سوڭعى جىلدارى باس قالادا اباتتاندىرۋ جۇمىستارى قارقىندى ءجۇرىزىلدى. قالا اكىمى التاي كولگىنوۆتىڭ تىكەلەي تاپسىرماسى بويىنشا, بۇرىن سىيقى كەتكەن ساياباقتار قايتا اجارىن تاپسا, قالاداعى جانە قالا شەتىندەگى قاراۋسىز قالعان جەرلەردە اباتتاندىرۋ جۇمىستارى جۇرگىزىلىپ, تۇرعىندارعا قولايلى تىنىمباقتارعا اينالدى. بيىلدىڭ وزىندە قالا بويىنشا 150 اۋلا مەن 50 قوعامدىق كەڭىستىك اباتتاندىرىلدى.
التاي كولگىنوۆ قالانىڭ بىرقاتار اۋلالارىندا جۇرگىزىلگەن جوندەۋ جۇمىستارىنىڭ بارىسىمەن تانىستى. بۇل تۋرالى ەلوردا اكىمى ءوزىنىڭ ينستاگرام پاراقشاسىندا جازدى.
قالا اكىمى كەشكىلىك ارالاۋ بارىسىندا الماتى اۋدانىنىڭ بىرقاتار اۋلالارىندا (ابىلاي حان كوشەسى, 55, ع.مۇسىرەپوۆ كوشەسى, 10/3) جۇرگىزىلگەن جوندەۋ جۇمىستارىن ءوز كوزىمەن كورىپ قايتتى.
ع.مۇسىرەپوۆ كوشەسى, 10/3 بۇرىن قىلتانى جوق باتپاق جەر عانا بولاتىن. بۇل ماسەلەنى اۋدان تۇرعىندارى قالا اكىمىنە ءمالىم ەتكەننەن كەيىن اتالعان اۋماقتا اباتتاندىرۋ جۇمىستارى جۇرگىزىلگەن بولاتىن. جوندەۋدەن كەيىن جاڭا اۋلا بارلىق جاستاعى تۇرعىندارعا ىڭعايلى بولدى. 
اۋلادا سپورت تۇرلەرىمەن اينالىسۋعا, فۋتبول ويناۋعا بولادى. ۇلكەن كىسىلەر نەمەرەلەرىمەن ۋاقىت وتكىزە الادى. «الماتى اۋدانىنىڭ اۋماعىندا الداعى ۋاقىتتا تاعى دا بىرقاتار تىنىمباقتى اباتتاندىرۋدى جوسپارلاپ وتىرمىز. بۇل اۋداندا بيىل اباتتاندىرىلعان اۋلالار سانى 33, الداعى ۋاقىتتا قالا بويىنشا 150 اۋلا مەن 50 قوعامدىق كەڭىستىك اباتتاندىرىلدى. سونداي-اق №37 «ارمان» بالاباقشاسىنا كۇردەلى جوندەۋ جۇمىستارىن جۇرگىزەمىز. بيىل 26 ءبىلىم بەرۋ نىسانىن (مەكتەپتەر, بالاباقشالار, كوللەدجدەر) جوندەيمىز. بىرقاتار كوپپاتەرلى تۇرعىن ءۇي كەشەندەرىنە كۇردەلى جوندەۋ جۇرگىزەمىز. وعان «جۇمىسپەن قامتۋدىڭ جول كارتاسى» باعدارلاماسى ايتارلىقتاي كومەكتەسەدى» جازدى التاي كولگىنوۆ.
