«استانا وپەرا» تەاترىنىڭ جەتەكشى ءسوليسى, قازاقستاننىڭ ەڭبەك سىڭىرگەن قايراتكەرى ايگەرىم بەكەتاەۆا تمد-نىڭ «دەبيۋتتەر دوستاستىعى» جاستار سىيلىعىنىڭ لاۋرەاتى اتاندى. ماراپاتتى سالتاناتتى تاپسىرۋ ءراسىمى كەشە بەلارۋس ەلىندەگى برەست اكادەميالىق تەاترىندا ءوتتى.
بۇل سىيلىققا قازاقستان, رەسەي, ازەربايجان, ارمەنيا, بەلارۋس, قىرعىزستان, مولدوۆا, تاجىكستاننان 26 نومينانت ۇسىنىلدى. سولاردىڭ ىشىندە دوستاستىق ەلدەردىڭ سەگىز ونەرپازىنا حالىقارالىق قازىلاردىڭ شەشىمىمەن بەرىلدى. ايتا كەتەيىك, جاستار سىيلىعى تمد-دا مادەنيەت جىلى دەپ جاريالانعان 2018 جىلدىڭ قورىتىندىسى بويىنشا شىعارىلدى.
– بۇل مەنىڭ شىعارماشىلىعىما بەرىلگەن جوعارى باعا دەپ ويلايمىن. ءارتىس ءۇشىن ساحناعا شىعۋ – ۇلكەن باقىت. جانە ورىنداۋشىلىق شەبەرلىكتىڭ جاڭا قىرلارى اشىلادى. مۇنداي ماراپات ءبىزدى جاڭا بەلەستەردى باعىندىرۋعا شابىتتاندىرادى. كلاسسيكالىق ءبيدى جانى جاقسى كورەتىن بارلىق كورەرمەنىمە راقمەت ايتامىن! – دەدى ايگەرىم بەكەتاەۆا.
«دەبيۋتتەر دوستاستىعى» حالىقارالىق سىيلىعى تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ گۋمانيتارلىق ىنتىماقتاستىق جونىندەگى كەڭەسى جانە
حالىقارالىق گۋمانيتارلىق ىنتىماقتاستىق قورىمەن قۇرىلعان. قۇرىلتايشىلارمەن انىقتالاتىن گۋمانيتارلىق سالاداعى سىيلىق جىل سايىن جاس ماماندارعا (35 جاسقا دەيىن) تابىس ەتىلەدى. بۇعان دەيىن بۇل ماراپاتتى عالىمدار, اقىندار, دارىگەرلەر, ۇستازدار يەلەندى.
كەشەگى وتكەن برەستتەگى سالتاناتتى راسىمدە شىمكەنت قالاسى قۇرمەتتى مارتەبە ەستافەتاسىن قابىلداپ, 2020 جىلى دوستاستىقتىڭ مادەني استاناسىنا اينالادى.
