استانادا جىلدا وسى ۋاقىتتا موتوماۋسىم اشىلۋىن رەسمي تۇردە وتكىزەتىن ەلوردالىق بايكەرلەر بيىل ونى «تازا قازاقستان» ەكواكتسياسى اياسىندا ۇيىمداستىردى. رەسپۋبليكالىق اكتسياعا وسىلايشا قولداۋ ءبىلدىرۋدى ءجون كورگەن ولار موتوشەرۋ باستالار الدىندا تابيعات اياسىندا سەنبىلىككە شىقتى. ءىس-شارانىڭ وتۋىنە قالا اكىمدىگى, قالالىق ىشكى ساياسات باسقارماسى, قالالىق جاستار ساياساتى ماسەلەلەرى جونىندەگى باسقارما مەن قالالىق دەنە شىنىقتىرۋ جانە سپورت باسقارماسى قولداۋ ءبىلدىردى.
ماڭگىلىك ەل جانە قابانباي باتىر كوشەلەرىنىڭ قيىلىسىنداعى №24 Gas energy جانار-جاعار ماي بەكەتى جانىنان باستاۋ العان ءىس-شارا ورتالىق پاركتەگى «ساعات» ەسكەرتكىشى جانىندا جالعاسىن تاپتى. ءۇش بولىكتەن تۇرعان اكتسيا بويىنشا وعان قاتىسۋشىلار الدىمەن نۇرا وزەنى اۋماعىنداعى جەردى قوقىستاردان تازارتتى. ودان ءارى قازاقستاننىڭ جانە اتالعان اكتسيا اياسىنداعى «تازا قازاقستان» تۋلارىن جەلبىرەتىپ, وزدەرىنىڭ كولىكتەرىنە وتىرىپ, تۇران كوشەسىن بويلاي پارككە دەيىن شەرۋلەتىپ ءوتتى, ءسويتىپ بيىلعى موتوماۋسىمدى اشتى.
-ءبىز قالامىزداعى موتوقاۋىمداستىقتىڭ بەلسەندى وكىلدەرىمىز. ادەتتە ءداستۇرلى تۇردە كوكتەمدە كۇن جىلىنعاندا «ەكى اياقتى تۇلپارىمىزدى» شىعارىپ, موتوماۋسىمنىڭ اشىلۋىن وتكىزەمىز. وسى ارقىلى سالاۋاتتى ءومىر سالتىن, كولىك جۇرگىزۋ مادەنيەتىن قالىپتاستىرۋدى ناسيحاتتاپ, جاستاردى سپورتتى سەرىك ەتۋگە شاقىرامىز. ال بيىلعى ەرەكشەلىك – «تازا قازاقستان» اكتسياسىنان تىس قالماي, مەملەكەت باسشىسىنىڭ باستاماسىنا قولداۋ ءبىلدىرۋدى ءجون كورگەنىمىز. قازىرگى تۇرعان جەر – جىلدا وسى موتوماۋسىمدى اشۋ ءۇشىن جينالاتىن تۇراقتى ورنىمىز. جالپى قالادا بايكەرلەرگە قولايلى, ەشكىمگە كەدەرگى كەلتىرمەيتىن بىرنەشە نۇكتە بار. ۇسىنىمىزدى قالا اكىمدىگى قولدادى, مىنە قازىر ەلوردالىق بايكەرلەر نۇرا وزەنى ماڭايىن قوقىستان تازالاپ, ولاردى ارنايى قاپتارعا سالۋدا. جالپى ءبىز ءوزىمىزدى ۇلكەن ءبىر موتو اۋلەتپىز دەپ سانايمىز. ءبىر-ءبىرىمىزدى جاقسى تانيمىز. بۇگىن اشىلۋىنا تەك ەلوردالىق قانا ەمەس وزگە قالالاردان دا موتوتسيكل ايداعاندى جاقسى كورەتىندەر كەلىپ, قاتىسۋدا, – دەيدى ۇيىمداستىرۋشى, 𝗥𝗢𝗔𝗗 𝗕𝗥𝗢𝗧𝗛𝗘𝗥𝗦 𝗠𝗖𝗖 𝗞𝗔𝗭𝗔𝗞𝗛𝗦𝗧𝗔𝗡 كلۋبىنىڭ پرەزيدەنتى سەرىك شالانباەۆ.
استانا قالالىق جاستار ساياساتى جونىندەگى باسقارمانىڭ باس مامانى ەرلان ايدار ەلورداداعى موتوكلۋبتاردىڭ ەكولوگيالىق اكتسياعا وسىنداي جولمەن قولداۋ بىلدىرگەنىنە العىسىن ءبىلدىردى.
-جىل سايىن وتەتىن موتوماۋسىمنىڭ اشىلۋى كەزىندەگى قاۋىپسىزدىك تالاپتارىن قامتاماسىز ەتۋگە ءتيىستى مەكەمەلەر جۇمىلدىرىلدى. موتو شەرۋ كەزىندە ورتالىق پارككە دەيىن پوليتسيا ءپاترۋلى ەرىپ وتىرادى. باسقا دا ءتارتىپ ساقشىلارى, دەنساۋلىق ساقتاۋ مەكەمەلەرى وكىلدەرى ءىس-شارانىڭ دۇرىس, تارتىپپەن وتۋىنە اتسالىسۋدا, – دەيدى ول.
موتوماۋسىمنىڭ اشىلۋىنا ارنالعان ءىس-شارانىڭ ءۇشىنشى بولىگىندە اتالعان پاركتە قالا تۇرعىندارىنا, بالالارعا ارنالعان كوڭىلدى انيماتسيالىق ويىندار, بايقاۋلار, مۋزىكالىق شوۋ ۇيىمداستىرىلىپ, بايكەرلەر ونەر كورسەتتى, بەلسەندى قاتىسۋشىلارعا سىيلىقتار ۇسىنىلدى.
-جاسىم وتىزدا, جەكە كاسىپكەرمىن. بايكەرلىكپەن ءۇش جىلدان بەرى اينالىسامىن. موتوماۋسىمنىڭ اشىلۋى وتە جوعارى دەڭگەيدە وتۋدە. اكىمدىكتىڭ قولداۋى سەزىلىپ تۇر. ەكى اياقتى كولىگىممەن باسقا كۇندەرى دە شارۋالارىمدى بىتىرۋگە شىعامىن, سەبەبى وتە ىڭعايلى, – دەيدى ەلوردالىق بايكەر سەرىك بايگونيشەۆ.
