ترانسپلانتاتسيا وتە كۇردەلى وپەراتسيا بولعاندىقتان, ونى كەز كەلگەن مەملەكەت جاساي بەرمەيدى. بەلگىلى ءبىر ەلدىڭ مەديتسيناسى قانداي دەڭگەيدە ەكەنى اعزا اۋىستىرا الاتىنىمەن باعالاناتىنى دا سوندىقتان. قازاقستاندا بۇگىنگە دەيىن وسىنداي 900 وتا جاسالسا, استانادا قالالىق دەڭگەيدەگى العاشقى وپەراتسيا 2013 جىلدىڭ 15 اقپانىندا №1 قالالىق اۋرۋحانادا جاسالدى.
وسى ۋاقىتتان بەرى ەلوردادا 33 ترانسپلانتاتسيا جاسالىپتى. سونىڭ 20-سى – باۋىر اۋىستىرۋ وتاسى ەكەن. №1 قالالىق اۋرۋحانا ماماندارى تاعى ءبىر ترانسپلانتاتسيانى ءساتتى جاساپ, وتانىڭ قالاي وتكەنى جونىندە جۋرناليستەرگە ايتىپ بەردى.
ەرلان بايماعامبەتوۆ اتتى استانالىق تۇرعىن گەپاتيت ۆيرۋسى سالدارىنان باۋىر تسيرروزىنا دۋشار بولعان. اۋرۋدىڭ اسقىنۋى سەبەپتى ونىڭ وڭەشىنەن ءتورت رەت قان كەتىپ, سوڭعى رەت جاعدايى كۇرت ناشارلاپ كەتەدى. ەرلاننىڭ ءومىرىن قۇتقارىپ قالۋدىڭ جالعىز جولى – باۋىرىن اۋىستىرۋ ەدى. اعاسىنىڭ قاسىندا شىرىلداپ جۇرگەن قارىنداسى باۋىرىنا ءوز اعزاسىن ءبولىپ بەرەدى. وسىلايشا, كۇنى كەشە ءومىر مەن ءولىم اراسىندا ارپالىسىپ جاتقان قالا تۇرعىنى وپەراتسيادان ءدىن امان شىعىپ, جۋرناليستەرمەن اڭگىمەلەسىپ تۇردى. اۋرۋحانانىڭ ترانسپلانتولوگيا جانە گەپاتوبيليارلى حيرۋرگيا بولىمشەسىنىڭ مەڭگەرۋشىسى ابىلاي دونبايدىڭ ايتۋىنشا, اعزانى اۋىستىرعاننان كەيىن ادامنىڭ ءومىرى ءبىراز جىلعا ۇزارادى. «ترانسپلانتاتسيانى ەرتە قولعا العان ەۋروپالىق ەلدەردە اعزاسىن اۋىستىرعان ادامنىڭ جاسى ورتا ەسەپپەن 15-20 جىلعا دەيىن ۇزارادى. استانادا بۇل سالا ءالى جاس. ەندى ءبىر ون جىلدا ناتيجەسىن ناقتى كورەتىن بولامىز. بىراق ءبىز اعزاسىن اۋىستىرىپ بەرگەن ادامداردىڭ ءبارى ءدىن امان, جۇمىس ىستەيتىندەرى قىزمەتىنە قايتا ورالعان» دەيدى ول.
ال №1 قالالىق اۋرۋحانا باس دارىگەرىنىڭ ورىنباسارى عاليا ابەجانوۆانىڭ ايتۋىنشا, ەلىمىزدە جىل سايىن 200 اعزا اۋىستىرۋ وپەراتسياسى جاسالادى. ولاردىڭ بارلىعىنا دەرلىك تۋىستارى دونور بولعان ەكەن.
بۇگىندە قازاقستاندا ترانسپلانتاتسياعا مۇقتاج 4 مىڭ ادام كەزەكتە تۇر. ولاردىڭ بارىنە بىردەي دونور تابىلا بەرمەيدى. سەبەبى, حالىقتىڭ بۇل تۋرالى تۇسىنىگى ءالى دۇرىس قالىپتاسپاعان. شىنتۋايتىندا, اياق استىنان ءولىم قۇشقان ءبىر ادام 5-6 ادامنىڭ ءومىرىن قۇتقارا الادى ەكەن. ەگەر دونورعا ەشقانداي زيان كەلمەسە, ورگانىنىڭ جارتىسىن بەرۋگە يسلام ءدىنى دە قارسى ەمەس.
قىمبات توقتامۇرات
