استانا قالالىق ءماسليحاتىنىڭ كەزەكتەن تىس سەسسياسىندا قوعامدىق كەڭەس پەن قالالىق كاسىپكەرلىك پالاتاسى ماقۇلداعان شاھار اۋماعىن اباتتاندىرۋ ەرەجەلەرى قابىلداندى.
اتالمىش ەرەجەلەرمەن قالالىق كوممۋنالدىق شارۋاشىلىق باسقارماسى باسشىسىنىڭ مىندەتىن اتقارۋشى نۇرلان سولتامبەكوۆ تانىستىردى.
قار قانشا ۋاقىتتا شىعارىلادى؟
ونىڭ ايتۋىنشا, بۇل ەرەجەلەر اباتتاندىرۋعا قاتىستى جەكە جانە زاڭدى تۇلعالاردىڭ مىندەتتەرىن ايقىندايدى. مۇنىمەن قوسا قالا تازالىعىنا جاۋاپتى ۇيىمداردىڭ بەلگىلى ءبىر جاعدايلاردا ارەكەت ەتۋ مەرزىمدەرىن بەلگىلەيدى. ماسەلەن, كۇز بەن قىس مەزگىلدەرىندە ايالدامالاردان, جاياۋ جۇرگىنشى وتكەلدەرىنەن, كوپىرلەردەن, ساۋدا ورتالىقتارى مەن بازارلاردان, ءبىر سوزبەن ايتقاندا, حالىق كوپ جينالاتىن ورىنداردان قار شىعارۋ مەرزىمى ونىڭ ءتۇسۋى باسىلعاننان كەيىن ءبىر تاۋلىك ىشىندە جۇزەگە اسىرىلۋى ءتيىس. كوشەلەر مەن وتپە جولدارداعى, تۇرعىن ءۇي اۋلالارىندا ۇيىلگەن قار ءۇش تاۋلىك ىشىندە شىعارىلۋى ءتيىس.
ەرەجەلەرگە سايكەس, جەكە جانە زاڭدى تۇلعالارعا قوقىستى جيناۋ مەن شىعارۋمەن اينالىساتىن ۇيىمدارمەن كەلىسىمشارتقا وتىرۋ مىندەتتەلىپ, قالدىقتاردى وزدىگىنەن شىعارۋ شارتتارى بەلگىلەندى. سونداي-اق, قاۋىپتى قالدىقتارمەن جۇمىس ىستەيتىن مەكەمەلەردىڭ جاۋاپكەرشىلىگى, قۇرىلىس الاڭدارى مەن ۋچاسكەلەرىنىڭ تالاپتارى ايقىندالدى.تۇرعىن ۇيلەردىڭ اۋلالارىنىڭ, ىشكى ورامدارىنىڭ, بالالار الاڭدارى مەن جاياۋ جۇرگىنشى جولدارىنىڭ «جاسىل» ايماقتارىنا قىزمەتتىك نەمەسە جەكە كولىكپەن كىرۋگە, بۇل ايماقتارعا كولىكتى قاڭتارۋعا تىيىم سالىندى.
بۇعان قوسا, ديسپەتچەرلىك قىزمەت بولماعان جاعدايدا شلاگباۋم ورناتۋ نەمەسە تەمىر قورشاۋلاردى, بەتون بلوكتارىن جانە وزگە كەدەرگىلەردى سالۋ ارقىلى كولىكتىڭ ءجۇرۋىن شەكتەۋ ۇيعارىلدى. ينجەنەرلىك جەلىلەرگە كەلسەك, مەردىگەرلىك ۇيىمداردىڭ جۇمىسى كەزىندە ارنايى ەسكەرتۋ بەلگىلەرىن ورنالاستىرۋ مىندەتتەلدى. عيماراتتاردىڭ ءۇش قاباتتىق بيىكتىكتە ورنالاسقان ارحيتەكتۋرالىق جارىقتاندىرۋ ەلەمەنتتەرى ىستەن شىققاندا ءبىر تاۋلىك ىشىندە, ال ءۇش قاباتتان اسقان جاعدايدا 72 ساعات ىشىندە ولاردى اۋىستىرۋ بەلگىلەندى.
اباتتاندىرۋ ەرەجەلەرىمەن تانىسقان قالالىق ءماسليحات دەپۋتاتتارى بايانداماشىعا بىرنەشە سۇراقتاردى قويدى. ماسەلەن, گايدار قاسەنوۆ قالالىق ادىلەت دەپارتامەنتىنىڭ ەرەجەلەرگە قاتىستى وسىنىڭ الدىنداعى ەسكەرتپەلەرىن ەسكە الدى. قايىرلى تاۋكەن جارىقتاندىرۋ ەلەمەنتتەرىن اۋىستىرۋعا از ۋاقىت بەرىلىپ وتىرعاندىعىن, كوبىنەسە ارناۋلى تەحنيكا تابىلمايتىندىقتان بۇل جۇمىس سوزىلىپ كەتەتىنىن ايتتى. بۇل سۇراقتارعا جاۋاپ بەرگەن نۇرلان سولتامبەكوۆ بارلىق ماسەلە ەسكەرىلگەنىن جەتكىزدى.
13 مىڭ بەينەكامەرا ورناتىلادى
سەسسيا كەزىندە قالالىق ينۆەستيتسيالار جانە دامۋ باسقارماسىنىڭ باسشىسى الىشەر ءابدىقادىروۆ باعدارلامالىق فوتوبەينەتىركەۋ جانە بەينەتالداۋ كەشەنىن قۇرۋ جانە پايدالانۋ جوباسى بويىنشا مەملەكەتتىك-جەكەمەنشىك ارىپتەستىك مىندەتتەمەلەرىن قابىلداۋ جايىنان حابار بەردى.
بۇل جوبا قالادا قوعامدىق قاۋىپسىزدىكتى قامتاماسىز ەتۋ ماقساتىندا قولعا الىنىپ وتىر. سول ءۇشىن شاھاردا التى جىل ىشىندە 13 مىڭ بەينەكامەرا ورناتۋ جوسپارلاندى. قازىر قالادا 3 مىڭ بەينەكامەرا جۇمىس ىستەپ تۇر. ال الداعى كۇندەرى جولداردا ورنالاستىرىلاتىن 6 مىڭ بەينەكامەرا قالانىڭ بارلىق قيىلىستارىن قامتىماق. 4 مىڭ بەينەكامەرا حالىق كوپ جينالاتىن جەرلەردە ورناتىلادى. ولاردىڭ ءبارى «نۇرسايا-2» تۇرعىن ءۇي كەشەنىندە ورنالاسقان تالداۋ ورتالىعىنان باقىلانادى.
«بۇل بەينەكامەرالار كولىكتەردىڭ ءنومىرىن, جىلدامدىعىن تىركەپ, جول ەرەجەلەرىن بۇزۋ فاكتىلەرىن انىقتايدى. بۇعان قوسا مالىمەتتەردى جيناقتاعان بەينەكامەرالار ارقىلى 98-99 پايىز دالدىكپەن قالا جولدارىندا قانشا كولىك جۇرەتىنىن بىلە الامىز» دەيدى ءا.ابدىقادىروۆ. ونىڭ ايتۋىنشا, بەينەكامەرالار ىستەمەي قالعان جاعدايدا نەمەسە ساپاسىز بەينە ۇسىنعاندا جاۋاپتى ورىندار ايىپپۇل تولەيدى.
كەزەكتەن تىس سەسسيا بارىسىندا تاعى بىرنەشە ماسەلە ءماسليحات دەپۋتاتتارىنىڭ تالقىسىنا شىعارىلدى. اتاپ ايتساق, قالا باعدارلارىندا جولاقىسىنان بوساتۋ ءۇشىن ازاماتتاردىڭ جەكەلەگەن ساناتتارىنا الەۋمەتتىك كومەك كورسەتۋ ءتارتىبى ۇسىنىلىپ, وسى ساناتتاعى ادامدارعا امبۋلاتوريالىق ەم الۋ كەزىندە تەگىن جانە جەڭىلدىكپەن دارىلىك زاتتاردى, ارنايى ەمدىك ونىمدەردى, مەديتسينالىق ماقساتتاعى بۇيىمداردى قوسىمشا بەرۋ ماسەلەسى اڭگىمە بولدى. سونداي-اق, ءماسليحاتتىڭ وسىنىڭ الدىنداعى كەيبىر شەشىمدەرىنە وزگەرىستەر ەنگىزىلدى.
امانعالي قالجانوۆ
