقتالاتىنى انىق. «بالام ساباققا ىلعي دا دايىندالىپ بارىپ ءجۇردى. كۇندەلىگىنە قاراسام, ەشقانداي باعا جوق. مۇعالىمىنە حابارلاستىم. سوسىن ول ماعان: «اپاي, ءبارىن دە بىلەمىن, ساباق سۇراپ ۇلگەرمەيمىز. سىنىپتا بالا كوپ. بۇگىن ساباقتان كەيىن الىپ قالىپ, بارلىق باعاسىن قويىپ جىبەرەمىن» دەدى. سول كۇنى بالام بىردەن 6 باعا الىپ كەلدى. مەن سوندا مۇعالىمدى اياپ كەتتىم. ءبىر باسىندا ەكى سىنىبى بار. سول ەكى ورتادا بالالاردى قوسىمشا الىپ قالىپ ساباق سۇراپ وتىر. تاپسىرما قالاي, سونى ورىندايدى عوي ولار. ەندى ول ساباقتىڭ دا 5 مينۋتىن شەگەرىپ تاستاسا, وندا سىنىپتاعى ءبىلىم ساپاسىنا مەن كۇماندانا باستايمىن» دەيدى №8 مەكتەپتە بالالارى ءبىلىم الاتىن اتا-انا ايجان ورالبايقىزى.
بۇعان قوسا, اتا-انالاردى, اسىرەسە, وسىعان بايلانىستى كانيكۋلدار مەرزىمىنىڭ قىسقارۋى مۇمكىن دەگەن وي مازالاپ وتىر. ال مينيسترلىك وقۋ جىلىنىڭ ۇزاقتىعى وزگەرمەي, ۇيرەنشىكتى ءتارتىپتىڭ ساقتالاتىندىعىن ايتۋدا. وقۋ جىلىنىڭ ۇزاقتىعى مەكتەپالدى دايىندىق سىنىپتارىندا – 32 وقۋ اپتاسى, 1-سىنىپتاردا – 33 وقۋ اپتاسى, 2-11-سىنىپتاردا 34 وقۋ اپتاسى دەپ بەلگىلەنگەن. كانيكۋلدار ۇزاقتىعى دا وزگەرمەيدى. 1-11-سىنىپتاردا كۇزگى كانيكۋل – 7 كۇن, قىسقى – 10 كۇن, كوكتەمگى – 13 كۇن. مەكتەپالدى دايارلىق سىنىپتارىندا كۇزگى كانيكۋل – 7 كۇن, قىسقى – 14 كۇن, كوكتەمگى – 15 كۇن, سونداي-اق, بۇلدىرشىندەر ءۇشىن 1-7 اقپان كۇندەرى ارالىعىندا 7 كۇندىك قوسىمشا كانيكۋل بەلگىلەندى. سولاي-اق بولسىن. ەندى وقۋ جۇكتەمەسى شە؟ ول ازايا ما؟ بىلتىر اتا-انالار قاۋىمداستىقتارى مەن ساراپشىلاردىڭ ۇسىنىستارى بويىنشا ءۇي تاپسىرمالارىنىڭ كولەمى ازايتىلعانىن بىلەمىز. مينيسترلىك ءۇي تاپسىرمالارىن ورىنداۋ بويىنشا مەتوديكالىق ۇسىنىمداردى بەكىتكەن بولاتىن. ءۇي تاپسىرمالارىن ورىنداۋعا جۇمسالاتىن ۋاقىت بۇرىنعى جاعدايمەن سالىستىرعاندا ۇشتەن ءبىر بولىككە قىسقارۋى كەرەك.
ەندى وسى 40 مينۋتتىق ساباق كەستەسىندە كۇنىنە 30 مينۋت ۋاقىت «بوسايدى». سوندىقتان قوسىمشا ساباق قوسىلعان جاعدايدىڭ وزىندە وقۋشىلار مەكتەپتە ادەتتەگىدەن تەك 10 مينۋت ارتىق وتكىزىپ, جۇكتەمەسى ايتارلىقتاي وزگەرمەيدى.
P.S:
جاڭا وقۋ جىلىن تىڭ جاڭالىقتارمەن باستاپ كەپ جىبەرگەن ەرلان ساعاديەۆ: «بيىلعى وقۋ جىلىندا ۇلكەن وزگەرىستەر بولۋدا. جۇمىستارىمىز قيىن ەمەس. مۇعالىمدەر دە دايىن. وقۋلىقتار دا جەتكىلىكتى» دەدى. ءمينيستردىڭ بۇل ءسوزى ءجون, دەسەك تە ارتىق وقۋشىعا ورىن تاپپاي سارسىلعان مەكتەپ پەن 0-ءىنشى سىنىپتىڭ اشىلۋىن كۇتكەن اتا-انانىڭ قاراسى كوبەيىپ كەتتى. ەندى وعان ساباقتى 40 مينۋتقا ازايتىپ, 5 كۇندىك وقۋ جۇيەسىنە كوشۋدى قوسساق, ونسىز دا قاربالاسىپ جۇرەتىن ۇستازدار جاۋاپكەرشىلىگى كوبەيە تۇسكەنى اقيقات.
گۇلجان راحمان
