ساۋىتبەك ابدراحمانوۆ,
پارلامەنت
ءماجىلىسىنىڭ دەپۋتاتى:
قادىرلى دوستار!
ەگەمەندىكتىڭ ەلەڭ-الاڭىندا, تاۋەلسىزدىكتىڭ ءتاڭسارى شاعىندا جارىق كورگەن بۇل گازەت ەگەمەندىككە ەنتەلەپ, تاۋەلسىزدىككە تالپىنعان تۇستاعى بۇكىلحالىقتىق بۇلقىنىستىڭ ءبىر كەلىستى كورىنىسى بولعان ەدى. اقمولادا قازاقشا گازەت اشىلۋعا تيىستىلىگىن نەگىزدەگەن وبلىستىق پارتيا كوميتەتىنىڭ ۇسىنىسىن قولداۋ قاجەتتىگى جونىندە رەسپۋبليكا باسشىلىعىنىڭ اتىنا قىزمەتتىك جازبانى دايىنداعان ادام, ياعني سول كەزدەگى ورتالىق كوميتەتتىڭ يدەولوگيا ءبولىمىنىڭ ءباسپاسوز سەكتورىنىڭ قىزمەتكەرى رەتىندە دە گازەتتىڭ وتىز جىلدىق تورقالى تويىنا قۋانىشتى ەكەنىمدى ايتۋدى ارتىق كورمەيمىن. قالالىق گازەتتىڭ قاناتى قاتايۋىنا, كاسىبي تۇرعىدان ورنىعا تۇسۋىنە وسى باسىلىمنىڭ باس رەداكتورلىعىنىڭ ورىنباسارلىعىنا قازاق جۋرناليستيكاسىنىڭ كورنەكتى قايراتكەرى, تاجىريبەلى قالامگەر جانبولات اۋپباەۆتى ۇسىنۋىممەن ۇلەس قوسا الدىم دەپ تە كوڭىل توعايتامىن. «استانا اقشامىنىڭ» ءوتىنىشى بويىنشا كەزىندە ەلباسىمىز نۇرسۇلتان نازارباەۆتان قالالىق گازەتكە ارنايى سۇحبات (1999 جىل, 18 تامىز) الۋ ارقىلى دا جاس باسىلىمنىڭ ابىرويىن ارتتىرۋعا اتسالىستىم دەپ بىلەمىن.
وسى وتىز جىلدىڭ ىشىندە گازەت ەلمەن بىرگە ەسەيدى, ەلوردامەن بىرگە ەڭسەلەندى, بۇگىندە نۇر-سۇلتاننىڭ تىنىس-تىرشىلىگىن تولىققاندى تانىتاتىن بەدەلدى باسىلىمعا اينالدى. ونىڭ بولاشاعى جارقىن دەپ سەنەمىن.
جازار جاقسىلىق, جەتكىزەر جاڭالىق كوپ بولسىن, قالامداستار!
ارقايسىڭىزدىڭ ومىرىڭىزگە باقىت, تابىس, ساتتىلىك تىلەيمىن.
