ADAL ساياسي پارتياسى ۇگىت-ناسيحات توبىنىڭ حالىقپەن وتكىزگەن كەزدەسۋلەرىنىڭ قورىتىندىسى شىقتى. 11-28 جەلتوقسان ارالىعىندا ەلىمىزدىڭ قالالارى مەن اۋىلدارىندا 3 583 كەزدەسۋ وتسە, وعان 71 256 ادام قاتىسقان.
ۇگىت-ناسيحات كەزەڭىندە پارتياعا 57 مىڭ ادام كىردى, قازىر پارتيا مۇشەلەرىنىڭ سانى 111 875 ازاماتتى قۇرايدى.
قولدانىستاعى ەرەجەلەرگە سايكەس, ايماقتارداعى كەزدەسۋلەرگە قاتىسۋشىلاردىڭ سانى شەكتەۋلى بولدى. دەگەنمەن ADAL پارتياسى وكىلدەرى سايلاۋشىلارمەن تىكەلەي كەزدەستى. سول سەبەپتەن ADAL پارتياسىنان ءماجىلىس دەپۋتاتتىعىنا بارلىق 16 ۇمىتكەر ەلىمىزدىڭ ءتۇرلى ايماقتارىنا اتتاندى.
ءوڭىر تۇرعىندارى كوپتەگەن وزەكتى ماسەلەلەردى ايتتى. كوبىنە تۇرعىندار ينفراقۇرىلىمعا قاتىستى پروبلەمالارعا, جولدىڭ ناشارلىعىنا, جالاقىنىڭ تومەندىگىنە, مەملەكەتتىك ورگاندارداعى بيۋروكراتتىققا جانە جەكە قاجەتتىلىكتەر ءۇشىن جەردىڭ جەتىسپەۋىنە شاعىمداندى.
سونداي-اق تۇرعىندار قورشاعان ورتانىڭ ناشارلىعى مەن مەديتسينالىق كومەك الۋ ماسەلەسىن ايتقان. بۇل ماسەلەلەردى شەشۋ پارتيانىڭ باعدارلامالىق قۇجاتىندا كورسەتىلگەن. ADAL پارتياسى سايلاۋ ناتيجەلەرىنە قاراماستان, جوعارىداعى پروبلەمالاردى شەشۋمەن اينالىسۋدى جالعاستىرا بەرەدى.
«ءبىز ءار ايماق تۇرعىندارىنىڭ پروبلەمالارىنىڭ ۇلكەن دەرەكقورىن جينادىق, سوندىقتان ءبىز 7 پايىزدىق مەجەدەن وتپەسەك تە, وسى ماسەلەلەردى شەشۋدى جالعاستىرامىز دەپ سەندىرگىم كەلەدى. وڭىرلەردەگى جوبالىق كەڭسەلەر فورماتىندا جۇمىس ىستەيتىن بولامىز» دەدى دەپۋتاتتىققا ۇمىتكەر ولجاس ورداباەۆ.