ەكى ايدان اسا ۋاقىت ەلوردادا وتكەن اۋىل شارۋاشىلىعى جارمەڭكەلەرىندە تاۋار وندىرۋشىلەر 5 مىڭ تونناعا جۋىق ءونىم اكەلدى. بۇل تۋرالى قالا باسشىسى التاي كولگىنوۆ ءمالىم ەتتى.
«وتكەن دەمالىس كۇندەرى اۋىل شارۋاشىلىعى جارمەڭكەسىندە اقمولا وبلىسىنىڭ ونىمدەرى ۇسىنىلدى. ەلوردادا جارمەڭكەلەر 21 تامىزدا باستالدى. بۇگىنگە دەيىن ەلىمىزدىڭ بارلىق وبلىسىنان كەلگەن تاۋار وندىرۋشىلەر قاتىستى. جالپى العاندا, تاۋار وندىرۋشىلەر مەن كوتەرمە ساۋداگەرلەر ەلورداعا 5 مىڭ تونناعا جۋىق ءونىم اكەلدى. مۇنداي جارمەڭكەلەر ءونىمدى نارىقتىق باعادان ارزان ساتۋعا مۇمكىندىك بەرەدى. ۇسىنىلعان تاۋارلاردىڭ ءبارى سەرتيفيكاتتالعان جانە ۆەتەرينارلىق باقىلاۋدان وتكەن. ەپيدەميولوگيالىق احۋالدى ەسكەرە وتىرىپ, سانيتارلىق نورمالار ساقتالدى» دەدى اكىم.
«اۋىل شارۋاشىلىعى جارمەڭكەلەرىنە قاتىسقان وڭىرلەردىڭ تاۋار وندىرۋشىلەرىنە جانە ارىپتەستەرىمە العىس ايتامىن! مۇنداي جارمەڭكەلەردى, ونىڭ ىشىندە ءوز تاۋار وندىرۋشىلەرىمىزدىڭ قاتىسۋىمەن وتكىزۋدى جالعاستىرامىز. سونداي-اق الەۋمەتتىك ماڭىزى بار ازىق-تۇلىك تاۋارلارىنىڭ باعالارىن ۇستاپ تۇرۋ ءۇشىن بىرقاتار شارالار قابىلداندى. اتاپ ايتساق: «اينالىم تەتىگى» جوباسىن جالعاستىرامىز, جوبا بويىنشا قاتىسۋشىلاردىڭ سانىن ۇلعايتتىق, ساۋدا جەلىلەرىنە الەۋمەتتىك ماڭىزى بار ازىق-تۇلىك ساتىپ الۋعا بولىنەتىن سومانى ۇلعايتتىق. سونداي-اق ەت, كوكونىس, ءسۇت ونىمدەرى, ءىرى نان ءپىسىرۋ كاسىپورىندارىمەن, بىرقاتار وندىرۋشىلەرمەن جانە جەتكىزۋشىلەرمەن شارت جاساستىق» دەپ جالعاستىردى ا.كولگىنوۆ.
اكىم جەكە ينۆەستيتسيالار ەسەبىنەن قالادا ازىق-تۇلىك قاۋىپسىزدىگىن قامتاماسىز ەتۋگە, نارىقتى جەرگىلىكتى تاۋارلارمەن قامتاماسىز ەتۋگە مۇمكىندىك بەرەتىن بىرقاتار نىسانداردىڭ قۇرىلىسى جۇرگىزىلىپ جاتقانىن جەتكىزدى. ياعني الداعى ۋاقىتتا باس قالادا 3 كوتەرمە-تاراتۋ ورتالىعى, 2 جىلىجاي كەشەنى, نان-توقاش كومبيناتى سالىنادى. سونىمەن قاتار ينۆەستيتسيالىق كەڭەستە وندىرىستىك-ازىق-تۇلىك كەشەنىنىڭ قۇرىلىسى ماقۇلداندى. ازىق-تۇلىك كەشەنىندە نان-توقاش كومبيناتى, ءسۇت وڭدەۋ زاۋىتى, كوكونىس قويماسى بولادى.
