اباي الەمىنە ساپار شەكتى
كيەلى سەمەيدەگى قاسيەتتى قارا شاڭىراق ابايدىڭ «جيدەباي-ءبورىلى» مەملەكەتتىك قورىق-مۋزەيىندە «جازدىم ۇلگى جاستارعا بەرمەك ءۇشىن» دەگەن تاقىرىپتا «مۋزەي ءتۇنى» وتكىزىلدى.مۋزەي ءتۇنى شاراسىنىڭ سالتاناتتى اشىلۋ راسىمىنە كورنەكتى تۇلعالار – گەنەرال-پولكوۆنيك ءسات توقپاقباەۆ, جازۋشى ساۋلە دوسجان, قر مەملەكەتتىك سىيلىعىنىڭ يەگەرى, اقىن تىنىشتىقبەك ابدىكاكىمۇلى جانە قوجا احمەت ياساۋي اتىنداعى قازاق-تۇرىك ۋنيۆەرسيتەتىنىڭ ەۋرازيا عىلىمي-زەرتتەۋ ينستيتۋتى ديرەكتورىنىڭ ورىنباسارى سۋات بەيلۋر سىندى قوناقتار, سەمەي قالاسىنىڭ تۇرعىندارى مەن قالا مەيماندارى, مادەنيەت جانە ونەر مەكەمەلەرىنىڭ قىزمەتكەرلەرى, جاس اقىندار مەن ونەرپازدار, ستۋدەنتتەر مەن وقۋشىلار قاتىسىپ, ۇلى اقىننىڭ الەمىنە ساپارلادى.
اباي شاڭىراعىنا كەلگەن بالالار مەن جاسوسپىرىمدەر قازاقتىڭ ۇلتتىق ويىنى – توعىزقۇمالاقتان تۋرنيرگە قاتىسىپ, جاس قوناقتارعا ارنالعان قازاق حالقىنىڭ ۇلتتىق ويىنى – اسىقتان جارىستار وتكىزىلدى. اباي مۋزەيى جانىنان قۇرىلعان «ابايدىڭ ونەر مەكتەبى» تاربيەلەنۋشىلەرى مەن باسقا دا جاسوسپىرىمدەر باسەكەگە ءتۇسىپ كىم مىقتى ەكەنىن انىقتادى. جارىسقا ءتۇسىپ ءوزارا ەپتىلىگى جانە مەرگەندىگىمەن تانىلعان بالالارعا باعالى سىيلىقتار جانە اباي مۋزەيىنە
تەگىن كىرۋ بيلەتى تابىستالدى. سونداي-اق اباي مۋزەيىنىڭ زالدارى بويىنشا تانىمدىق ويىن بارىسىندا جاستار ابايدىڭ ءومىرى مەن شىعارماشىلىعى جايىنداعى بىلىمدەرىن كوپشىلىك الدىندا كورسەتتى.
اباي مۋزەيىندەگى «مۋزەي ءتۇنى» شاراسىندا «مۋزەيگە سىي» اكتسياسى ۇيىمداستىرىلدى. اتالعان شاراعا اياگوز, شار, سەمەي قالالارى جانە اباي اۋدانىنىڭ تۇرعىندارى قاتىسىپ, اباي مۋزەيىنىڭ قورىنا جيىرماعا جۋىق جادىگەر تاپسىرىلدى.
شاراعا قاتىسۋشى قوناقتار قازاق حالقىنىڭ تۇرمىس-تىرشىلىگى مەن ابايتانۋعا قاتىستى باعالى دۇنيەلەردىڭ قۇندىلىعى مەن ەرەكشەلىگى جايىندا ماعلۇماتتار بەردى. شارانىڭ سالتاناتتى اشىلۋ راسىمىندە اباي شاڭىراعى اتىنان ۇلتتىق قۇندىلىقتارىمىزدى ناسيحاتتاپ جۇرگەن جاندارعا قۇرمەت كورسەتىلىپ, العىس حاتتار تابىستالدى.
قۋات قيىقباي,
اباي مۋزەيىنىڭ اعا عىلىمي قىزمەتكەرى