ەلورداداعى №2 قالالىق اۋرۋحانانىڭ كارديوحيرۋرگتەرى ەكى رەت كلينيكالىق ءولىمدى باستان كەشكەن كىسىگە كۇردەلى وتا جاسادى. الپىس ءتورت جاستاعى پاتسيەنتتىڭ جاعدايى بۇگىندە جاقسى.
بۇل – كارديولوگياداعى ەرەكشە ۋاقيعالاردىڭ ءبىرى. اتالعان جايت تۋرالى استانالىق دارىگەرلەر كوشپەلى وتىرىس اياسىندا مەديتسينالىق مەكەمەدە قوناقتا بولعان ءماجىلىس دەپۋتاتتارىنا بايانداپ بەردى. حالىق قالاۋلىلارىن بارىنەن بۇرىن مەديتسينالىق كومەكتىڭ قولجەتىمدىلىگى مەن قاۋىپسىزدىگى, سونداي-اق, قاناينالىم جۇيەسىنىڭ اۋرۋلارىنا قاتىستى ماسەلەلەر قىزىقتىردى. دارىگەرلەردىڭ ءتيىمدى جۇمىسى ارقاسىندا قاناينالىم جۇيەسى اۋرۋلارىنان بولاتىن ءولىم كورسەتكىشى باس شاھاردا 41,8 پايىزعا ازايىپتى. جالپى, جۇرەگى اۋىراتىن ازاماتتارعا ارنالعان ستاتسيونارلىق كومەكتىڭ 93 پايىزى №2 اۋرۋحانادا كورسەتىلەدى ەكەن. ءماجىلىس دەپۋتاتتارى كلينيكاعا, ونىڭ جابدىقتالۋىنا, ماماندارىنا, سونىمەن قوسا, ونداعى مەديتسينالىق قىزمەتتىڭ ساپاسىنا جوعارى باعا بەردى.
بۇل اۋرۋحانا كوپپروفيلدى ستاتسيونار رەتىندە استانا قالاسى مەن رەسپۋبليكا جۇرتشىلىعىنا جەدەل جانە جوسپارلى مەديتسينالىق كومەك كورسەتەدى. ستاتسيونار 2010 جىلدىڭ ماۋسىمىندا پايدالانۋعا بەرىلگەن. 2015 جىلى مۇندا 10866 ادامعا وتا جاسالعان. دارىگەرلەردىڭ ايتۋىنشا, جۇرەك اۋرۋىنا شالدىققان پاتسيەنتتەردى ەمدەۋدە ەرتە ساۋىقتىرۋ ىسىنە ەرەكشە نازار اۋدارىلادى. بۇدان بولەك, كارديولوگتار ءوز ناۋقاستارىنىڭ حال-احۋالىن ۇيىنە شىعارىلعاننان كەيىن دە باقىلاپ وتىرادى. سول ءۇشىن ستاتسيونار ەلورداداعى بارلىق ەمحانالارمەن تىعىز ارىپتەستىكتە جۇمىس ىستەيدى.
بوتاگوز ماراتقىزى