جول-كولىك وقيعالارى سالدارىنان كىشكەنتاي بالالار دا زارداپ شەگىپ, جاراقات الىپ جاتادى. مۇنداي قايعىلى جاعدايلاردىڭ الدىن الۋ ءۇشىن جۇرگىزۋشىلەردىڭ قىراعىلىعىن كۇشەيتۋ پارىز. وسى ماقساتتا استانا قالالىق ءىىد اكىمشىلىك پوليتسيا باسقارماسىنىڭ قىزمەتكەرلەرى № 64 ورتا مەكتەپتىڭ جول قوزعالىسى جاس ينسپەكتورلارى جاساعىمەن بىرلەسىپ, «جۇرگىزۋشى, جىلدامدىقتى ازايت! الدا جاياۋ جۇرگىنشىلەر جولى!» اكتسياسىن باستادى.
جىل باسىنان بەرى ەلوردانىڭ تاس جولدارىنداعى جول-كولىك وقيعالارى سالدارىنان 80-دەي بالا ءتۇرلى جاراقات الىپ, ۇشەۋى قازا تاپقان. جاقىندا عانا استانادا جاياۋ جۇرگىنشىلەر جولىندا مەكتەپ وقۋشىسىن كولىك قاعىپ كەتىپ, اۋىر جاراقاتتىڭ سالدارىنان جاس عۇمىر ەرتە سولدى. سوندىقتان, پوليتسيا قىزمەتكەرلەرى مۇنداي وقيعانىڭ قايتالانۋىنا جول بەرمەۋگە تىرىسۋدا.
اكتسيا كەزىندە مەكتەپ وقۋشىلارى جول قوزعالىسىنىڭ جاس ينسپەكتورلارىمەن بىرگە جاياۋ جۇرگىنشىلەر جولىنا شىعىپ, جۇرگىزۋشىلەرگە جىلدامدىق تارتىبىن ساقتاۋدى ەسكە سالاتىن جول بەلگىلەرىن تاراتادى. ولار وسىلايشا جۇرگىزۋشىلەر نازارىن جول قوزعالىسى ەرەجەلەرىن ساقتاۋعا جانە ارناۋلى جولاقتان جاياۋ جۇرگىنشىلەرگە, اسىرەسە, بالالارعا جول بەرۋدىڭ ماڭىزىنا اۋدارتپاق. اكتسياعا قاتىسۋشىلار جۇرگىزۋشىلەرگە جول قوزعالىسى تاقىرىبىنداعى سۋرەتتەر مەن شىعارمالار جانە جول ەرەجەسىن ەسكە سالاتىن اقپاراتتىق كىتاپشالار تابىستايدى. ولار ودان بۇرىن «جۇرگىزۋشى – مەنىڭ ءومىرىمدى ساقتا» تاقىرىبىندا وتكەن بايقاۋعا قاتىسىپ, ءتۇرلى سۋرەتتەر سالعان ەدى.
پوليتسيا قىزمەتكەرلەرى بۇل اكتسيا جۇرگىزۋشىلەردى بىلىم بەرۋ مەكەمەلەرىنىڭ ماڭىندا جىلدامدىق تارتىبىن ساقتاپ, جالپى جول جۇرگەندە مۇقيات بولۋعا شاقىراتىنىنا سەنىمدى.
مەڭدوللا نۇرىمۇلى
