ەلورداداعى قازاقستان رەسپۋبليكاسى قارۋلى كۇشتەرىنىڭ ۇلتتىق اسكەري-پاتريوتتىق ورتالىعىندا «جاس سارباز – پاتريوتتار ورداسى» جوباسى اياسىندا اسكەري-پاتريوتتىق اندەر بايقاۋى قورىتىندىلاندى. بايقاۋ ارميا گەنەرالى ساعادات نۇرماعامبەتوۆتىڭ 100 جىلدىعىنا وراي ءوتتى.
سالتاناتتى ءىس-شارانى ەلوردانىڭ جاستار ساياساتى ماسەلەلەرى باسقارماسى, ءبىلىم باسقارماسى جانە «جاس سارباز» جاسوسپىرىمدەر اسكەري-پاتريوتتىق قوزعالىسى رەسپۋبليكالىق قوعامدىق بىرلەستىگى استانا قالالىق فيليالى بىرلەسە ۇيىمداستىردى.
ەلوردالىق جاستار ساياساتى ماسەلەلەرى باسقارماسىنىڭ باسشىسى سامات يبراەۆتىڭ ايتۋىنشا, استانالىق مەكتەپتەر مەن كوللەدجدەردە 80-گە جۋىق «جاس سارباز» سىنىپتارى مەن كلۋبتارى جۇمىس ىستەيدى. ال قوزعالىس تاربيەلەنۋشىلەرىنىڭ سانى 8 مىڭنان استام ادامدى قۇرايدى.
«اسكەري-پاتريوتتىق اندەر بايقاۋىنا قاتىسۋشىلار 19 ساۋىردەن باستاپ ىرىكتەلدى. بارلىعى 58 بالادان ءوتىنىم كەلىپ ءتۇستى, ناتيجەسىندە تەك 7-ەۋى اقتىق كەزەڭگە جولداما الدى. بۇل بايقاۋدىڭ جەڭىمپازدارى بيىل قاراشا ايىندا وتەتىن رەسپۋبليكالىق بايقاۋعا قاتىسادى» دەپ ءبولىستى «جاس سارباز» جاسوسپىرىمدەر اسكەري-پاتريوتتىق قوزعالىسى رەسپۋبليكالىق قوعامدىق بىرلەستىگى استانا قالالىق فيليالى توراعاسىنىڭ ورىنباسارى ايدارحان ماحامبەت.
سايىس قورىتىندىسى بويىنشا بايقاۋدىڭ باس جۇلدەسى №51 مەكتەپ-گيمنازيا وقۋشىسى اراي ەراحمەتكە بەرىلدى. ءى ورىندى پەداگوگيكا كوللەدجىنەن دياس مەلس جەڭىپ الدى. ءىى ورىندى №57 ورتا مەكتەبىنەن تەمىربەك قالمەنباي, ناۋشابەك بايازي مەن №52 مەكتەپ-گيمنازياسىنان ءدىنيسلام كوپيروۆ ءبولىستى. ال ءىىى ورىنعا سەرۆيس جانە تۋريزم كوللەدجىنىڭ ستۋدەنتى نارگيز ماليكوۆا, №63 مەكتەپ-گيمنازيانىڭ «ارمانداستار» دومبىراشىلار ءانسامبلى جانە №61 مەكتەپ-ليتسەيىنىڭ وقۋشىسى مانسۇر مۇحامەدجانوۆ لايىق دەپ تانىلدى.
