اعايىندى ورالبايلار اسۋى
قازاقستان رەسپۋبليكاسىنىڭ جازعى سپارتاكياداسىنىڭ بوكس چەمپيوناتىندا نۇر-سۇلتان قالاسىنىڭ كومانداسى ءبىرىنشى ورىندى جەڭىپ الدى.
ءتورت جىلدا ءبىر رەت وتەتىن سپارتاكيادا سايىسىندا بارلىق سپورت تۇرىنەن جارىستار ۇيىمداستىرىلىپ, جالپى جۇلدە سانىنا قاراي ۇزدىك وبلىس نەمەسە قالا انىقتالاتىن بولادى. مىنە, وسىنداي كەشەندى جارىستىڭ بوكس ءتۋرنيرى بيىل قىزىلوردا قالاسىندا ءوتىپ, ونىڭ قورىتىندىسىندا مارات ماناشەۆ جەتەكشىلىك ەتەتىن نۇر-سۇلتان قالاسىنىڭ بوكسشىلارى كوماندالىق ەسەپتە جەڭىس تۇعىرىنىڭ ەڭ بيىك ساتىسىنا كوتەرىلدى. اتاپ ايتقاندا, 10 سالماق دارەجەسىندە وتكەن فينالدىق جەكپە-جەكتىڭ 5-ىندە استانالىق بوكسشىلار چەمپيون اتاندى. الدىمەن, ەڭ جەڭىل سالماقتاعى (49 كەلى) اسحات ءجۇسىپوۆ جەڭىمپاز اتاندى. ول تۇركىستاندىق تاجىريبەلى بوكسشى ەرجان جومارتتى ۇتتى. 52 كەلى سالماقتا ەلوردالىق ازات ماحمەتوۆ قولا جۇلدەگەر اتاندى. وسى جارىستا شارشى الاڭعا شىققاندار ىشىندەگى ەڭ تاجىريبەلى بوكسشىلار 56 كەلى سالماقتىڭ فينالىندا قولعاپ ءتۇيىستىردى. وتە تارتىستى كەزدەسۋدە ماڭعىستاۋلىق نۇربول قالجانوۆ استانالىق ءىلياس سۇلەيمەنوۆتى ۇپاي سانىمەن جەڭىپ كەتتى. 69 كەلىدە سىنعا تۇسكەن مارال قاناعاتوۆ قولانى قاناعات تۇتتى. ال قالعان ءتورت سالماقتا نۇر-سۇلتان بوكسشىلارى ەشكىمگە دەس بەرمەدى. تيمۋر نۇرسەيتوۆ 75 كەلىدە توپ جاردى. جاسوcپىرىمدەر اراسىنداعى وليمپيادا ويىندارىنىڭ چەمپيونى, جاستار اراسىنداعى الەم چەمپيونى دەگەن اتاعى بار, بيىل عانا ەرەسەكتەر جارىسىنا قوسىلا باستاعان اعايىندى نۇربەك پەن ايبەك ورالبايلار 81 جانە 91 كەلىدە سالماقتا چەمپيون اتاندى. ال ەڭ اۋىر سالماقتا (+91 كەلى) ەلوردالىق نۇربولات سەرماحانوۆ التىن مەدال يەلەندى.
سونىمەن 5 التىن, 1 كۇمىس جانە 2 قولا مەدال جەڭىپ العان استانالىقتار قازاقستان رەسپۋبليكاسىنىڭ جازعى سپارتاكياداسى جەڭىمپازى اتاندى. كوماندالىق ەكىنشى ورىندى ماڭعىستاۋ وبلىسى (2-1-1), ال ءۇشىنشى ورىندى تۇركىستان وبلىسىنىڭ (1-1-2) بىلعارى قولعاپ شەبەرلەرى يەلەندى. سونىمەن قاتار الماتى قالاسى مەن اقمولا وبلىسىنان ءبىر-ءبىر چەمپيون شىقتى.