كەشە استانالىق جاستاردى جۇمىسپەن قامتۋعا سەپتەسەتىن ستۋدەنتتىك قۇرىلىس جانە «جاسىل ەل» جاستار ەڭبەك جاساقتارىنىڭ كەزەكتى ماۋسىمى سالتاناتتى جاعدايدا اشىلدى. ناۋرىز ايىندا-اق جۇمىستارىن باستاپ كەتكەن جاستاردىڭ ەڭبەككە ىنتالارى زور. جيىن سوڭىندا شتاب توراعاسى ادىلبەك بەكتاشەۆتى اڭگىمەگە تارتىپ تىلدەسكەن ەدىك.
– جاستاردىڭ جۇمىسقا دەگەن ىنتاسى قالاي؟
– ازىرگە جاساق قۇرامىندا ءۇش جۇزدەن اسا ستۋدەنت بار. ونىڭ ەكى جۇزدەيىن جۇمىسپەن قامتىپ ۇلگەردىك. قابىلداۋ ءالى دە جالعاسۋدا. ءسوز ورايىندا, ون سەگىز بەن جيىرما توعىز جاس ارالىعىنداعى زامانداستارىمدى ءبىزدىڭ جاساقتىڭ قۇرامىنا شاقىرامىن.
2005 جىلدان باستاپ شتاب ارقىلى 7000 مىڭعا جۋىق ستۋدەنت پەن جۇمىسسىز جاستاردىڭ قولىن شارۋاعا جالعاعان ەدىك. وتكەن جىلدىڭ وزىندە ەكى مىڭداي زامانداسىمىز «ەكى قولعا ءبىر كۇرەك» تاپقان-دى. بۇل مەجەنى بيىل ءۇش مىڭعا جەتكىزەمىز دەگەن جوسپارىمىز بار. بۇل – بۇگىنگى بۋىننىڭ جالقاۋلىقتان ادا ەكەنىن كورسەتەدى دەپ بىلەمىن.
– قاتارلاستارىڭىزدى قاي سالالار بويىنشا جۇمىسقا جىبەرىپ جاتىرسىزدار؟
– كوپشىلىگى ەلوردانىڭ تالاي عيماراتىن تۇرعىزعان «بازيس-ا» قۇرىلىس كومپانياسىندا جۇمىس ىستەۋدە. وسى تۇستا ايتا كەتەرلىگى, جىلدا كومپانياعا بارعان ستۋدەنتتەر ءارتۇرلى جەڭىل-جەلپى شارۋالارمەن اينالىساتىن جانە جالاقىلارى دا ماردىمسىز بولاتىن. ال بيىل ولار كانىگى مامانداردىڭ قاسىندا ءجۇرىپ ۇيرەنىپ, ءتالىمىن الىپ, ءوزى دە ورتاڭقول مامان رەتىندە سولارمەن بىردەي جالاقى الادى. ماسەلەن, ەلەكتر دانەكەرلەۋشى, سىلاقشى, كىرپىش قالاۋشى… «فاساد-ەكسپو» مەكەمەسى دە ءبىرشاما جاستارىمىزدى قابىلدادى. «استانا ورمانى» شارۋاشىلىعىنا تارتىلعان مۇشەلەرىمىز دە بار. بارلىعىندا دا ايلىق جالاقى جەتپىس مىڭ تەڭگەدەن كەم ەمەس.
– جاستاردى قابىلداۋعا ىنتا تانىتىپ وتىرعان مەكەمەلەر قاتارى وسىمەن شەكتەلەدى مە؟
– ارينە, جوق. جاساق مۇشەلەرىن قوعامدىق تاماقتانۋ سالاسىنا ورنالاستىرۋ ءۇشىن كاسىپورىندارمەن كەلىسىمدەر جاسالۋدا. قىز بالالارىمىزدى «اركا» مەيرامحانالار جەلىسىنە جىبەرمەكپىز. بۇدان باسقا, اۋلا اۋماقتارىن تازارتۋ بويىنشا بىرقاتار اكتسيالار وتكىزبەكپىز.
اسحات رايقۇل
