جۋىردا ج.ايماۋىتوۆ اتىنداعى پاۆلودار وبلىستىق قازاق مۋزىكالىق-دراما تەاترى ەلورداعا گاسترولدىك ساپارمەن كەلىپ كەتتى. ونەر ۇجىمى استانالىقتار جانە قالا قوناقتارىنا «جاستار» تەاترىنىڭ ساحناسىندا ي.ءميچچيدىڭ «سيمبا» ەرتەگىسىن, اقيىق اقىن مۇقاعالي ماقاتاەۆتىڭ ءومىرى مەن شىعارماشىلىعىنان سىر شەرتەتىن «ەسىڭە مەنى العايسىڭ» مۋزىكالىق-پوەتيكالىق كەشىن جانە ج.الىكەننىڭ «قىزىل گۇلدەر» ەلەگياسىن ۇسىندى.
«سيمبا» ەرتەگىسى «ۋولت ديسنەي» كومپانياسىنىڭ ايگىلى «ارىستان پاتشا» ءمۋلتفيلمى جەلىسىمەن ساحنالاندى. ەرتەگىنىڭ قويۋشى رەجيسسەرى – ادىلەت اقانوۆ, قويۋشى سۋرەتشى – راۋان ۇلىقپان. سيمبا ەسىمدى الاننىڭ حيكايالارىن وتىز جىلعا جۋىق بالالار قىزىعىپ قاراۋدا. ەرتىس-بايان ءوڭىرىنىڭ ونەرپازداردى وسى ءمۋلتفيلمدى ەرتەگىگە اينالدىردى. اتالمىش ەرتەگى بالالارعا جاڭا جىلدىق بازارلىق رەتىندە وتكەن جىلدىڭ جەلتوقسانىندا ساحنالاندى.
«ەسىڭە مەنى العايسىڭ» مۋزىكالىق-پوەتيكالىق كەشىنىڭ پرەمەراسى دا وتكەن جىلى ءوتتى. اتالمىش قويىلىم تاۋەلسىزدىكتىڭ 30 جىلدىعى مەن مۇقاعالي ماقاتاەۆتىڭ 90 جىلدىعىنا ارنالدى. قويىلىمدا اقيىق اقىنمەن قاتار ونى قاپىدا قازا بولعان قىزى مايگۇلدىڭ, پوەزيا پاديشاسى فاريزا وڭعارسىنوۆانىڭ بەينەلەرى بار. ايماۋىتوۆ تەاترى بيىلعى جاڭا ماۋسىمدى ءدال وسى كەشپەن اشتى. كەشتىڭ ءبىر ەرەكشەلىگى – باسىنان اياعىنا دەيىن تەاتردىڭ سيمفونيالىق وركەسترىنىڭ سۇيەمەلدەۋىمەن وتەدى, ال ستسەناري اۆتورى – وسى مادەني وشاقتىڭ ادەبيەت ءبولىمىنىڭ مەڭگەرۋشىسى نۇركەن تۇرلىبەك, قويۋشى رەجيسسەرى – ەرجان قاۋلانوۆ.
وسى ەرجان قاۋلانوۆ قويعان «قىزىل گۇلدەر» ەلەگياسى قازىرگى قوعامداعى وزەكتى الەۋمەتتىك ماسەلەلەردى قوزعايدى. اسىرەسە, اتا-انا مەن بالا اراسىنداعى قارىم-قاتىناسقا, بالا تاربيەسىنە نازار اۋدارادى. قويىلىمدا ءبىر ءۇيدىڭ بەس قىزى مەن كۇيبەڭ تىرلىكپەن ءجۇرىپ, پەرزەنتتەرىنە كوڭىل بولۋگە مۇرشالارى اتا-انا ءومىرى كورسەتىلەدى.
گاسترولدىڭ سوڭىندا: «ەلوردامىزدىڭ تورىندە, «جاستار»
تەاترىنىڭ ساحناسىندا 30 جىلدان استام تاريحى بار ەرتىس-بايان ءوڭىرىنىڭ جۇسىپبەك ايماۋىتوۆ اتىنداعى پاۆلودار وبلىستىق قازاق مۋزىكالىق-دراما تەاترىنىڭ ونەرىن تاماشالاپ, ءبىر راحاتتانىپ قالدىق. سپەكتاكلدەر جۇرەككە جەتىپ, تەبىرەنتتى, – دەگەن «جاستار» تەاترىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ يەگەرى ءادىل احمەتوۆ ءوزىنىڭ جانە ەلوردالىق كورەرمەن اتىنان ۇجىمعا العىس ايتتى.
