ادالدىقتارعا جەڭىس تىلەدى

ەقىۇ/دياقب سايلاۋدى باقىلاۋ ميسسياسىنىڭ مۇشەلەرى ADAL ساياسي پارتياسىنىڭ وكىلدەرىمەن كەزدەسىپ, الداعى سايلاۋدا ادالدىقتارعا جەڭىس تىلەدى.

جيىنعا ءماجىلىس دەپۋتاتتىعىنا كانديداتتار ەلدار جۇماعازيەۆ, ولجاس ورداباەۆ جانە پارتيا اپپاراتىنىڭ باسشىسى ­باۋىر­جان ورازعاليەۆ قاتىستى. كەزدەسۋ باسىندا ەقىۇ/ دياقب ميسسياسىنىڭ باسشىسى, ەلشى ياروسلاۆ دومانسكي پارتيا وكىلدەرىنە جۇزدەسۋ ءۇشىن العىس ايتىپ, توپ مۇشەلەرىمەن تانىستىردى. «قازاقستانعا 6 جەلتوقساندا ۇكىمەتتىڭ شاقىرۋىمەن ەقىۇ مۇشەلەرى رەتىندە كەلدىك. الداعى ۋاقىتتا پروتسەستىڭ حالىقارالىق نورمالارعا قانشالىقتى سايكەس وتەتىندىگىن قاداعالايتىن بولامىز» دەدى ول.
ميسسيا وكىلدەرى رەبرەندينگ, ADAL پارتياسىنىڭ قۇرامى, سايلاۋالدى باعدارلاماسى جانە پارتيانىڭ مىندەتتەرى تۋرالى بىرقاتار سۇراقتارعا جاۋاپ الدى. تاراپتار سايلاۋدا بىرلەسە جۇمىس ىستەۋگە ۋاعدالاستى.
«بۇگىنگى كەزدەسۋ ەكى جاق ءۇشىن دە ماڭىزدىلىعىمەن ەستە قالدى. ءبىز ەندى ADAL پارتياسىنىڭ ناقتى ماقساتتارىن بىلەمىز. پارتيانىڭ ايماقتارداعى وكىلدەرىمەن تىلدەسۋگە مۇمكىندىك بەرگەندەرىڭىز ءۇشىن كوپ راقمەت. سايلاۋدا جەڭىس تىلەيمىز» دەدى ياروسلاۆ دومانسكي.
ايتا كەتۋ كەرەك, «ادال» – ەلدە رەسمي تۇردە تىركەلگەن التى پارتيانىڭ ءبىرى. 2013 جىلى «بىرلىك» رەتىندە تىركەلگەن پارتيا قاراشا ايىنىڭ باسىندا اتاۋىن وزگەرتىپ, «ادال» بولعان. رەبرەندينگ جاساۋىنىڭ سەبەبىن تۇسىندىرگەن ساياسي ۇيىم وكىلدەرى «ادىلدىكتى تالاپ ەتۋشىلەر كوبەيدى» دەگەن ەدى.
قازىرگى تاڭدا ۇگىت-ناسيحات جۇمىسى باستالعالى وڭىرلەردە 2371 كەزدەسۋ ءوتىپ, وعان 36469 ادام قاتىستى. پارتياعا كىرۋ تۋرالى 20494 ءوتىنىش تۇسكەن.