كەشە استانادا س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ 60 جىلدىق مەرەيتويىنا ارنالعان سالتاناتتى شارا ءوتتى. وعان بولگاريا, يتاليا, رەسەي, بەلارۋس, پولشا, گەرمانيا, ۆەنگريا, قىتاي, موڭعوليا ەلدەرىنەن كەلگەن قوناقتار جانە قازاقستانداعى بىرقاتار ەلشىلىكتەر وكىلدەرى قاتىستى. سالتاناتتى شارا «قازاقستان» ورتالىق كونتسەرت زالىندا وتكەن مەرەكەلىك كونتسەرتكە ۇلاستى. ۋنيۆەرسيتەتتىڭ مەرەيتويىنا وراي جوعارى وقۋ ورنىنىڭ رەكتورى, اۋىل شارۋاشىلىعى عىلىمدارىنىڭ دوكتورى, پروفەسسور اقىلبەك كۇرىشباەۆتىڭ ماقالاسىن نازارلارىڭىزعا ۇسىنامىز.
1957 جىلى كسرو مينيسترلەر كەڭەسىنىڭ قاۋلىسىمەن العاش رەت اقمولا جەرىندە جوعارى وقۋ ورنىن قۇرۋ تۋرالى شەشىم شىعارىلدى. سول شەشىمنىڭ نەگىزىندە قازىرگى س.سەيفۋللين اتىنداعى قازاق اگروتەحنيكالىق ۋنيۆەرسيتەتى قۇرىلدى. سوناۋ كەڭەس داۋىرىنەن ۋنيۆەرسيتەتىمىز ارقا توسىندە اۋىل شارۋاشىلىعىنا قاجەتتى ماماندار دايىنداپ, بۇگىنگى تاۋەلسىزدىگىمىزدىڭ جارقىن جىلدارىندا رەسپۋبليكاداعى ىرگەلى جوعارى وقۋ ورنىنا اينالىپ وتىر.
قازىرگى ۋاقىتتا ۋنيۆەرسيتەتتىڭ 9 فاكۋلتەتىندە باكالاۆرياتتىڭ 37 ماماندىعى, ماگيستراتۋرانىڭ 31 ماماندىعى, دوكتورانتۋرانىڭ 19 ماماندىعى بويىنشا 11 مىڭنان استام ستۋدەنت ءبىلىم الۋدا. پروفەسسورلىق-وقىتۋشىلار قۇرامى – 916 ادام. ولاردىڭ 78-ءى عىلىم دوكتورى بولسا, 28-ءى – PhD دوكتورى, ال 376-سى عىلىم كانديداتى دارەجەسىنە يە.
60 جىلدىق تاريحىندا وقۋ ورنىمىزدان اۋىل شارۋاشىلىعى سالاسى بويىنشا 65 مىڭنان استام مامان ءبىلىم الىپ شىقسا, ولاردىڭ بارلىعى دەرلىك ەلىمىزدىڭ ءار وڭىرىندە بەلدى قىزمەتتەر اتقارىپ ءجۇر. اراسىنان كوپتەگەن جەتەكشى عالىمدار, اۋىل شارۋاشىلىعى ءوندىرىسىنىڭ ءىرى ۇيىمداستىرۋشىلارى, سوتسياليستىك ەڭبەك ەرلەرى مەن قازاقستاننىڭ ەڭبەك ەرى, ەلىمىزدىڭ قوعام جانە ساياسي قايراتكەرلەرى شىققان.
ءوز كەزەڭىندە ۋنيۆەرسيتەت عالىمدارىنىڭ دالەلدەمەلەرى نەگىزىندە قازاقستان استىعىن ەكسپورتتاۋ ماسەلەسى جونىندەگى تىڭ باستامالار جۇزەگە اسىرىلدى. سول دايەكتەمەلەر ناتيجەسىندە ەلىمىز استىق ەكسپورتى بويىنشا الەمنىڭ كوشباسشى ەلدەردىڭ بىرىنە اينالدى. ۋنيۆەرسيتەتىمىز تاۋەلسىز قازاقستان ەكونوميكاسىنىڭ اگرارلىق سەكتورىن قالىپتاستىرىپ,
دامىتۋعا تەڭدەسسىز ۇلەس قوسىپ كەلە جاتقانىن ماقتانىشپەن ايتا الامىز.
2014 جىلى وقۋ ورنىمىزدى زەرتتەۋ ۋنيۆەرسيتەتىنە كوشىرۋ جۇمىستارىن باستادىق. ءبىز بۇل باعىتتا اگرارلىق ءبىلىم مەن عىلىم سالاسىندا الەمدە كوشباسشى بولىپ سانالاتىن چيلي, مالايزيا, ۆەتنام جانە قىتاي ەلدەرىنىڭ اگرارلىق ءبىلىم مەن عىلىم جۇيەسىن زەرتتەپ, وڭ تاجىريبەگە يە بولعان دەۆيستەگى (اقش) كاليفورنيا زەرتتەۋ ۋنيۆەرسيتەتىمەن سەرىكتەستىك بايلانىس ورناتتىق. العاشقى قادامىمىز وقىتۋشىلارىمىزدى اتالعان وقۋ ورنىنىڭ جانە الەمدەگى باسقا دا جەتەكشى ۋنيۆەرسيتەتتەردىڭ بازاسىندا وقىتۋدان, ولاردى تاعىلىمدامادان وتكىزۋدەن باستالدى.
ءبىز شەتەلدىك پروفەسسورلاردىڭ تىكەلەي كومەگىمەن جانە ەڭبەك نارىعىنداعى سۇرانىستاردى ەسكەرە وتىرىپ, جاڭادان 6 ءبىلىم بەرۋ باعدارلاماسىن ازىرلەدىك, ال كەلەشەكتە 62 ءبىلىم باعدارلاماسىن ازىرلەۋ جانە ەنگىزۋ مىندەتى تۇر. وقىتۋ جۇيەسىنىڭ تاجىريبەگە باعىتتالۋىن كۇشەيتتىك. ستۋدەنتتەردىڭ وندىرىستىك ءىس-تاجىريبەسىنىڭ ۇزاقتىعى
3 ايدان 7 ايعا دەيىن ۇزارتىلدى, اۋىلشارۋاشىلىعى ماماندىقتارى بويىنشا وقۋ ۇدەرىسى جازعى ماۋسىمعا اۋىستىرىلدى, ياعني اۋىلشارۋاشىلىق جۇمىستاردىڭ
ماۋسىمىمەن ۇيلەستىرىلدى.
سوڭعى جىلدارى 58 ءبىلىم بەرۋ باعدارلاماسى ءۇش تىلدىلىككە كوشىرىلدى. بۇل باعىت بويىنشا 126 وقىتۋشى نەمەسە پروفەسسورلىق-وقىتۋشىلار قۇرامىنىڭ 14 پايىزى اعىلشىن تىلىندە ءدارىس بەرەدى. وسى ءبىر تىڭ وزگەرىستىڭ ارقاسىندا عىلىممەن اينالىساتىن وقىتۋشىلار مەن ستۋدەنتتەردىڭ سانى ەكى ەسەگە ءوسىپ وتىر. ناتيجەسىندە Web of Science باسىلىمدارىندا شىققان عىلىمي تالدامالىق ماقالالار سانى 18 ەسەگە كوبەيدى. مۇنى ۋنيۆەرسيتەتىمىز عىلىمي-تاجىريبەلىك باعىتقا بەت بۇرعاندىعىنىڭ ايقىن دالەلى دەپ بىلگەن ابزال.
بىرنەشە جىلدىڭ ىشىندە ۋنيۆەرسيتەتكە شامامەن 1,1 ملرد تەڭگە كولەمىندە ينۆەستيتسيا تارتىلىپ, جاڭا ءبىلىم مەن تەحنولوگيالاردى ترانسفەرتتەۋ مەن بەيىمدەۋدىڭ ءتورت حالىقارالىق ورتالىعى اشىلدى. ايتىلعان شارالاردىڭ ناتيجەسىندە ءبىزدىڭ وقۋ ورنىمىز الەمدىك QS رەيتينگى بويىنشا دۇنيە ءجۇزىنىڭ ۇزدىك 800 ۋنيۆەرسيتەتى جانە QS EECA رەيتينگى بويىنشا شىعىس ەۋروپا مەن ورتالىق ازيانىڭ ۇزدىك 200 جوو قاتارىنا كىردى. بۇل – الەمدىك دەڭگەيدەگى ءبىلىم مەن عىلىمدى جان-جاقتى ۇشتاستىرىپ وتىرعاندىعىمىزدىڭ ايعاعى.
قازاتۋ بازاسىندا زەرتتەۋ ۋنيۆەرسيتەتىن قۇرۋ ەلىمىزدىڭ اگروونەركاسىپتىك كەشەنىن دامىتۋدىڭ 2017-2021 جىلدارعا ارنالعان مەملەكەتتىك باعدارلاماسىندا قاراستىرىلعان. قازىرگى تاڭدا ۋنيۆەرسيتەتتىڭ دامۋ باعدارلاماسى ازىرلەنىپ, مۇددەلى مينيسترلىكتەردىڭ قولداۋىنا يە بولىپ وتىر. باعدارلامانى ىسكە اسىرۋدىڭ ءىس-شارالار جوسپارى اۋىل شارۋاشىلىعى ءمينيسترىنىڭ بۇيرىعىمەن بەكىتىلىپ, ونى ۋنيۆەرسيتەت ۇجىمى جۇزەگە اسىرۋعا كىرىسىپ تە كەتتى. الداعى ۋاقىتتا وسى باعدارلامالاردىڭ وڭ ناتيجەسىن كورەمىز دەگەن سەنىم مول.
اقىلبەك كۇرىشباەۆ,
س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ رەكتورى, اۋىل شارۋاشىلىعى عىلىمدارىنىڭ دوكتورى, پروفەسسور
