استانا قالاسىنىڭ پوليتسيا دەپارتامەنتىندە اۋلەت ساباقتاستىعىن جالعاستىرىپ, جەمىستى قىزمەت ەتىپ جۇرگەن جاندار جەتكىلىكتى. بۇكىل سانالى عۇمىرىن ىشكى ىستەر ورگاندارىنا ارناعان ارداگەرلەردىڭ بالالارى دا بۇگىندە مۇنداعى ءتۇرلى بولىمدەردە جۇمىس ىستەيدى. ۇرپاق ساباقتاستىعى قاي كەزدە دە ەرەكشە قۇرمەتتەلگەن. اعا بۋىننىڭ ورنىن باسقان جاس بۋىننىڭ تاجىريبە جيناۋدا دا مۇمكىندىگى زور.
ويتكەنى ولار بۇل قىزمەتتىڭ قىرى مەن سىرىن بالا كەزىنەن كورىپ, ءبىلىپ ءوستى. سوندىقتان بەلگىلى ءبىر ويلاۋ ءتاسىلى مەن مىنەز-قۇلىقتارىندا الدىڭعى بۋىن اعالارمەن ۇقساستىق بولاتىنى – زاڭدىلىق. ازاماتتاردىڭ قاۋىپسىزدىگى جولىندا جانقيارلىق پەن قىزمەتتىك بورىشىن ءمىنسىز اتقارۋ – بۇگىنگى پوليتسيا قىزمەتكەرلەرىنە ءتان قاسيەت. ءومىرىنىڭ كوپ بولىگىن وسى كاسىپكە ارناعان اكە ءوزىنىڭ جولىن ۇلىنىڭ تاڭداعانىنا ءدان ريزا.
وسىنداي ۇلگىلى وتباسىنىڭ ءبىرى – بىرتاەۆتار اۋلەتى. سوناۋ 1989 جىلى تالعات راحىمبەكۇلى بىرتاەۆ ىشكى ىستەر ورگاندارىنا قىزمەتكە كەلدى. ءوزى قىزمەت ەتكەن جىلدارى ول پاترۋلدىك قىزمەتتە سەرجانت شەنىنەن جەزقازعان قالاسى ارنايى مامانداندىرىلعان كۇزەت قىزمەتى باسقارماسىنىڭ باستىعى لاۋازىمىنا دەيىن ءوسىپ, پوليتسيا پولكوۆنيگى دارەجەسىنە دەيىن كوتەرىلدى.
اراعا جىلدار سالىپ, اكەسىنىڭ جولىن ۇلى بىركەن بىرتاەۆ جالعادى. ول ىشكى ىستەر ورگاندارىنداعى قىزمەتىن ديپلوماتيالىق وكىلدىكتەردى قورعاۋ پولكىنەن باستادى. 2016 جىلى سارىارقا اۋداندىق كريمينالدىق پوليتسيا بولىمىندە قىزمەت ىستەپ, ەكى جىلدان كەيىن اعا جەدەل ۋاكىل بولدى. 2022 جىلى سارىارقا اۋدانى جانىنداعى پب كريمينالدىق پوليتسيا ءبولىمى باستىعىنىڭ ورىنباسارى قىزمەتىنە تاعايىندالدى.
بىركەننىڭ اتسالىسۋىمەن «ءىزى سۋىماي» اشىلعان قىلمىستاردىڭ سانى از ەمەس. ەڭبەگى ەلەنىپ, باسشىلىق تاراپىنان بىرنەشە رەت ماقتاۋ قاعازدارى مەن العىس حاتتارعا يە بولعان.
2018 جىلدىڭ مامىر ايى بولاتىن. پاتەرلەردىڭ كىلتتەرىن سايكەستەندىرىپ الىپ, الماتى, سارىارقا اۋداندارىندا ءۇي توناۋمەن اينالىسىپ جۇرگەن اككى ۇرىلاردى قولعا ءتۇسىردى. بۇل جولى ولار قانشا كانىگى باۋكەسپە بولسا دا كاپيتان بىركەن جەتەكشىلىك ەتەتىن كريمينالدى پوليتسيا جاساعىنان ايلالارىن اسىرا المادى. بوگەنباي باتىر داڭعىلى بويىنداعى №24 ءۇيدى ۇپتەپ ۇلگەرمەدى, اۋلاسىندا قۇرىقتادى. وسى جولى بۇلاردىڭ قىراعى كوزىنەن قىلمىس الەمىندە «فارا-قايىق» لاقاپ اتىمەن تانىلعان فارحات قاناعاتوۆ پەن بۇعان دەيىن بىرنەشە اۋىر قىلمىستار جاساپ, حالىقارالىق ىزدەۋدە جۇرگەن باقىت ارىستانوۆ دەگەن ۇرى تۇتقىندالدى. ونىڭ ايلاكەرلىگى سونداي وزىنە قاتتى ۇقساس ادامنىڭ كۋالىگىمەن بىرنەشە جىل بويى بوي تاسالاپ, قولعا تۇسپەي كەلگەن.
مىنە, وسىنداي ىجداھاتتى قيمىلى مەن بىلىكتى تاجىريبەسى ارقاسىندا ول قىلمىستىڭ تەز اشىلۋىنا بارىنشا اتسالىسىپ, ارىپتەستەرى اراسىندا سىي-قۇرمەتكە بولەنىپ ءجۇر.
– مەن بالا جاستان پوليتسيا بولۋدى قالادىم. وعان سەبەپ بولعان اكەمنىڭ وسى سالادا ەڭبەك ەتىپ, كۇندە كوز الدىمدا قوعامدىق ءتارتىپتى قاداعالاۋعا بەلسەنە اتسالىسىپ, ەلمەن, حالىقپەن تىعىز ارالاسىپ جۇرگەنى بولسا كەرەك. اسىرەسە, ونىڭ ۇستىنە وقالى كيىم كيىپ, جىپ-جيناقى كۇيىندە تاڭەرتەڭ قىزمەتكە كەتىپ بارا جاتاتىنى ۇنايتىن. پوليتسياعا ءتارتىپ تە, ادەپ تە, جيناقىلىق تا ۇنەمى كەرەك قوي. سودان مەن دە وسى جولدى, وسى ماماندىقتى تاڭدادىم, – دەيدى بىركەن تالعاتۇلى.
كەيىپكەرىمىز ءۇشىن پوليتسيا قىزمەتى مەن سپورتتى ءبولىپ قاراۋعا بولمايدى. ول بىرنەشە رەت رەسپۋبليكالىق فۋتبول تۋرنيرلەرىندە ەلوردالىق دەپارتامەنتتىڭ نامىسىن قورعادى. ونىڭ ويىنشا, دەنەسى شىنىققان, مورالدىق تۇرعىدا بەرىك, ەرىك-جىگەرى مىقتى پوليتسيا قىزمەتكەرى عانا جۇكتەلگەن مىندەتتەردى ءوز دەڭگەيىندە اتقارا الادى.
«سپورتپەن شۇعىلدانۋ كەزىندە مەن ۇنەمى جاعىمدى اسەر مەن جاڭا قۋات الامىن» دەيدى پوليتسيا قىزمەتكەرى.
ءبىز دە اكە جولىن قۋعان ۇلدىڭ ومىردە دە, سپورتتا دا زور جەتىستىكتەرگە جەتە بەرەرىنە سەنىمدىمىز.
ەلميرا شاۋلەنوۆا,
استانا قالاسى پوليتسيا
دەپارتامەنتى باسپاسوز قىزمەتىنىڭ جەتەكشىسى
