استاناداعى ۇلتتىق مۋزەيدە گەرمانيا فەدەراتيۆتىك رەسپۋبليكاسىنىڭ قازاقستانداعى ەلشىلىگىنىڭ ۇيىمداستىرۋىمەن «ءتىلدىڭ كۇشى حالىقتاردى قالىپتاستىرادى» اتتى اعايىندى گريممدەردىڭ ءومىرى مەن شىعارماشىلىعىنا ارنالعان كورمەنىڭ اشىلۋى بولدى.
اتالعان كورمە قازاقستان مەن گەرمانيا فەدەراتيۆتىك رەسپۋبليكاسى اراسىنداعى ديپلوماتيالىق قارىم-قاتىناستىڭ 25 جىلدىعىنا ارنالعان شارا اياسىندا ۇيىمداستىرىلدى.
اعايىندى گريممدەر – نەمىس حالقىنىڭ مادەنيەتىن زەرتتەگەن, لينگيۆيست تۇلعالار. ولاردىڭ «اعايىندى گريمم ەرتەگىلەرى» اتتى جيناعىن كوزىقاراقتى وقىرمان جاقسى بىلەدى. قوس ازامات ومىرلەرىنىڭ سوڭىنا دەيىن العاشقى نەمىس ءتىلى سوزدىگىن شىعارۋمەن شۇعىلداندى.
كورمەنىڭ اشىلۋ سالتاناتىندا ۇلتتىق مۋزەي ديرەكتورىنىڭ مىندەتىن اتقارۋشى اباي ساتۋبالدين ءسوز الىپ, مادەني كەشتىڭ ماڭىزىنا توقتالدى.
شىندىعىندا, اعايىندى گريممدەردىڭ تۋىندىلارى ەشكىمدى بەيجاي قالدىرمايدى. تالانتتىڭ تۇلعالاردىڭ «كۇلشە قىز», «قىزىل تەلپەك», «ۇيقىداعى ارۋ» سەكىلدى الەمگە تانىمال ەرتەگىلەردىڭ يلليۋستراتسيالىق سۋرەتتەرىنەن شالقار شابىت الاسىز. ەكەۋى دە ءار ەلدىڭ ءتىلى مەن پوەزياسىنا ەرەكشە نازار اۋدارىپ, كوپتەگەن حالىقتىڭ ۇلتتىق رۋحىنىڭ جاندانۋىنا, شىعارمالارىمەن ىقپال جاسادى.
شارا بارىسىندا گەرمانيا فەدەراتيۆتىك رەسپۋبليكاسىنىڭ قازاقستانداعى ەلشىسى رولف مافاەل مىرزا دا ءوز ويىمەن ءبولىستى. «بۇگىنگى كورمەنىڭ نەگىزگى يدەياسىنا قازاقستان پرەزيدەنتى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» ماقالاسى سەبەپكەر بولدى. پرەزيدەنت ءوز ماقالاسىندا ءداستۇر مەن رۋحانياتتىڭ ساقتالۋى – ۇلتتىق بىرەگەيلىكتىڭ نەگىزى دەپ ايتقان. ءدال وسىنداي ۇلتتىق مەملەكەت قالىپتاستىرۋ جولىمەن ەۋروپانىڭ كوپتەگەن ەلدەرى ءجۇرىپ ءوتتى. ونىڭ ىشىندە گەرمانيا دا بار. ال, گەرمانيانىڭ ۇلتتىق بىرەگەيلىگىن ساقتاۋدىڭ تامىرىندا اعايىندى گريممدەردىڭ ەرتەگىلەرى جاتىر. مىنە, ءبىز ءسىزدىڭ ەلگە سول ۇلى دانىشپانداردىڭ تۋىندىلارىن اكەلىپ وتىرمىز, – دەپ جينالعاندارعا اقجارما تىلەگىن جەتكىزدى.
كورمە الداعى جىلدىڭ 25 اقپانىنا دەيىن جالعاسادى.
ازامات ەسەنجول
