م.گوركي اتىنداعى مەملەكەتتىك اكادەميالىق ورىس دراما تەاترى يتاليالىق دراماتۋرگتەر, نوبەل سىيلىعىنىڭ لاۋرەاتى داريو فو مەن فرانكا رامەنىڭ «مەن سەنى كۇتەمىن, سۇيىكتىم» پەساسى جەلىسىمەن «ومىردە نە جەتپەيدى؟» قويىلىمىنىڭ پرەمەراسىن ۇسىندى. سپەكتاكلدى رەسەيدەن شاقىرىلعان رەجيسسەر تاتيانا زاحاروۆا ساحنالادى.
جالپى قويىلىمعا بىرنەشە ەلدىڭ ماماندارى اتسالىستى. قويۋشى سۋرەتشى ەكاتەرينا ۆيتكوۆسكايا – ماسكەۋدەن, كوستيۋمدەر بويىنشا سۋرەتشى زۋحرا مۇحامبەتوۆا – بىشكەكتەن, ال پلاستيكا رەجيسسەرى روزا بەلگىباەۆا – نۇر-سۇلتان قالاسىنان. ايەلدەر ساحنالاعان قويىلىمدا ءۇي شارۋاسىنداعى ايەلدىڭ ءومىرى تۋرالى باياندالادى. باس كەيىپكەر بەينەسىن بەلگىلى اكتريسا سۆەتلانا فورتۋنا سومدايدى.
قىزى بويجەتىپ, «ءوزى بولىپ, توركىنىن تانىماي كەتكەن», ەمشەكتەگى ۇلىن جانە جول اپاتىنا ءتۇسىپ, ارباعا تاڭىلعان قايناعاسىن باعىپ وتىرعان ايەل ناعىز ماحابباتتى اڭسايدى. قىزعانشاق كۇيەۋى ايەلىن پاتەردەن شىعارماي قاماۋدا ۇستاپ, قيت ەتسە جۇدىرىق الا جۇگىرەدى. وسىنداي ومىردەن شارشاعان باس كەيىپكەر ارقىلى وتباسىندا بولاتىن پروبلەمالار, ايەلدىڭ وتباسىنداعى ورنى اشىلادى.
جاس بويىنشا شەكتەۋ قويىلعان, 18 جاسقا تولعاننان كەيىن عانا كورۋگە بولاتىن قويىلىمعا بار بولعانى ءۇش اكتەر قاتىسادى. سۆەتلانا فورتۋنامەن قاتار دانيل حومكو مەن دميتري ماشتاكوۆ كەيىپكەرلەردى كەيىپتەيدى. تۇرمىستىق زورلىق-زومبىلىق ماسەلەسى قوزعالادى.
ارينە, وتباسىندا تۋىندايتىن جانجالعا كۇيەۋى دە, ايەلى دە كىنالى. ەر ادام ءسۇيىپ العان جارىنا دۇرىس كوڭىل بولمەيدى. ايەل بولسا جىلۋلىقتى اڭسايدى. اقىرى وزىنە اعىلشىن ءتىلىن ۇيرەتكەن جاس مۇعالىمنىڭ قۇشاعىنا قۇلاپ, كۇيەۋىنىڭ كوزىنە ءشوپ سالادى. وسىنداي شىم-شىتىرىق وقيعانىڭ فينالى ەكى ءتۇرلى ويعا قالدىرادى. سپەكتاكلدىڭ سوڭىنداعى ايەلدىڭ ارەكەتىنەن وزىنە-ءوزى قول سالدى نەمەسە بۇرىنعى ءومىرىن تاستاپ, جاڭا ءومىر باستادى دەپ ويلاۋعا بولادى. بۇل تۇرعىدان اكتريسا سۆەتلانا فورتۋنانىڭ ويىن شەبەرلىگىن, قويۋشى رەجيسسەردىڭ قويىلىم ءتۇيىنىن تۇيۋگە كورەرمەندەرگە قالدىرعانىن اتاپ وتۋگە بولادى.
