الماتى وبلىسى
وبلىستا قىمىز ءوندىرىسى جىلدان-جىلعا وركەندەپ كەلەدى. جەتىسۋ جەرىندەگى شارۋالار بيىل 800 توننا قىمىز وندىرگەن. 700 توننا قىمىزدىڭ ءار ليترىنە 60 تەڭگەدەن سۋبسيديا بەرىلدى. ال جىلقى سانى وتكەن جىلمەن سالىستىرعاندا 354 مىڭ 600 باسقا جەتتى.
تۇركىستان وبلىسى
ورداباسىداعى تاۋارلى ءسۇت فەرماسى نيدەرلاند ەلىنەن اكەلىنگەن روبوت-ساۋىنشىلارمەن جابدىقتالىپ جاتىر. باستاپقىدا ساۋىنشىنى قۇلتەمىر الماستىرعان, ەندى سيىرلاردىڭ جەم-ءشوبىن دە روبوت رەتتەيتىن بولادى. بۇگىندە ءوز ونىمدەرىن وڭدەۋگە كوشكەن ءوندىرىستىڭ ءسۇت زاۋىتى تاعى بار.
اتىراۋ وبلىسى
اتىراۋ وبلىسىندا شالعايداعى ەلدى مەكەندەردى گازداندىرۋ بويىنشا بەلسەندى جۇمىستار ءجۇرىپ جاتىر. جوبانىڭ جالپى قۇنى – 10 ملرد تەڭگە. جوبا اياسىندا الىس ورنالاسقان ەلدى مەكەندەرگە ۇزىندىعى 365 شاقىرىم ماگيسترالدىق گاز قۇبىرىن توسەۋ جوسپارلانۋدا. بۇگىنگى تاڭدا 274 شاقىرىم گاز قۇبىرى جەلىسى جۇرگىزىلدى.
قىزىلوردا وبلىسى
جاقىن كۇندەردە جىلىنا 4 مىڭ توننانى قۇرايتىن بالىق زاۋىتى ىسكە قوسىلادى. ءوڭىردىڭ يندۋستريالدىق-يننوۆاتسيالىق دامۋ جوسپارىندا جاريالانعانداي, كاسىپورىن قۇنى 160 ملن تەڭگەنى قۇرادى. زاۋىتتا 100 ادام جۇمىسقا تارتىلاتىن بولادى.
قوستاناي وبلىسى
قوستاناي وبلىسى اكىمدىگى چەليابى وبلىسىنىڭ قازاق دياسپوراسىنا كومەك كورسەتۋ, انا ءتىلىن ۇيرەتۋدە ۇيىمداستىرۋشىلىق-ادىستەمەلىك كومەك كورسەتۋ ماقساتىندا ءدوڭگەلەك ۇستەل جيىنىن ءوتكىزدى.
ماڭعىستاۋ وبلىسى
اقتاۋدا 50-دەن استام تسيفرلىق جوبالار قولدانىسقا قوسىلادى. ولاردىڭ قاتارىندا بىرەگەي ديسپەتچەرلىك قىزمەت, سمارت-ايالدامالار مەن «قاعازسىز» مەديتسينالىق قىزمەت كورسەتۋ كەشەندەرى بار. اۆتوبۋس ايالدامالارىنا جىلۋ جانە اۋا باپتاۋ جۇيەلەرى ورناتىلىپ, قوعامدىق كولىك كەستەسى جازىلعان تسيفرلىق اقپارات تاقتالارى ىلىنەدى.
شىعىس قازاقستان وبلىسى
اباي اۋدانىنىڭ ورتالىعى – قاراۋىل اۋلىندا ويشىل, عۇلاما, اقىن شاكارىم قۇدايبەردىۇلىنىڭ 160 جىلدىق مەرەيتويى كەڭىنەن اتالىپ ءوتتى.
