…قاللەكي تەاترىنىڭ ساحناسىندا «اقىن مەن اجال» اتتى تراگەدياسىن قويعان «اقجەلكەن» ستۋدەنتتىك تەاترىن كورگەندە كوكەيىمە كەلگەن العاشقى وي وسى بولدى. وزىم ەلورداعا جاقىندا كەلگەندىكتەن, ستۋدەنتتىك تەاتردىڭ قۇرامىمەن تانىسقان بەتىم وسى. وزدەرى س.سەيفۋللين اتىنداعى اگروتەحنيكالىق ۋنيۆەرسيتەتىندە ءبىلىم الا تۇرا, اكتەرلىك شەبەرلىكتەرى اناۋ-مىناۋ ارتىستەن كەم تۇسپەيدى ەكەن. ال, قويعان قويىلىمى…
«اقىن مەن اجال» – اقىن عازيز ەشتاناەۆتىڭ ساكەن سەيفۋللينگە ارناپ جازعان تريلوگياسىنىڭ سوڭعى ءبولىمى. بۇعان دەيىن ستۋدەنتتەر «ەمەن ۇزاق جاسايدى» جانە «جولايرىق» سپەكتاكلدەرىن ساحنالاعان ەكەن. شىعارمادا ساكەن سەيفۋلليننىڭ اباقتىداعى اقىرعى كۇندەرى باياندالادى. بالاڭ ارتىستەردىڭ ويىنىندا كورەرمەندى فينالعا دەيىن جەتەلەپ وتىراتىن تەگەۋرىندى ديناميكا بار. تۇرمەدەگى قاتىگەز جەندەتتەر اقىندى اياۋسىز تەپكىلەپ, ءبىر جاعىنان اجال كەپ, القىمىنان الادى. جالعىز قالسا بولدى, «حالىڭ قالاي, «حالىق جاۋى»؟» دەپ جالماڭداپ جەتىپ كەلەتىن اجال بەينەسى – ءساتتى تاڭدالعان وبراز. «ءوزىڭ قۇرعان وكىمەت قۇرتتى سەنى» دەپ مىسقىلداي كۇلەتىن جاعىمسىز كەيىپكەردى ستۋدەنت داۋرەن امانجانوۆتىڭ سەندىرە ويناعانى سونشالىق, سوڭعى ساتتەردە ءبىز ونىڭ وبرازىن شىنىمەن جەك كورىپ قالدىق. داۋرەن بولاشاق ينجەنەر ەكەن.
– مىناداي ونەرىڭمەن اگرارلىق ۋنيۆەرسيتەتتە نە ىستەپ ءجۇرسىڭ؟ – دەگەن سۇراعىمىزعا: – اكە-شەشەم ءارتىس بولعانىمدى قالامادى. بىراق, تۇبىندە ونەر سالاسىنان ءبىر-اق شىعاتىنىمدى سەزەمىن, – دەپ جاۋاپ قاتتى.
سپەكتاكلدە نەگىزگى سالماق ساكەن رولىندەگى الىبەك مىرزاقۇلوۆقا تۇسكەن. ساكەننىڭ تۇبىنە ءوزى سەنگەن وكىمەتتىڭ جەتكەنىن سەزگەندەگى كۇيزەلىسى, ىشكى ارپالىسى, اتا-اناسىنىڭ رۋحىمەن تىلدەسۋى… بىرەسە «سەن ساتقىن ۇل تۋمادىڭ عوي, اناشىم!» دەپ شارق ۇراتىن, ەندىگى ءبىر ساتتە «اققۋلاردى اتپاڭدار!» دەپ ساحنادا جانۇشىرا جۇگىرەتىن كەيىپكەردى ويناۋ الىبەككە وڭاي سوققان جوق. اسىرەسە, اقىننىڭ اجالمەن تەكەتىرەسى ۇلكەن پسيحولوگيالىق دايىندىقتى تالاپ ەتكەنى كورىنىپ تۇر.
ستۋدەنتتەرگە ارناپ ىقشامدالعان شىعارما كوپشىلىككە ۇعىنىقتى ءارى ماعىنالى سوزدەرگە تولى. «تىنىشتىقتىڭ دا ءوز ءۇنى بار» دەيدى اجال. «ەلدىڭ ەرتەڭگى كۇنگە امان جەتۋى ءۇشىن بۇگىن ۇندەمەۋ كەرەك» دەپ, كۇبىرلەيدى ساكەن. ارتقى فوندا باياۋ وينالىپ تۇرعان قۋات شىلدەباەۆتىڭ «توراڭعى قاسىرەتى» كومپوزيتسياسى تراگەديانىڭ مازمۇنىن ودان سايىن تەرەڭدەتە تۇسەدى. رەجيسسەر نۇرفات ۆاحيتوۆ قويىلىمعا دايىندالۋعا ەكى اي كەتكەنىن جانە بۇل ستۋدەنتتەردىڭ رەپەرتۋارىنداعى العاشقى تراگەديا ەكەندىگىن ايتتى. ال, عازيز ەشتاناەۆ «العاشىندا مەندە ستۋدەنتتەر سپەكتاكلدى الىپ شىعا الا ما؟» دەگەن سەنىمسىزدىك بولدى. الايدا, جىگىتتەر وزدەرىنىڭ تاماشا ويىنىمەن كوڭىلىمدەگى كۇدىكتى ءاپ-ساتتە سەيىلتتى. ەندى بۇل وقۋ ورداسىنىڭ اتاۋىن «اگروتەحنيكالىق جانە تەاتر ۋنيۆەرسيتەتى» دەپ وزگەرتۋگە بولاتىن شىعار» دەپ ازىلدەدى.
س.سەيفۋللين اتىنداعى اگروتەحنيكالىق ۋنيۆەرسيتەتىنىڭ رەكتورى اقىلبەك كۇرىشباەۆ قاللەكي تەاترىنىڭ باسشىلىعىنا العىسىن بىلدىرە وتىرىپ, ورىندى ۇسىنىس ايتتى. «كەلەسى جولى ستۋدەنتتەرىمىزدىڭ قويىلىمىنا ۇكىمەت مۇشەلەرى مەن مينيسترلەردى دە شاقىرايىق! سوندا ولار قازىرگى ستۋدەنتتەردىڭ ومىرىمەن, ولاردى تولعانتاتىن ماسەلەلەرمەن تانىسار ەدى» دەدى رەكتور.
اقىن نەسىپبەك ايتۇلى, اكتريسا رىمكەش ومارحانوۆالار جاس ارتىستەردىڭ ونەرىنە وڭ باعاسىن بەرىپ, ساتتىلىك تىلەدى.
وسىدان سەگىز جىل بۇرىن س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە قۇرىلعان ستۋدەنتتىك تەاتردىڭ رەپەرتۋارىندا ونعا جۋىق قويىلىم بار. ستۋدەنتتەر بۇعان دەيىن «قۇمداعى ءۇي», «پاي-پاي, جاس جۇبايلار!», تاحاۋي احتانوۆتىڭ «كۇشىك كۇيەۋ», ءسۇلتانالى بالعاباەۆتىڭ «قىز جيىرماعا تولعاندا» جانە تاعى باسقا پەسالاردى ساحنالاعان. جاس ارتىستەر ۋنيۆەرسيتەت ساحناسىندا جىلىنا ەكى-ءۇش سپەكتاكل قويادى. بىلتىر ولار اقتوبە وبلىسىنىڭ ءتورت-بەس اۋدانىنا گاسترولدىك ساپارمەن بارىپ قايتتى.
روزا ارەن
