«ادام ايناسىنا» ءۇڭىلىڭىز
![](https://astana-akshamy.kz/wp-content/uploads/2023/06/whatsapp-image-2023-06-21-174601-2-780x470.jpeg)
تۇڭعىش پرەزيدەنت كىتاپحاناسىندا سۋرەتشى, ءمۇسىنشى, «دارىن» مەملەكەتتىك جاستار سىيلىعىنىڭ لاۋرەاتى سىرىم مۇسىرەپوۆتىڭ «ادام ايناسى» اتتى جەكە كورمەسى اشىلدى. كورمە كىتاپحانانىڭ ەلىمىزدىڭ مادەنيەت سالاسىنداعى جەتىستىكتەرىن كەڭىنەن ناسيحاتتاۋعا, سونداي-اق جاس دارىنداردىڭ شىعارماشىلىعىن قولداۋعا باعىتتالعان «تاۋەلسىزدىكتىڭ مادەني كودى» عىلىمي-ەكسپوزيتسيالىق جوباسى اياسىندا ۇيىمداستىرىلدى.
كىتاپحانا ديرەكتورى باقىتجان تەمىربولات سوڭعى ەكى جىلدا «تاۋەلسىزدىكتىڭ مادەني كودى» جوباسىنىڭ ارقاسىندا ەلوردا تۇرعىندارى مەن قوناقتارى بەلگىلى شەبەرلەرمەن قاتار, بۇگىنگى كورمەنىڭ اۆتورى سەكىلدى جاس تالانتتاردىڭ جۇمىستارىمەن دە تانىسۋعا مۇمكىندىك العانىن اتاپ ءوتتى.
سىرىم مۇسىرەپوۆ يۋنەسكو كلۋبىنىڭ اقتوبە قالالىق كوركەمسۋرەت ليتسەيىندە وقىدى. ەكى جىل بۇرىن قازاق ۇلتتىق ونەر ۋنيۆەرسيتەتىن بىتىرگەن. رەسپۋبليكالىق جانە حالىقارالىق كورمەلەردىڭ تۇراقتى قاتىسۋشىسى. «شابىت» حالىقارالىق فەستيۆالىنىڭ لاۋرەاتى. سۋرەتشىنىڭ تۋىندىلارىن تاۋەلسىزدىك سارايىندا, اسكەري-تاريحي مۋزەيدە, ۇلتتىق مۋزەيدە, ءا.قاستەەۆ اتىنداعى مەملەكەتتىك ونەر مۇراجايىندا, وبلىستىق مۋزەيلەردە, سونداي-اق قازاقستانداعى جەكە كوللەكتسيالاردان تابۋعا بولادى.
كورمە اۆتورى جينالعاندارعا العىس ايتا وتىرىپ, كورمەنى «ادام ايناسى» دەپ بەكەر اتاماعانىن اتاپ ءوتتى. ول ءوز تۋىندىلارىندا ادامزات بولمىسىنىڭ ارالۋاندىعىن, رۋحىنىڭ كۇشتىلىگىن, وزىنە دەگەن سەنىمدىلىگىن كورسەتكىسى كەلدى. كورمەگە ءارتۇرلى جانر مەن تەحنيكادا ورىندالعان 10-عا جۋىق ءمۇسىن مەن 40 كارتينا قويىلعان.