وتكەن سەنبى كۇنى «استانا» كونتسەرت زالىندا اۋەسقوي كومپوزيتور التىنباي سەيىتقاسىمنىڭ «تۋعان اۋىل وتتارى» اتتى كونتسەرتى ءوتتى.
«ەل ءىشى – التىن بەسىك» دەپ اتالارىمىز تەگىن ايتپاعان. التىنباي اعامىز ءومىر بويى ەلدە تۇردى. ەشقانداي مۋزىكالىق ءبىلىمى جوق بولسا دا, تابيعاتتان دارىعان تالانتى بار. سونىڭ ارقاسىندا جۇرتقا تانىلدى. ەلدىڭ قۇرمەتىنە بولەندى. ول كىسىنىڭ ءوزى وتە قاراپايىم. بىلايعى ادام ونى سازگەر دەپ ايتپايدى. ەشقانداي دابىراسى جوق, ءۇن-ءتۇنسىز جۇرەدى. ال ونىڭ اندەرىن تىڭداساڭىز, «راس, ونى وسى ادام جازعان با؟» دەپ تاڭعالاسىز. ادامدى نازىك سەزىمگە بولەيتىن شوقتىعى بيىك شىعارمالاردىڭ اۆتورى. بۇگىندە اعامىز باس قالادا تۇرادى.
كونتسەرتتە كومپوزيتوردىڭ كوپشىلىك جاقسى بىلەتىن «كىنالاما», «بالا كەزىم», «جىلاۋىق قىز», «باس ساۋساق» جانە تاعى باسقا اندەرىن لۇقپان جولداسوۆ, دوسىمجان تاڭاتاروۆ, نۇربولات ارزاماسۇلى, مەدەت شايكەلوۆ, شاحاريزات سەيداحمەت, جاسۇلان قازىمبەكوۆ سەكىلدى رەسپۋبليكاعا تانىمال انشىلەر تامىلجىتا شىرقاپ, جينالعانداردىڭ قۇرىشىن قاندىردى. قازاقستاننىڭ حالىق اقىنى قونىسباي ءابىل جەرلەس ىنىسىنە ىزگى تىلەگىن ءبىلدىرىپ, ءوزىنىڭ ءبىر-ەكى تۋىندىسىن ورىنداپ بەردى. قوستانايدان ادەيى كەلگەن بەلگىلى كومپوزيتور ءارى ءانشى قاليبەك دەرىپسالدين كەش يەسىنىڭ بەدەلىن كوتەرىپ, كوڭىلدى اندەرىن قۇيقىلجىتتى. «قورقىت» ءداستۇرلى ساز توبى كەشتىڭ ءسانىن كىرگىزدى.
شارا شىمىلدىعى اۆتوردىڭ تۋعان ەلى ءسۇيىپ ايتاتىن «اينالايىن تورعايىم» انىمەن جابىلدى.
ازامات ەسەنجول
