ۇستاز – ۇلى تۇلعا. وسى ءسوزدى كىم ايتسا دا ءبىلىپ ايتقان. بالاعا ءتالىم-تاربيە بەرىپ, ونىڭ ارمان-قيالىن كوككە شارىقتاتاتىن دا ۇستاز. سونداي قۇرمەتكە لايىق جاننىڭ ءبىرى دەپ №34 ورتا مەكتەپتىڭ تەحنولوگيا ءپانى مۇعالىمى مەرەكە اكيشەۆتى ايتار ەدىم.
مەن مەرەكەنى ءبىراز جىلداردان بەرى بىلەمىن. ارتىق سوزگە جوق, مىنەزگە باي, سابىرلى ادام. ناعىز پەداگوگ وسىنداي بولار. بالا جانىن تەرەڭ تۇسىنەدى. ونىڭ ۇستىنە ءوزى اعاشتان ءتۇيىن تۇيگەن شەبەر. حالقىمىزدىڭ ساف ونەرىن بۇگىنگى ۇرپاققا جالعاپ جۇرگەن «التىن كوپىر» دەپ ايتامىن.
مەرەكە اتالعان ءبىلىم ورداسىندا ءبىراز جىلداردان بەرى جۇمىس ىستەيدى. ول وقۋشىلارعا تەحنولوگيا پانىنەن ساباق بەرىپ قانا قويماي, «قازاق قولونەرى» دەگەن ۇيىرمە اشىپ, جەتكىنشەكتەرگە شەبەرلىك ونەردىڭ قىر-سىرىن ۇيرەتەدى. بۇرىنعى بابالارىمىز جاساعان بۇيىمداردى قايتا جاڭعىرتىپ, جاس ۇرپاققا ۇلتتىق ونەردىڭ ءدانىن سەۋىپ كەلەدى. قازىر ونىڭ شاكىرتتەرىنىڭ قولىنان شىققان بۇيىمدار قالالىق, رەسپۋبليكالىق كورمەلەرگە قويىلىپ, كوپشىلىكتىڭ كوڭىلىنەن شىقتى.
جالپى, بۇل ءبىلىم وشاعىندا وقۋشىلاردى كاسىپكە باۋلۋ جاقسى جولعا قويىلعان. ماسەلەن, عاليا جەلەۋبايقىزى, نۇرسۇلۋ بالتاشقىزى, اينۇر جەكسەنبەكقىزى, قورلان بولاتبەكقىزى, گۇلجان ەركىنقىزى دەگەن مۇعالىمدەر تەگىن ۇيىرمە جۇمىستارىن جۇرگىزىپ, بالالاردىڭ ەستەتيكالىق تالعامىن قالىپتاستىرۋعا بەلسەندى ۇلەس قوسىپ كەلەدى.
قازىر وقۋشىلار مەكتەپ قابىرعاسىندا ءجۇرىپ ءبىر كاسىپتى مەڭگەرۋ تۋرالى ءسوز ءجيى ايتىلادى. بۇل باعىتتا اتالعان مەكتەپتىڭ قولعا الىنعان جوبالارى سۇيسىنتەدى. ءبىلىم ۇجىمى 2017 جىلى «كاسىپكەرلىككە دايارلاۋ مەكتەبى» اتتى جوبانى قورعاپ, «سامعاۋ» يننوۆاتسيالىق جوباسىنا ەندى. سايىپ كەلگەندە, مەكتەپ ۇستازدارى وقۋشىلارعا ساپالى ءبىلىم بەرە وتىرىپ, ولاردى كاسىپكەرلىككە نەگىزدەۋ ارقىلى بولاشاعىنا جول كورسەتۋدى كوزدەيدى.
«ءبىزدىڭ ماقساتىمىز – بارلىق بالانى كاسىپكەر قىلىپ شىعارۋ ەمەس, ومىرگە بەيىم, ءوزىن-ءوزى كاسىبي انىقتاي الاتىن باسەكەگە قابىلەتتى تۇلعا تاربيەلەۋ. ءار ۇستاز ءوز شاكىرتىنە سەنىممەن قاراسا عانا بالادان ۇلكەن ادام شىعادى. سوڭعى ەكى جىل ىشىندە وقۋشىلارىمىزدىڭ جۇمىسى قالا جانە رەسپۋبليكالىق كورمەلەرگە ۇسىنىلدى» دەدى مەكتەپ ديرەكتورى ديدار راحيمبەرلينا.
ءسوزىمىزدىڭ باسىندا مەرەكە بالعابايۇلى تۋرالى قىسقاشا عانا ايتتىق. ونداعى نەگىزگى ويىمىز: مۇعالىمدەر كۇنى مەرەكەسىندە ءۇن-ءتۇنسىز, دابىراسىز ەڭبەك ەتىپ, وقۋشىلارعا ۇلتتىق قولونەردىڭ سىرىن ۇيرەتىپ جۇرگەن ۇستاز تۋرالى ءبىر جىلى ءسوز ارناۋ ەدى.
وسپان سۇلەيمەنوۆ,
قر ءبىلىم بەرۋ ءىسىنىڭ ۇزدىگى
