بيىل استانادا 70-تەن اسا كوشەدە جول جوندەۋ جۇمىستارى جۇرگىزىلەدى. بۇل تۋرالى قالا اكىمى جەڭىس قاسىمبەك ءمالىم ەتتى. ەلوردا باسشىسى جۋىردا كيرپيچنىي جانە ءوندىرىس ەلدى مەكەندەرىنىڭ تۇرعىندارىمەن جۇزدەسىپ, جۇيەلى ماسەلەلەردى اشىق تالقىلادى.
«تۇرعىندارمەن جەرگىلىكتى ورىنداردا – ەلدى مەكەندەردە, اۋدانداردا تۇراقتى تۇردە كەزدەسۋ وتكىزەمىن. كيرپيچنىي جانە ءوندىرىس ەلدى مەكەندەرىنىڭ تۇرعىندارىمەن وسىعان دەيىن جوسپارلانعان ءىستىڭ قالاي جۇزەگە اسىرىلاتىنىن, سونداي-اق كەلەر جىلدىڭ كەستەسىنە ەنگىزىلەتىن جۇيەلى پروبلەمالاردى تالقىلادىق. ماڭىزدى ماسەلەلەردىڭ ءبىرى – توزىعى جەتكەن, اپاتتى تۇرعىن ۇيلەردى بۇزۋ. ماسەلەن, بايقوڭىر اۋدانىن الساق, مۇندا, نەگىزىنەن, چەحوۆ كوشەسى (3, 1), ءبيشى قايىڭ (كۇلتەگىن), اسان قايعى, سىرداريا, لەرمونتوۆ جانە تاعى باسقا كوشەلەردىڭ بويىنداعى ۇيلەرگە قاتىستى ماسەلەلەر كوتەرىلەدى. بۇل ۇيلەر بۇزىلاتىن ۇيلەردىڭ تىزىمىندە بار. ماسەلەن, الداعى ءۇش جىلدا اپاتتى ۇيلەردىڭ تۇرعىندارى ءۇشىن 2,5 مىڭنان 3 مىڭعا دەيىن پاتەر سالۋدى جوسپارلاپ وتىرمىز. سول سياقتى كيرپيچنىي ەلدى مەكەنىندە №12 مەكتەپ اپاتتى دەپ تانىلعان. تيىسىنشە, وسىعان دەيىن ول بۇزىلعان, قازىر ونىڭ ورنىنا جاڭاسى سالىنىپ جاتىر» دەپ جازدى ج.قاسىمبەك الەۋمەتتىك جەلىدەگى پاراقشاسىندا.
سونىمەن قاتار, اكىم تۇرعىندارمەن كەزدەسۋدە اتالعان ەلدى مەكەندەردەگى ينجەنەرلىك جەلىلەر, جولدار, اۋلالار مەن قوعامدىق ورىنداردى اباتتاندىرۋ, اۆتوبۋس تاپشىلىعى سەكىلدى ماسەلەلەر كوتەرىلگەنىن جەتكىزدى.
«بيىل قالا بويىنشا 70-تەن استام كوشەنى (اعىمداعى جوندەۋ – 300 كوشە) جول جۇمىسىمەن قامتۋدى, 165-تەن استام اۋلا مەن قوعامدىق كەڭىستىكتى اباتتاندىرۋدى جوسپارلاپ وتىرمىز. اتالعان جۇمىستىڭ ءبىر بولىگى ورىندالدى. اۆتوبۋستار بويىنشا بيىل 400 اۆتوبۋس ساتىپ الامىز. ونىڭ 70-ءى جەتكىزىلدى, تاعى 70-ءى شىلدە ايىندا كەلەدى. پروبلەمالاردىڭ شەشىلۋىن باقىلاۋدا ۇستايمىز. ولار بويىنشا كەستە ازىرلەيمىز» دەپ ءتۇسىندىرىپ بەردى اكىم.
