استانا
استانا قالاسىنىڭ ىشكى ىستەر دەپارتامەنتى جۇمىس جارمەڭكەسىن وتكىزدى. بوس لاۋازىمدار جارمەڭكەسىندە تەرگەۋشى, انىقتاۋشى, جەدەل ۋاكىل, ينسپەكتور, پوليتسەي بوس لاۋازىمدارى ۇسىنىلدى. سونىمەن قاتار, جول-پاترۋلدىك پوليتسيا مامانداندىرىلعان باتالونىنىڭ اعا ينسپەكتورى, جول-پاترۋلدىك پوليتسيا پولكىنىڭ قىزمەت ينسپەكتورى, پوليتسەي, پوليتسەي-جۇرگىزۋشى, پوليتسەي-كاۆالەريست, كىشى ينسپەكتور-كينولوگ لاۋازىمدارىنا كونكۋرستىق نەگىزدە ىرىكتەۋ جاريالاندى.
اتىراۋ
اتىراۋ قالاسىندا 1 تامىزدان باستاپ اۋىزسۋ باعاسى 3 پايىزعا ارزاندادى. اتالعان تاريف ءبىر جىل بويى قولدانىستا بولادى. سەبەبى 2017 جىلدىڭ قورىتىندىسىنا سايكەس, قالانى اۋىزسۋمەن قامتىپ وتىرعان «اتىراۋ سۋ ارناسى» زاڭسىز ارەكەتتەر نەگىزىندە 139 ملن تەڭگە كىرىستى يەلەنگەنى انىقتالعان.
شىعىس قازاقستان وبلىسى
بەسقاراعاي اۋدانىنا كونە ءداۋىر قۇپيالارىن اشۋ ماقساتىمەن ۇلىبريتانيادان ارحەولوگ عالىمدار جۇمىس ساپارىمەن كەلدى. ولار جەتىجار اۋىلىندا ورنالاسقان ەجەلگى قورعانداردا زەرتتەۋ جۇمىستارىن جۇرگىزەدى.
قوستاناي وبلىسى
قىتايلىق كومپانيا قوستاناي قالاسىنداعى يندۋستريالىق ايماقتا تەلەديدار شىعاراتىن زاۋىت سالۋ جوباسىن قاراستىرۋدا. ولار باستاپقى كەزەڭدە 20 ملن دوللار ينۆەستيتسيا سالۋدى جوسپارلاپ وتىر. اتالعان زاۋىتتىڭ وندىرىستىك قۋاتى جىلىنا 600 مىڭ دانا بولماق. وسىعان وراي, الداعى ۋاقىتتا 500-گە جۋىق جۇمىس ورنى اشىلادى.
اقتوبە
اقتوبە سۋ قويماسىندا بالىقتاردىڭ نە سەبەپتى قىرىلىپ قالعانىن ەكولوگتار انىقتادى. «جاسىل بالدىردىڭ گۇلدەگەنى بايقالعان اۋماقتا ورتاشا سالماعى 20 گرامم بولاتىن 40 دانا ءولى تاۋتان تابىلدى. ساراپتاما جۇرگىزۋ ءۇشىن سۋ مەن بالىق سىنامالارى ەكولوگيا دەپارتامەنتى مەن ۆەتەريناريالىق زەرتحاناعا جىبەرىلدى. الدىن الا بولجام بويىنشا بالدىرلار جاپپاي گۇلدەپ, بالىققا وتتەگى جەتپەي قالعان.
اقمولا وبلىسى
بۋراباي كۋرورتتىق اۋماعىنداعى كەيبىر كاسىپكەرلەر ءوز تابىستارىن تومەندەتىپ كورسەتىپ, كاسسالىق اپپاراتتاردى قولدانباي كەلگەن. اقمولا وبلىسى بويىنشا مەملەكەتتىك كىرىستەر دەپارتامەنتى كاسىپكەرلەردىڭ تابىسى بويىنشا مالىمەت كۇدىك تۋدىرعاندىقتان, كۋرورتتىق اۋماقتىڭ بىرقاتار نىساندارىندا حرونومەترلىك زەرتتەۋ جۇرگىزۋگە شەشىم قابىلداعان. ناتيجەسىندە سالىق زاڭناماسى بويىنشا بىرقاتار بۇزۋشىلىقتار انىقتالدى.
شىمكەنت
شىمكەنتتە قىرعى بازاردىڭ جانىنداعى زاڭسىز ساۋدا دۇڭگىرشەكتەرىن بۇزۋ جۇمىستارى باستالدى. سۇرىلگەن 34 ساۋدا نۇكتەسىنىڭ ورنىنا قالا بازارىنان ورىن ۇسىنىلىپ وتىر. بۇل جونىندە سوت شەشىمى شىعارىلىپ, ول 18 شىلدەدە كۇشىنە ەنگەن.
