ەكسپو-2017 كورمەسىنىڭ جاڭعىرمالى ەنەرگيا كوزدەرى سالاسىنىڭ دامۋىنا ىقپالى زور. بۇل تۋرالى وڭتۇستىك افريكا رەسپۋبليكاسىنىڭ ۇلتتىق كۇنىندە سول ەلدىڭ قازاقستانداعى ەلشىسى مەتتيۋس كيتۋمەتتسي مالىمدەدى.
– ەكسپو كورمەسى قازىرگى تاڭدا بۇكىل الەمدى الاڭداتقان ماسەلەنى قوزعاپ وتىر. قازاقستان بالامالى ەنەرگيا كوزدەرى سالاسىندا بىرقاتار جەتىستىككە جەتىپ, الەم ەلدەرىنە ۇلگى كورسەتۋدە. وڭتۇستىك افريكا مەملەكەتى قازاقستانمەن سەرىكتەستىك بايلانىس ورناتىپ, تاريحتا قالاتىن ايتۋلى شاراعا قاتىسۋىن مارتەبە سانايدى, – دەدى ەلشى.
ۇلتتىق كۇن وڭتۇستىك افريكانىڭ تۇڭعىش قارا ءناسىلدى پرەزيدەنتى نەلسون ماندەلانىڭ تۋعان كۇنىمەن تۇسپا-تۇس كەلدى. وار حالىقارالىق قاتىناستار جانە ىنتىماقتاستىق ءمينيسترىنىڭ ورىنباسارى نوماينديا مفەكەتو وڭتۇستىكافريكالىقتار ءۇشىن نەلسون ماندەلانىڭ ورنى ەرەكشە ەكەندىگىن جەتكىزدى.
– بار ءومىرىن ءوز حالقىنا قىزمەت ەتۋگە ارناعان كوشباسشى, شىنداپ كەلگەندە, بۇكىل ادامزاتقا ەڭبەك ءسىڭىردى. بۇۇ باس اسسامبلەياسى 18 شىلدەنى پرەزيدەنتتىڭ الەمدەگى بەيبىتشىلىك پەن حالىقتاردىڭ باس بوستاندىعىنا قوسقان ۇلەسىن باعالاپ, نەلسون ماندەلانىڭ حالىقارالىق كۇنى دەپ جاريالادى. بۇل كۇنى ءاربىر ادام جاقسىلىق جاساۋعا ۇمتىلعانى ابزال, – دەدى نوماينديا مفەكەتو.
1994 جىلدىڭ 10 ماۋسىمىندا نەلسون ماندەلا وار-دىڭ پرەزيدەنتى بولىپ سايلاندى.
سول ۋاقىتتان باستاپ, مەملەكەت ءۇشىن جاڭا ءداۋىر باستالدى دەسە دە بولادى. سەبەبى جاڭا پرەزيدەنت پەن قابىلدانعان جاڭا كونستيتۋتسيا اپارتەيد دەپ اتالاتىن ناسىلشىلدىكتى توقتاتتى.
وڭتۇستىكافريكالىقتار ءوز ەلىندە ەمىن-ەركىن ءجۇرىپ-تۇرۋعا, سايلاۋعا قاتىسۋعا قۇقىعىن الدى. ادامزاتتىڭ ازاتتىعى ءۇشىن كۇرەسكەن ماندەلا ءومىرىنىڭ 27 جىلىن اباقتىدا وتكىزدى.
دەموكراتيا جولىندا تەر توككەن ماندەلا نوبەل سىيلىعىن يەلەندى. سونداي-اق, سالتاناتتى كەشتە «نەلسون ماندەلا ءوزى تۋرالى» اتتى كىتاپتىڭ قازاق تىلىندەگى نۇسقاسى قر سىرتقى ىستەر ءمينيسترى قايرات ابدىراحمانوۆقا تابىستالدى.
گۇلدانا تالعاتقىزى
