جۋىردا «ADAL» ساياسي پارتياسى ورتالىق سايلاۋ كوميسسياسىنا (وسك) قر پارلامەنتى ءماجىلىسىنىڭ دەپۋتاتتىعىنا ۇمىتكەرلەردى ۇسىنۋ تۋرالى قۇجاتتارىن تاپسىردى.
بۇل تۋرالى پارتيانىڭ باق-پەن بايلانىس قىزمەتى حابارلادى. ۇمىتكەرلەردىڭ قورىتىندى تىزىمىنە پارتيانىڭ 16 وكىلى كىرگەن. ولاردىڭ قاتارىندا: «اتامەكەن» ۇلتتىق كاسىپكەرلەر پالاتاسى توراعاسىنىڭ ورىنباسارى, ءبىلىم بەرۋ سالاسىنىڭ ساراپشىسى ولجاس ورداباەۆ, بەلگىلى تەلەجۋرناليست, «اشىق الاڭ» تەلەجوباسىنىڭ جۇرگىزۋشىسى, Maltabu.kz سايتىنىڭ اۆتورى ماقسات تولىقباي, «شوپان اتا» قازاقستان قوي وسىرۋشىلەرى قاۋىمداستىعىنىڭ توراعاسى المازبەك سادىرباەۆ, «قازاقستان فەرمەرلەر وداعى» رەسپۋبليكالىق قوعامدىق بىرلەستىگىنىڭ پرەزيدەنتى جيگۋلي دايراباەۆ, بەلگىلى سپورتشى, قوعام بەلسەندىسى ارداق نازاروۆ, «ADAL» پارتياسىنىڭ توراعاسى سەرىك سۇلتانعالي, مەملەكەت جانە قوعام قايراتكەرى, بىرقاتار ءبىلىم جانە الەۋمەتتىك جوبالاردىڭ اۆتورى, ەكونوميست, ساياساتتانۋشى ەلدار جۇماعازيەۆ جانە ت.ب. بار.
«قازاقستان رەسپۋبليكاسىنداعى سايلاۋ تۋرالى» جانە «ساياسي پارتيالار تۋرالى» زاڭدارعا سايكەس, پارتيالىق تىزىمدە ايەلدەر مەن جاستاردىڭ 30% كۆوتالىق ۇلەسى ساقتالعان. سونداي-اق وبلىستىق اۋماقتىق سايلاۋ كوميسسيالارىنا «ADAL» پارتياسىنىڭ ايماقتىق فيليالدارىنان قۇجاتتار تۇسە باستادى. قازىرگى ۋاقىتتا كوميسسياعا اقتوبە وبلىستىق ءماسليحاتىنىڭ دەپۋتاتتىعىنا ۇمىتكەرلەردىڭ پارتيالىق تىزىمدەر بويىنشا قۇجاتتارى بەرىلدى. جاقىن ارادا قاجەتتى قۇجاتتار باسقا وڭىرلىك سايلاۋ كوميسسيالارىنا تاپسىرىلاتىن بولادى.
19 قاراشا كۇنى نۇر-سۇلتان قالاسىندا «ADAL» ساياسي پارتياسىنىڭ VII قۇرىلتايى ءوتتى. قۇرىلتايدا سايلاۋالدى باعدارلامانىڭ جوباسى ۇسىنىلىپ, پارتيانىڭ سايتى تانىستىرىلدى.