استاناداعى ل.گۋميلەۆ اتىنداعى ەۋرازيا ۋنيۆەرسيتەتىنىڭ فيلولوگيا فاكۋلتەتىنىڭ ۇجىمى ۇلىستىڭ ۇلى كۇنى اياسىندا كورنەكتى قالامگەر, مەملەكەتتىك سىيلىقتىڭ لاۋرەاتى تولەن ابدىكپەن كەزدەستى.
اللا جازسا, بيىل تولەن اعامىز جەتپىس بەس جاسقا تولادى. بالا كۇنىمنەن بەلگىلى ءسوز زەرگەرىنىڭ كىتاپتارىن قۇمارتىپ وقىدىم. از جازسا دا, ساز جازعان جازۋشىنىڭ قاي شىعارماسى دا وقىرماندى ويلاندىرماي قويمايدى. «اكە» حيكاياتىندا كەڭەستىك داۋىردە حالقىمىزدى زار قاقساتقان وقيعالار ارقىلى ءتۇرلى زوبالاڭدى باستان كەشكەن اۋلەتتەن قالعان جالعىز تۇياقتىڭ تولعانىسىن جەتكىزدى. «توزاق وتتارى جىمىڭدايدى» پوۆەسىندە بايلىق ىزدەگەن قاندىقول قاراقشىلاردىڭ كەسىرىنەن جەر بەتىنەن جويىلىپ كەتكەن اراكۋ تايپاسىنان قالعان كياكۋدىڭ بەينەسى ارقىلى سول كەزدەگى وتارلىق يمپەريانىڭ ازابىن تارتقان قازاقتىڭ قايعىسىن تۇسپالمەن ايتادى. «ءولىارا» رومانىنداعى كەيىپكەرلەردەن ءوزىمىزدىڭ اۋىلداعى اتالارىمىزدى تانىدىق. جۇرتشىلىق ءجيى ايتاتىن «وڭ قول» شىعارماسىندا اۋىر دەرتكە شالدىققان الما ەسىمدى ارۋ ارقىلى پسيحولوگيالىق يىرىمدەرگە تەرەڭ بويلايدى. «قوناقتار» اڭگىمەسىندە اكە-شەشەنى قادىرلەۋ مەن داستۇردەن اجىراپ بارا جاتقان ۇرپاقتى سومدايدى. جاڭا عاسىردىڭ باسىندا جازعان «پاراسات مايدانى» حيكاياتى دا قازاق ادەبيەتىنىڭ شوقتىعى بيىك شىعارماسى سانالدى. كەيىنگى جارىق كورگەن «تۇعىر مەن عۇمىر» پوۆەسى دە وقىرمانداردان وڭ باعاسىن الدى. قالامگەردىڭ دراماتۋرگياسى دا ءبىر توبە.
ادەمى اسەرمەن ورىلگەن ادەبي كەشتە تالانتتى تۇلعانىڭ ءومىرى مەن ونەرى تۋرالى كەڭىرەك ايتىلدى. ۋنيۆەرسيتەتتىڭ پرورەكتورى, بەلگىلى عالىم ديحان قامزابەكۇلى ارداقتى ازامات جايىندا ساليقالى وي ءوربىتىپ, «كۇلتەگىن» مەدالىن تابىس ەتتى. اكادەميك سەيىت قاسقاباسوۆ ابدىكۇلىنىڭ ادەبي الەمىنەن سىر تارتىپ, پاراساتتى ءسوز قوزعادى. فيلولوگيا فاكۋلتەتىنىڭ دەكانى شولپان جارقىنبەكوۆا كەش يەسىنە شىنايى العىسىن جەتكىزدى. پروفەسسور راقىمجان تۇرىسبەك جازۋشىنىڭ شىعارماشىلىعىنا توقتالدى. ستۋدەنتتەر سۋرەتكەردىڭ تۋىندىلارىنان ۇزىندىلەر وقىدى.
كەش بارىسىندا تولەن اعامىزدىڭ ءوزى دە ونەر, رۋحانيات تۋرالى ويلارىمەن ءبولىستى. قوعامدىق ۇدەرىستەر جايىندا پىكىر الىستى. «قازىر وقىرماندار ورتاڭقول مەن دارىندى جازۋشىنى اجىراتا الماي قالدى. حالىقتىڭ تالعامى سونى ايىرا بىلەتىندەي ءوسۋ كەرەك. بۇگىندە كەڭەستىك ءداۋىردى جاقتاعانداردى دا, وعان قارسى بولعانداردى دا اسپەتتەيمىز. سانامىزدا قويىرتپاق كوپ. سوندىقتان ءار دۇنيەگە سىن كوزبەن قاراماساق, باتىل ايتا الماساق, ول قوعام ءالى دە تومەنگى دارەجەدە دەگەندى كورسەتەدى» دەپ تۇيىندەدى ءسوزىن اۆتور.
قالامگەر الپىس جاسقا تولعاندا, حالقىمىزدىڭ اسىل پەرزەنتى, مارقۇم ءابىش كەكىلبايۇلى اعامىز «ەگەمەن قازاقستان» گازەتىندە «ادامستانعا ساياحات» اتالعان توگىلدىرىپ ماقالا جازىپ ەدى. سول ايتقانداي, كورنەكتى سۋرەتكەرمەن بولعان جىلى جۇزدەسۋدە دە جازۋشىنىڭ جان دۇنيەسى مەن شىعارماشىلىعىنا ساياحاتتاپ قايتقانداي اسەردە بولدىق.
ازامات ەسەنجول
