باس قالادا مادەنيەت جانە سپورت مينيسترلىگىنىڭ ۇيىمداستىرۋىمەن «اباي تاعىلىمى – تاۋەلسىزدىكتىڭ تىرەگى» اتتى رەسپۋبليكالىق اقىندار ايتىسى مارەسىنە جەتتى.
وتكەن 3-4 قاراشا كۇندەرى ايتىستىڭ ىرىكتەۋ كەزەڭىنە قاتىسقان 10 جۇپتىڭ, ياعني 20 اقىننىڭ ونەرىن تاماشالاعان قازىلار القاسى جارتىلاي فينالعا 8 اقىندى (4 جۇپ) ىرىكتەپ العان بولاتىن. سوڭعى اينالىمعا بەكارىس شويبەكوۆ, ايبەك قاليەۆ, مۇحتار نيازوۆ, سەرىك قۋانعان, ەركەبۇلان قاينازار, جانسايا مۋسينا, مەيىربەك سۇلتانحان, قازىرەت بەردىحان سەكىلدى شاشاسىنا شاڭ جۇقپاعان جۇيرىكتەر شىعىپ, ايتىستىڭ كورىگىن قىزدىردى.
سونىمەن ءدۇبىرلى ونەر دوداسىندا سىر بويىنان كەلگەن تالانتتى اقىن مۇحتار نيازوۆتىڭ جۇلدىزى جانىپ, وسىمەن ءۇشىنشى مارتە «التىن دومبىرانى» جەڭىپ الدى. ايتىستىڭ اقتاڭگەرى بەكارىس شويبەكوۆ ءبىرىنشى ورىنعا يە بولدى. ەركەبۇلان قاينازار ەكىنشى ورىندى يەلەنسە, ءۇشىنشى ورىن سەرىك قۋانعا بۇيىردى. جەڭىمپازدارعا جۇلدەنى مادەنيەت جانە سپورت ءمينيسترى اقتوتى رايىمقۇلوۆانىڭ ءوزى تاپسىردى.
بيىلعى جىر بايگەسىنىڭ قازىلار القاسىن, كورنەكتى اكتەر, قازاقستاننىڭ ەڭبەك ەرى ءاسانالى ءاشىموۆ باسقارسا, ايتىستى, بەلگىلى اقىن, قازاقستاننىڭ ەڭبەك سىڭىرگەن قاي̆راتكەرى, قازاقستان اي̆تىس اقىندارى مەن جىرشى تەرمەشىلەر حالىقارالىق وداعىنىڭ توراعاسى ءجۇرسىن ەرمان جۇرگىزدى.
سونداي-اق كەش اياسىندا تاۋەلسىزدىك مەرەكەسى قارساڭىندا بابالارىمىزدان قالعان اسىل ونەرىمىزدىڭ دامۋىنا ايتارلىقتاي ۇلەس قوسقان داريعا مۇشتانوۆا, سەرىك ىدىرىسوۆ, اقمارال لەۋباەۆا, ءابىلحايىر سىزدىقوۆ, جىبەك بولتانوۆا سەكىلدى اقىندار «مادەنيەت سالاسىنىڭ ۇزدىگى» توسبەلگىسىمەن ماراپاتتالدى. ايتا كەتەيىك, قازىرگى جاعدايعا بايلانىستى ايتىس كورەرمەنسىز ءوتتى. ال تەلەۆيزياعا ارنالعان نۇسقاسى جاقىن ارادا ۇلتتىق ارنادان كورسەتىلەدى.
