ەلىمىزدە شاعىن جانە ورتا بيزنەستى قولداۋعا باعىتتالعان «بيزنەستىڭ جول كارتاسى» باعدارلاماسى مىڭداعان كاسىپتىڭ قالىپتاسۋىنا مۇمكىندىك بەردى. بيىل باس قالادا 57 بيزنەس-جوبا قارجىلاندىرىلىپ, ىسكە اسقان.
وتاندىق ونەركاسىپتىڭ دامۋىنا ۇلەس قوسىپ, بيزنەستەن بەرەكە تاپقانداردىڭ ءبىرى – ءاليا توقتاناەۆا. كاسىپكەر انا «بيزنەستىڭ جول كارتاسى – 2025» باعدارلاماسىنا ءوز بيزنەس جوباسىن ۇسىنىپ, قارجىلاي قولداۋعا يە بولعان. بۇگىندە بالالاردىڭ ەستە ساقتاۋ قابىلەتىن ارتتىرۋعا ارنالعان ويىنشىقتار ءوندىرۋدى قولعا الىپتى. «قىزىمىز مازاسىز بولدى. زەيىنى مەن ەستە ساقتاۋ قابىلەتىن جاقسارتاتىن ويىنشىقتار ىزدەدىك. مۇنداي ونىمدەردى ەلوردادان تابۋ قيىن. نارىقتى يمپورتتىق ونىمدەر جاۋلاعان. سوندىقتان ساپاسى جاعىنان شەتەلدىك ويىنشىقتاردان كەم تۇسپەيتىن ويىنشىقتار شىعارۋدى ماقسات ەتتىك. ءبىز شەتەلدىك نارىقتى زەرتتەدىك. قازىر جارتىشار ارالىق تاقتالار, بالانسيرلەر, بوديبوردتار, تانگرامدار, تەكشەلەر, سلايدتار, كولدەنەڭ سىرىقتار, اتكەنشەكتەر جانە باسقا زاتتار بار. ولاردىڭ ەرەكشەلىگى بالانىڭ زەيىنىن اشىپ, كريتيكالىق ويلاۋ قابىلەتىن نىعايتۋعا كومەكتەسەدى. ويىنشىقتارىمىز ءبىر جاستان 15 جاسقا دەيىنگى بالالارعا ارنالعان ءارى ەرەكشە قاجەتتىلىگى بار بالالارعا دا ءتيىمدى. ءبىز اعاش شەبەرحاناسىن اشتىق ءارى قاجەتتى قۇرال-جابدىقتارعا دا تاپسىرىس بەردىك. قازىر ءوندىرىستى ىسكە قوسۋ ءۇشىن دايىندىق جۇمىستارى جۇرگىزىلۋدە. اقپان ايىنان باستاپ, تولىعىمەن ىسكە كىرىسەمىز» دەيدى «GA وiynshyqtar fabrikasy»-نىڭ جەتەكشىسى.
«بيزنەستىڭ جول كارتاسى» جوباسىنىڭ تاعى ءبىر قاتىسۋشىسى, ADAMI زەرگەرلىك شەبەرحاناسىنىڭ نەگىزىن قالاۋشى داميرا ابيكەنوۆا زەرگەرلىك بۇيىمدار جاساۋمەن اينالىسادى. ول جوبادان جەڭگەن قاراجاتقا كۇمىستەن جاسالعان بۇيىمدارعا التىن جالاتۋعا قاجەتتى تەحنيكانى ساتىپ الىپ, شەبەرحاناسىن كەڭەيتىپتى.
«تابيعي تاستارمەن كۇمىس زەرگەرلىك بۇيىمدار شىعارامىز. بۇل باعىتتا ءتورت جىلعا جۋىق ىزدەندىم. جان-جاقتى زەرتتەدىم. ءوزىم بۇيىمدار جاساي باستادىم. ۋاقىت وتە كەلە ءوز كاسىبىمدى اشقىم كەلدى. ناتيجەسىندە باعدارلاماعا قاتىسىپ, بيىل ارمانىمدى ورىندادىم. زەرگەرلىك بۇيىمدار جاساۋ اسقان شەبەرلىكپەن قاتار ءتۇرلى تەحنيكانى, قۇرال-جابدىقتاردى قاجەت ەتەدى. ولاردىڭ باعاسى دا قىمبات. ال كاسىبىن ەندى باستاعاندار ءۇشىن ونداي شىعىنداردى كوتەرۋ قيىن. سوندىقتان بايقاۋعا قاتىستىم, بۇل مۇمكىندىك مەن ءۇشىن ۇلكەن قولداۋ بولدى» دەيدى داميرا ابيكەنوۆا.
«بيزنەستىڭ جول كارتاسى» باعدارلاماسىنا كاسىپكەرلەرمەن قاتار ءوز بيزنەسىن اشقىسى كەلەتىن كوپبالالى, جالعىزباستى انالار, مۇمكىندىگى شەكتەۋلى جاندار مەن 50 جاستان اسقان ازاماتتار دا قاتىسا الادى.
