استانادا 71-ءىنشى كانن فەستيۆالىنىڭ «ەڭ ۇزدىك ايەل بەينەسى» جۇلدەسىنىڭ يەگەرى سامال ەسلياموۆانىڭ ءباسپاسوز ءماسليحاتى ءوتتى. جيىنعا مادەنيەت جانە سپورت ءمينيسترى ارىستانبەك مۇحامەديۇلى قاتىستى. اپپاق كويلەكتى ارۋ قاسىمىزعا اقىرىن عانا كەلدى. الدىنداعى 30-40 ديكتوفونعا ءتىل قاتتى سوسىن. ءۇنى جارىقشاقتانا شىقتى. اۋزىنان قاتتى قۋانىپ تۇرمىن دەگەن ءسوز شىققان جوق مۇلدە. جاي عانا «قۋانىشتىمىن» دەدى. تارباعاتايدى توعىز اينالىپ, قولىنداعى سىيلىققا جەتكەن جان سياقتى جايباراقات.
مينيستر سامالدىڭ جەڭىسىن وليمپيادا ويىندارىنان دا جوعارى باعالادى. كانندا الەمدى وزىنە قاراتقان ارۋدىڭ قازاقشا سويلەگەنىنە قۋانعانىن جەتكىزدى. سامالعا قازاقتىڭ زەرلى شاپانى جابىلدى. قىزدىڭ سۇلۋلىعىمەن استاسىپ, ناركەس كوزدەرىمىز قارىقتى.
«اكتريسا بولۋ ارمانىم ەمەس ەدى» دەدى سىبىرلاي سامال. وعان ءومىردىڭ ءوزى اكەلىپتى. «بۇل كاننعا جەتى جىل تەر توكتىم» دەدى اقىرىن عانا. ونىڭ الدىندا 12 جاسىندا «قىزعالداق» فيلمىندە ويناعان. قازاق قىزى تۋرالى. ەندىگىسى – قىرعىز ارۋدىڭ تاعدىرى. بالاسىن تاستاپ كەتەتىن تاسجۇرەك ەكەن. اق قار, كوك مۇزدا تابانىنان وتكەن سىزدان وكشەسى جارىلىپتى. سۋىق قارىپ, جىلاپتى.
فيلمدەگى انا ءرولى – سامالدىڭ جان جۇرەگىندەگى وبرازى. بۇعان دەيىن دە بىرنەشە انانى ويناعان. ەندى ومىردە انا بولعىسى كەلەدى.
سامالدى تانىعان رەجيسسەر سەرگەي دۆورتسەۆوي دا ءبىزدىڭ توپىراقتان. ءوزىمىزدىڭ شىمكەنتتە تۋعان. رەجيسسەردىڭ اكە-شەشەسى ءالى دە شىمقالادا تۇرادى. «ايكانىڭ» رەجيسسەرى «قازاقفيلمگە» شاقىرىلعانىنا قۋاندىق. ول دا «ەندىگى جەردە قازاققا قىزمەت ەتۋگە دايىنمىن» دەپ كەسىپ سويلەدى.
كاننعا دەيىن اكتريسا الەمدىك رەجيسسەردەن شاقىرتۋ العان. جۇلدەلى بولعان سوڭ دات كينوگەرلەر قىزىعىپتى. سامالعا «ءوزىڭىزدى قاي جەردە ەركىن سەزىنەسىز؟ كينودا قانداي بيىكتى تاعى باعىندىراسىز؟» دەگەن ساۋالعا «قازاقستاندا» دەپ جىميىپ جاۋاپ بەردى. «بۇل – مەن ءۇشىن ۇلكەن جەتىستىك. توقتاپ قالمايمىن. وسى سالادان كەتپەيمىن. ەسىمىمنىڭ ءوزى قوزعالىستى بىلدىرەدى. شىڭعا بىتكەن شىنار بوپ تۇرا بەرەمىن» دەدى. سامالدىڭ بەينەسى – قىرىق شىراقتى ايەلدىڭ بولمىسى. ءمۇجىلىپ, تاۋسىلىپ كەتپەيدى. ءومىردىڭ شىڭ-قۇزى شىناردى تەڭسەلتۋى مۇمكىن. تۇبىرىنەن جۇلىپ كەتە المايدى تەك. مۇنى سولتۇستىكتە كوللەدجدى تاۋىسىپ, گيتيس-كە تۇسكەن شىناشاقتاي كەزىندە-اق بايقاتقان.
ول سابىرلى ەكەن. شي جۇگىرتكەن سۇراقتارعا دا سالماقتى جاۋاپ بەردى. قازاقشا قىسىلماي سويلەدى.
يران رەجيسسەرىنىڭ كينولارىن ۇناتادى ەكەن. ال كانندا جۇمىسى ەكرانعا شىقپاي جاتىپ, باستاپقى نۇسقاسى بايگەگە تۇسكەن. دۆورتسەۆويدىڭ ايتۋىنشا, كينونىڭ مونتاجى, تولىق جۇمىسى ءبىر جارىم ايدان سوڭ عانا اياقتالادى. الەمنىڭ تۇكپىر-تۇكپىرى مەن قازاقستاندىق كورەرمەن «ايكانى» تەك كۇزدە عانا كورە الادى.
قۇشاعى قاتتى حالىقتىڭ ۇلى ەكەنىمىزدى تاعى بايقاتتىق. بەكزات ءباھادۇر جەڭىسپەن ورالعاندا دا سويتكەنبىز. ىستىق ەموتسيانى سالقىن اقىلعا جەڭدىرە المايمىز عوي سول! جۋرناليستەر جامىراي مازالادىق.
سامالدىڭ ۇزدىك ويىنىنان كەيىن بالا تاستاۋ تىيىلاتىن شىعار. بالا اسىراپ العىسى كەلەتىندەر كوپ قوي. سولارعا ناقتى وي سالدى سامال. سول ءۇشىن دە راقمەت, سابىرلى سۇلۋ!
