ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى XXVII
ماۋسىم شىمىلدىعىن وسى ماۋسىمنىڭ العاشقى پرەمەراسى – «ءشامشى» ەلەگياسىمەن جاپتى.
جالپى, بۇل ماۋسىمدا قاللەكيلىكتەر س.تۇرعىنبەكۇلىنىڭ اتالمىش تۋىندىسىمەن قاتار ا.سالباننىڭ «ويىنشىقتار ويانعاندا» ەرتەگىسىنىڭ, ۋ.شەكسپيردىڭ «وتەللو» تراگەدياسىنىڭ, ك.كيزيدىڭ «7+1» دراماسىنىڭ تۇساۋكەسەرىن وتكىزدى. اقتاۋ, اقتوبە قالالارىنا گاسترولدەرمەن بارىپ قايتتى.
تەاتر ماۋسىمى اياقتالعانىمەن, شىعارماشىلىق ۇجىم استانانىڭ 20 جىلدىعىنا ارنالعان استانا قالاسىنىڭ ايماقتارداعى مادەني كۇندەرى اياسىندا گاسترولدىك ساپارىن جالعاستىرادى. اتاپ ايتساق, 18 شىلدە كۇنى سەمەي قالاسىنىڭ تۇرعىندارى نازارىنا «زەرە» پوەتيكالىق دراماسى (اۆتورى – ۇ.ەسداۋلەت, رەجيسسەرى – ن.جاقىپباي), 19-20 شىلدەدە وسكەمەن جۇرتشىلىعىنا «زەرەمەن» قاتار «اباي» تراگەدياسىن (م.اۋەزوۆ, ءا.ورازبەكوۆ) ۇسىنادى. گاسترولدەر 28-30 شىلدە كۇندەرى شىمكەنت پەن تۇركىستاندا جالعاسادى.
XXVII ماۋسىمدا تەاتر ۇجىمى بىرقاتار فەستيۆالگە قاتىسىپ, ونەرىمەن ورگە وزدى. س.قوجامقۇلوۆ اتىنداعى جەزقازعان قازاق مۋزىكالىق دراما تەاترىنىڭ 45 جىلدىق مەرەيتويى اياسىندا وتكەن جانات حادجيەۆ اتىنداعى ءى ايماقتىق تەاترلار فەستيۆالىنە «كۇن ساۋلەسى تۇسپەگەن» پسيحولوگيالىق دراماسى «ەڭ ۇزدىك رەجيسسەرلىك جۇمىس» اتالىمىن جەڭىپ الدى (رەجيسسەرى – نۇرلان جۇمانيازوۆ). سپەكتاكلدەگى ماريو ءرولى ءۇشىن نۇركەن وتەۋىلوۆ جانات حادجيەۆ اتىنداعى ارنايى جۇلدەنىڭ يەسى اتاندى.
استانانىڭ 20 جىلدىعىنا ارنالعان «Samgau» VI حالىقارالىق تەاتر فەستيۆالىندە «قىمباتتى پامەلا» كومەدياسىندا باس كەيىپكەر بەينەسىن سومداعان قازاقستاننىڭ حالىق ءارتىسى گۇلجان اسپەتوۆا «ۇزدىك اكتريسا» اتالىمىندا توپ جاردى. «استانا» ءىى دۇنيەجۇزىلىك تەاتر فەستيۆالىندە «وتەللو» تراگەدياسى ەرەكشە اتالدى.
تەاتر ارتىستەرى مەملەكەتتىك ماراپاتتارعا يە بولدى. اتاپ ايتساق, باقىت يسابەكوۆا مەن سىرىم قاشقاباەۆ قازاقستاننىڭ ەڭبەك سىڭىرگەن قايراتكەرى اتاندى. بىرقاتار اكتەر مەن اكتريسا «ساحناگەر-2018» ۇلتتىق تەاتر سىيلىعىن يەلەندى.
تەاتردىڭ جاس بۋىن اكتەرلەرى «Samgau» VI حالىقارالىق تەاتر فەستيۆالى اياسىندا اكتەرلەردىڭ كاسىبي بىلىكتىلىگىن ارتتىرۋ ماقساتىندا ۇيىمداستىرىلعان شەبەرلىك ساباقتارىنا قاتىسىپ, ارنايى سەرتيفيكاتتارعا يە بولدى. «استانا» ءىى دۇنيەجۇزىلىك تەاتر فەستيۆالىنىڭ ارنايى قوناعى, «وسكار» سىيلىعىنىڭ يەگەرى جيۋلەت بينوشتىڭ شەبەرلىك ساباقتارىنا قاتىسقان ونەر ۇجىمىنىڭ 20 ءارتىسى وسىنداي سەرتيفيكاتتاردى الدى.
