ەلوردادا اباي قۇنانبايۇلىنىڭ 175 جىلدىعى قارساڭىندا اقىن اتىنداعى №87 مەكتەپ-گيمنازيا اشىلدى. مەكتەپ ديرەكتورى ايگۇل قاشاەۆانىڭ ايتۋىنشا, بۇگىندە مۇندا مىڭنان اسا وقۋشى قابىلدانعان, ونىڭ ءجۇز ەلۋى – ءبىرىنشى سىنىپ شاكىرتتەرى.
سالتاناتتى ءىس-شاراعا قر پرەمەر-ءمينيسترى اسقار مامين, ءبىلىم جانە عىلىم ءمينيسترى اسحات ايماعامبەتوۆ, ەلوردا اكىمى التاي كولگىنوۆ, قالالىق ءبىلىم باسقارماسىنىڭ باسشىسى ءانۋار جانعوزين قاتىستى. مۇعالىمدەر مەن بالالاردى ءبىلىم كۇنىمەن قۇتتىقتاعان ۇكىمەت باسشىسى جاڭا وقۋ ورداسىنا «قوعامدىق ماڭىزى بار باستامالاردى دامىتۋ قورى» اتىنان – زاماناۋي كومپيۋتەرلەرمەن جابدىقتالعان 3D ينتەراكتيۆتى تەحنولوگيامەن قورشاعان ورتانى تانىتۋ كابينەتى, سونداي-اق «سارىارقا اۆتوپروم» ءىرى وتاندىق اۆتوموبيل جاساۋ زاۋىتى اتىنان وقۋشىلاردى تاسىمالداۋ بويىنشا الەمدىك ستاندارتقا ساي ازىرلەنگەن اۆتوبۋس سىيعا تارتىلعانىن ءمالىم ەتتى. سونىمەن بىرگە ءاليا نازارباەۆا باسقاراتىن قور مەكتەپكە «ۆيرتۋالدى عىلىمي زەرتحانا» كابينەتىن قۇرال-جابدىقتارىمەن سىيعا تارتتى.
بۇدان سوڭ يننوۆاتسيالىق ينتەللەكتۋالدى تەحنولوگيالار اكادەمياسىنىڭ باس ديرەكتورى نۇرالى قۇدايبەرگەنۇلى قوناقتارعا مەكتەپتە ابايتانۋ ءپانى وقىتىلاتىنىن جانە ونىڭ ەرەكشەلىكتەرىن ايتىپ بەردى.
– ءبىز ابايتانۋ اتتى بىرەگەي كەشەن ازىرلەدىك. ول زاماننىڭ تالاپتارىنا تولىعىمەن ساي كەلەدى. ياعني كومپيۋتەرلەردىڭ, ينتەراكتيۆتى تاقتانىڭ كومەگىمەن بالالار اباي مۇراسىن تەرەڭ زەرتتەي الادى. سول جەردە حاكىمنىڭ بارلىق شىعارمالارى, ولەڭدەرى ەلەكتروندى تۇردە قولجەتىمدى بولادى. مىسالى, بالالار كۇردەلى سوزدەردىڭ ءمانىن سول جەردەن بىردەن تابا الادى. سونىمەن قاتار, وقۋشىلارعا ولەڭدەردى جاتقا وقۋعا, ءار ءماتىندى اجىراتۋعا ۇيرەتەدى, – دەدى ول.
سونداي-اق اكادەميا باسشىسى مۇنداي سىنىپتار ەلىمىزدىڭ بارلىق مەكتەپتەرىندە ەنگىزىلەتىنىنە سەنىم ءبىلدىردى.
