الماتى وبلىسى
تالدىقورعان قالاسىندا «ۇلتتىق مۋزەيگە سىي تارتۋ» اتتى رەسپۋبليكالىق شارا ءوتتى. اقىندار ۇمبەتالى كارىباەۆ, مۇقاعالي ماقاتاەۆ, تۇمانباي مولداعاليەۆ, ەسەنقۇل جاقىپبەك, جازۋشى ءانۋار ءالىمجانوۆ, سۋرەتشى ءابىلحان قاستەەۆ, كومپوزيتورلار مۇقان تولەباەۆ, نۇرعيسا تىلەنديەۆ, ت.ب. تۇلعالاردان قالعان جادىگەرلەر مۋزەي قورىن تولتىردى.
تۇركىستان وبلىسى
بيىل تۇركىستان وبلىسىندا 160 مىڭ تونناعا جۋىق جەمىس-جيدەك جيناۋ جوسپارلانىپ وتىر. ونىڭ 50-60 پايىزى كورشى مەملەكەتتەرگە ەكسپورتتالادى. رەسەي مەن بەلارۋس رەسپۋبليكالارىنان سۇرانىس جوعارى ەكەن.
سولتۇستىك قازاقستان وبلىسى
پەتروپاۆل قالاسىندا جىلىتۋ ماۋسىمى باستالدى. بيىل جەرگىلىكتى بيلىك جىلۋدى جىلداعىدان ەكى اپتا بۇرىن بەرۋ ءجونىندە شەشىم شىعاردى. قازىر قالاداعى بالاباقشا, مەكتەپ, اۋرۋحانا سەكىلدى الەۋمەتتىك نىساندار جىلۋعا قوسىلىپ جاتىر.
شىعىس قازاقستان وبلىسى
اياگوز قالاسىندا 600 ورىندىق جاڭا مەكتەپ پايدالانۋعا بەرىلدى. مەكتەپتى سالۋعا مەملەكەت قازىنادان ءبىر ميلليارد تەڭگەدەن اسا قارجى ءبولدى. اۋدان بويىنشا اشىلعان 19 ءىت كابينەتتىڭ ءبىرى وسىندا بولادى.
ماڭعىستاۋ وبلىسى
اقتاۋدا كاسپي جاعالاۋى ەلدەرىنىڭ ءىى حالىقارالىق تەاتر فەستيۆالى اشىلدى. شاراعا قاتىسۋعا قازاقستان, رەسەي, ازەربايجان, يران مەن تۇرىكمەنستاننان 8 تەاتر ۇجىمى ءوتىنىش بىلدىرگەن. بيىلعى فەستيۆال قازاق كينوسى مەن تەاترىنىڭ ساڭلاعى نۇرمۇحان ءجانتوريننىڭ 90 جىلدىعىنا ارنالىپ وتىر.
جامبىل وبلىسى
تارازدا كاسىپقوي بوكستان الەم چەمپيونى فيرۋزا ءشارىپوۆا الەۋمەتتىك از قامتىلعان وتباسىنا سۋ جاڭا اۆتوكولىكتى سىيعا تارتتى. بۇل شاڭىراقتا 4 بالا ءوسىپ جاتىر. سونىڭ ەكەۋىنىڭ مۇمكىندىگى شەكتەۋلى.
اقتوبە وبلىسى
اقتوبەدە رەسپۋبليكادا تۇڭعىش رەت انالار جيىنى وتەدى. الداعى اپتادا ەلىمىزدىڭ تۇكپىر-تۇكپىرىندەگى قوعامدا ءتۇرلى جەتىستىكتەرگە جەتكەن اياۋلى انالار اقتوبەدە باس قوسادى.
قىزىلوردا وبلىسى
رەسەي فەدەراتسياسى ۇكىمەتى ەسەبىنەن ماسكەۋ جانە سانكت-پەتەربۋرگ قالالارىنىڭ جوعارى وقۋ ورىندارىندا وقىعان 74 قىزىلوردالىق قىز-جىگىت ديپلومدارىن الدى. ولاردىڭ 43-ءى ماگيستراتۋرادا وقۋلارىن جالعاستىرسا, 31-ءى تۋعان جەرگە ورالدى.
