جەلتوقساننىڭ 5-ءى كۇنى ۇلتتىق اكادەميالىق كىتاپحانانىڭ ءماجىلىس زالىندا «عىلىمي قازىنا» باعدارلاماسى بويىنشا جارىق كورگەن «كلاسسيكالىق زەرتتەۋلەر» سەرياسىنىڭ 12-23 تومدارى مەن «ۇلى دالا تۇلعالارى» سەرياسى بويىنشا جارىق كورگەن «اباي», «جامبىل» كىتاپتارىنىڭ تۇساۋكەسەرى بولىپ ءوتتى.
التىن تۇستەس قايشىمەن التىنعا بەرگىسىز كىتاپتاردىڭ تۇساۋىن كەسكەن قر ۇعا اكادەميگى سەرىك قيراباەۆ كوپشىلىكتى جاڭا عىلىمي-زەرتتەۋلەردىڭ جارىققا شىعۋىمەن قۇتتىقتاپ, جازۋشى, زەرتتەۋشى, سونداي-اق قۇراستىرىپ-جيناقتاۋشىلارعا ءوز العىسىن جەتكىزدى.
ودان كەيىن ءسوز العان م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى ءۋاليحان قاليجانۇلى اڭگىمەسىن جاقسى جاڭالىقتان باستادى. «مادەني مۇرا» باعدارلاماسى بويىنشا كەلەر جىلى جارىققا شىعۋى ءتيىس بولعان «بابالار ءسوزى» ءجۇز تومدىق كىتابىنىڭ تولىق نۇسقاسى ۋاقىتىنان بۇرىن باسپاعا جىبەرىلگەنىن ايتىپ, كوپشىلىكتەن ءسۇيىنشى سۇرادى. سونداي-اق, «كلاسسيكالىق زەرتتەۋلەر» مەن «اباي», «جامبىل» كىتاپتارىنىڭ جالپى مازمۇنىنا قىسقاشا توقتالا كەتكەن ول جاڭا كىتاپتاردا كەيىنگى جاستارعا ۇلگى بولارلىق ماڭىزدى دا ماعىنالى زەرتتەۋلەر توپتاستىرىلعانىن تىلگە تيەك ەتتى. ءوز كەزەگىندە ءۋاليحان قاليجانۇلى ۇلتتىق اكادەميالىق كىتاپحانانىڭ باسشىسى الىبەك اسقارعا جاڭا كىتاپتاردىڭ توپتاماسىن سىيعا تارتىپ, كىتاپحانا ۇجىمىنا تولايىم تابىس تىلەدى.
جيىن بارىسىندا ءسوز العان قوناقتار اتالعان كىتاپتاردىڭ تيراجىن كوبەيتىپ, ونى قازاقستاننىڭ بارلىق كىتاپحانالارىنا جىبەرۋمەن قاتار عالامتور بەتتەرىندە جاريالاۋ تۋرالى ۇسىنىس-پىكىرلەرىن ايتتى.
ەكىنشى تولقىنمەن جاريالانىپ وتىرعان 12 تومدىق «كلاسسيكالىق زەرتتەۋلەردىڭ» بارلىعىندا دەرلىك قازاق حالقىنىڭ وتكەن تاريحىنان, ادەبيەتىنەن, سونداي-اق فولكلورى مەن ونەرىنەن سىر شەرتىپ, بەلگىلى ءبىر تۇلعالاردى جاڭا قىرىنان تانىتاتىن شەجىرەلى ەڭبەكتەر جيناقتالعان. ماسەلەن, 21-تومدا فيلولوگيا عىلىمىنىڭ دوكتورى, پروفەسسور س.قيراباەۆتىڭ تاۋەلسىزدىك العان جىلدارداعى قازاق ادەبيەتى مەن كونە ءداۋىر ادەبيەتىن بايلانىستىرا زەرتتەگەن جازبالارىنىڭ توپتاماسى جارىق كورىپ وتىر.
ال «اباي» كىتابى تانىمال ابايتانۋشى عالىمداردىڭ ەڭبەكتەرىنە سۇيەنە وتىرىپ قۇراستىرىلسا, «جامبىل» اتتى عىلىمي-تانىمدىق كىتاپ اۆتورى – فيلولوگيا عىلىمىنىڭ دوكتورى, ۇعا مۇشە-كوررەسپوندەنتى ءۋاليحان قاليجانۇلى.
بارلىق كىتاپ الماتى قالاسىنداعى «ادەبيەت الەمى» باسپاسىنان جارىققا شىعىپ وتىر.
ەستەرىڭىزدە بولار, «كلاسسيكالىق زەرتتەۋلەر» كوپتومدىعىنىڭ العاشقى 11 تومى جۇرتشىلىق نازارىنا بىلتىر ۇسىنىلعان بولاتىن.
نۇريسلام قۇسپانعالي
