22 جانە 23 قازاندا ەلورداداعى ءداستۇرلى اۋىل شارۋاشىلىعى جارمەڭكەسىندە قاراعاندى جانە ۇلىتاۋ وبلىستارىنىڭ تاۋار وندىرۋشىلەرى ءوز ونىمدەرىن حالىققا ۇسىندى.
ەكى وبلىستىڭ اۋىل شارۋاشىلىعى تاۋارىن وندىرۋشىلەر 698 توننا ەكولوگيالىق تازا ءونىم اكەلدى. ونىڭ ىشىندە: 430 توننا كارتوپ, 138 توننا ەت, 95 توننا كوكونىس, 13 توننا ءسۇت ونىمدەرى, 5,5 توننا بالىق جانە بالىق ونىمدەرى, 200 مىڭ دانا جۇمىرتقا جانە 16 توننا وزگە دە ونىمدەر (شۇجىق, كونديتەرلىك, نان-توقاش) بار.
قاراعاندى وبلىسىنان رەسپۋبليكا كۇنى قارساڭىندا جارمەڭكەگە 164 فەرمەرلىك شارۋاشىلىق پەن قايتا وڭدەۋ كاسىپورىندارى, سونداي-اق ۇلىتاۋ وبلىسى جاڭاارقا اۋدانىنىڭ اۋىل شارۋاشىلىعى تاۋار وندىرۋشىلەرى قاتىستى. بۇل جارمەڭكە فەرمەرلەرگە ءوز ونىمدەرىن تىكەلەي تۇتىنۋشىلارعا دەلدالسىز ساتۋعا مۇمكىندىك بەرەدى, ناتيجەسىندە ولاردىڭ تاۋارلارى نارىقتاعى باعادان 10-20% تومەن بولادى. جارمەڭكەلەر 30 قازانعا دەيىن ءار سەنبى مەن جەكسەنبى كۇندەرى وتەدى. وتەتىن ورنى: تۇران, 48 مەكەنجايىنداعى «استانا-ارەنا» ستاديونىنىڭ جانىنداعى الاڭ.
