ايماقتار تارتۋى — استاناعا
قازاقتىڭ كىندىك قالاسىنداعى ناۋرىز تويىنا ەلىمىزدىڭ بىرنەشە ايماقتارىنان ارنايى دەلەگاتسيا كەلەدى. ولار استانالىق اعايىندى اسەم ءان مەن ءتاتتى كۇيگە بولەپ قانا قويماي, وزدەرىندە شىعارىلاتىن ونەركاسىپ, اۋىل شارۋاشىلىعى, قولونەر ونىمدەرىنىڭ جارمەڭكەسىن وتكىزەدى.
ەلوردامىز ادەمى كۇيگە ەنۋدە
ۇلىستىڭ ۇلى كۇنىن قارسى الۋعا بيىلعى دايىندىق توتەنشە جوعارى دەڭگەيدە ەكەنىن استانا كوشەلەرىنىڭ اجارىنان تانيسىڭ. قالانى مەرەكەلىك بەزەندىرۋدى بۇل جولى اۋداندىق اكىمدىكتەر «AdvArt» سىرتقى جارناما اگەنتتىگىنە تاپسىرعان.
– قالانىڭ ورتالىق كوشەلەرىندە 28 بيلبورد, 72 پيلون, 25 روتوندا, 10 ەكسترۋدەر مەرەكەلىك ناقىشتا بەزەندىرىلدى. «قازاق ەلى», «بايتەرەك» مونۋمەنتى سياقتى ماڭىزدى الاڭدارعا ءتۇرلى-ءتۇستى جالاۋلار ىلىنەدى, ال «اراي», «جەرۇيىق» ساياباقتارىنىڭ الدىندا كوكتەمگى تابيعاتتىڭ جاڭعىرۋىن ايشىقتايتىن جالاۋلى پاننولار قويىلماق. وعان ءتۇرلى فورمادا دەكوراتيۆتى جارىق ەلەمەنتتەرىمەن بەزەندىرىلگەن كوشەدەگى شامداردى, شاعىن گۇلزارلار مەن تال-تەرەكتەردى, كوپىرلەردى, سۋبۇرقاقتاردى قوسىڭىز. ءۇش جەردە – وقۋشىلار سارايىنىڭ الدىندا, ءتۇركىستان ءجانە دوستىق كوشەلەرىنىڭ قيىلىسىندا, «كەرۋەن» سوو ماڭايىندا «اۋىل» كومپوزيتسياسى ورناتىلدى. قالانىڭ كولىك ءنوپىرى كوپ 15 كۇرەجولىنا جانە 4 كوپىرىنە قۇتتىقتاۋ ءسوزى بار, جارىقپەن بەزەندىرىلگەن اركالار جاسالىندى جانە كىسى اياعى كوپ ءجۇرەتىن كوشە قيىلىستارىنا قىزعالداق, ءتورت تۇلىك سياقتى ناۋرىز نىشاندارىن بەينەلەيتىن شاعىن ارحيتەكتۋرالىق فورمالار قويىلدى, – دەپ حابارلايدى اتالمىش جارنامالىق-ءوندىرىستىك كومپانيانىڭ ديرەكتورى يان ۆيكتوروۆيچ.
جالت-جۇلت جارىق شوۋى
بيىلعى ناۋرىز مەيرامى استانا تۇرعىندارى مەن قوناقتارى ءۇشىن قالانى ەرەكشە ءسان-سالتاناتقا بولەيتىن جارىق-شاشۋ شوۋىمەن باستالاتىن بولىپ وتىر. بۇل كورىنىستى جارىقتاندىرۋ سالاسىنىڭ الەمگە ايگىلى ديزاينەرى كۋرت ۆەرميۋلەن استانا قالاسى اكىمدىگىنىڭ شاقىرۋىمەن كەلىپ كورسەتپەكشى. جارىق شوۋى 2013 جىلدىڭ 20 ناۋرىزىندا ساعات 21.00-دە ەلوردامىزدىڭ ادەمى جەرلەرىندە كورسەتىلمەكشى.
ادەمىلىگى جاعىنان تاڭعاجايىپ بۇل كورىنىس كورەرمەندەردى ايرىقشا اسەرگە ءبولەيتىنى ءسوزسىز. ديزاينەردىڭ جارىق بەرۋدەگى وزىندىك شىعارماشىلىق قابىلداۋى, ساۋلەتتىك جوبالارعا قاتىستى ەموتسيونالدىق ءجانە يننوۆاتسيالىق كوزقاراستارى, سونداي-اق, پراگماتيكالىق, پەرفەكتسيونيستىك جانە تەحنيكالىق ءبىلىمىن كوركەمدىك ءادىستە پايدالانۋى مەن اۆتوردىڭ وي-قيالىنىڭ جەمىسى وسىنداي كەرەمەت ونەر جاساۋعا مۇمكىندىك بەرەدى.
جارىق شوۋى – ناۋرىز مەيرامى مەرەكەسىنە ارنالعان سالتاناتتى ءىس-شارالاردىڭ وزىندىك ءبىر باستاۋى. بيىلعى جىلى استانا قالاسىنىڭ 15 جىلدىعى قارساڭىندا, قالامىزدا شىعىس جاڭا جىلىن ويداعىداي تويلاۋ ءۇشىن رەسپۋبليكانىڭ بارلىق ايماقتارىنان دەلەگاتسيالار كەلەدى. قاز-قاتار كيىز ۇيلەر تىگىلىپ, حالىقتىق كوپشىلىك سەرۋەنگە بۇكىل قالا تۇرعىندارىنىڭ قاتىسۋىن قامتيدى.
سونىمەن, ەرتەڭ كەشكە قاراي استانادا جارىق-شاشۋ دۋمانى باستالىپ, جۇرتشىلىقتى ناۋرىز مەيرامىنىڭ قىزىعىنا شاقىراتىن بولادى. ادەمىلىگى جاعىنان تاڭعاجايىپ بۇل كورىنىس استانالىقتار مەن ەلوردا قوناقتارىن ايرىقشا اسەرگە بولەيتىنى ءسوزسىز. ولاي بولسا, كوشەگە شىعىپ, كەرەمەت كورىنىستى تاماشالايىق, اعايىن, دەمەكپىز.
ايماقتار جارمەڭكەسىنە اسىعىڭىزدار!
ۇلىستىڭ ۇلى كۇنى جاقىنداعان سا-يىن استانادا مەرەكەگە دايىندىق جۇمىستارى قىزا تۇسۋدە.
كەشە قالالىق اكىمدىك مەرەكەلىك شارانى تويلاۋعا قاتىستى ماڭىزدى مالىمەت تاراتتى. ناۋرىز تويىنىڭ ەڭ اۋقىمدى باعدارلاماسى «قازاق ەلى» مونۋمەنتى الدىنداعى الاڭدا وتپەكشى. بۇل شارانىڭ ەرەكشەلىگى اقمولا, پاۆلودار, سولتۇستىك قازاقستان, قىزىلوردا, الماتى وبلىستارىنان جانە باسقا وڭىرلەردەن كەلگەن كاسىپورىندار ءوز ونىمدەرىن ساتىلىمعا شىعاراتىن بولادى. سونداي-اق, وبلىستاردان كەلگەن وكىلتوپ ارنايى شاتىر تىگىپ, وندا استانالىقتارعا ارناپ داستارقان جايۋدى دا جوسپارلاپ وتىر.
استانا قالاسى كاسىپكەرلىك جانە ونەركاسىپ باسقارماسىنىڭ حابارلاۋىنشا, جۇزدەن استام ونەركاسىپ ورىندارى قاتىساتىن بۇل شارادا 150 تونناداي ءونىم ساتىلىمعا شىعارىلماقشى. اتاپ ايتقاندا, جارمەڭكەگە 3 توننا ەت ونىمدەرى, 22 توننا شۇجىق, 20 توننا ءسۇت ونىمدەرى, 15 توننا كۇنباعىس مايى, 1 جارىم توننا جۇمىرتقا, جارتى توننا ساڭىراۋقۇلاق, 15 تونناداي نان جانە كونديتەر ونىمدەرى, 3 توننا كامپيت, 3 توننا توساپ, 1جارىم تونناداي قيار, 3 توننا قىمىز, 1 توننا شۇبات, 2 توننا بال, 2 توننا مينەرالدى سۋسىن, 4 توننا شىرىن, 3 توننا بالىق ونىمدەرى, 15 توننا كۇرىش پەن جارما, تاعى باسقا ازىق-تۇلىك ونىمدەرى جەتكىزىلمەكشى. سونىمەن قاتار, ون بەس شاقتى قوعامدىق تاماقتانۋ كاسىپورىندارى دا قاتىسپاقشى. ال, ورتالىق الاڭدا وتەتىن مەرەكەلىك شارادا وننان استام, «اتامەكەن – قازاقستان كارتاسى» ەتنو-مەموريالدى كەشەنى ماڭىندا ەكى مەيرامحانا, ءدامحانا ۇجىمى قىزمەت كورسەتەدى.