«استانا» كونتسەرت زالىندا «اينالايىن» بالالار حورىنىڭ 20 جىلدىعىنا وراي «ابىرويى اسقاق, «اينالايىن!» اتتى شىعارماشىلىق كەشى ءوتتى. جاستار جىلىنىڭ اياسىندا وتكەن كونتسەرتتى قالالىق ءبىلىم باسقارماسى مەن №2 ونەر مەكتەبى ۇيىمداستىردى.
قوستاناي قالاسىندا قۇرىلىپ, ەلورداعا كوشكەن «اينالايىن» بالالار حورى باس قالادا وتەتىن ماڭىزدى شارالاردان تىس قالعان ەمەس. ماسەلەن, VII قىسقى ازيا ويىندارىنىڭ اشىلۋ سالتاناتىنا, تاۋەلسىزدىگىمىزدىڭ 20 جىلدىعىنا ارنالعان مەرەكەلىك شاراعا قاتىستى.
رەسپۋبليكالىق جانە حالىقارالىق بايقاۋلاردا تالاي رەت توپ جاردى. اتاپ ايتقاندا, بىلتىر
يسپانيانىڭ للورەت دە مار قالاسىندا ۇيىمداستىرىلعان «Fiestalonia – Mediterranean Legends» حالىقارالىق بايقاۋىندا ءبىرىنشى ورىندى يەلەندى.
حورعا №2 ونەر مەكتەبىنىڭ ديرەكتورى, مادەنيەت سالاسىنىڭ ۇزدىگى گۇلميرا جانگەلدىقىزى جەتەكشىلىك ەتەدى. «اينالايىن» بالالار حورىنىڭ باستى ماقساتى – قازاق تىلىندەگى بالالارعا ارنالعان اۆتورلىق اندەردى ورىنداۋ جانە بالالار اندەرىن ناسيحاتتاۋ» دەيدى ول.
مەرەيتويلىق كونتسەرتتە ەسترادالىق-سيمفونيالىق وركەستردىڭ سۇيەمەلدەۋىمەن «اينالايىندىقتار» جاندى داۋىستا ءان سالدى. ون مينۋتتىق دەرەكتى ءفيلمدى تاماشالاعان كورەرمەندەر ونەر ۇجىمىنىڭ تاريحىمەن, شىعارماشىلىعىمەن تانىستى. «گولوس. دەتي» رەسەيلىك تەلەجوباسىنىڭ جەڭىمپازى ەرجان ماكسيم كەشتىڭ ارنايى قوناعى بولدى. حوردىڭ 2001, 2015 جىلعى تۇلەكتەرى قۇتتىقتاپ كەلىپ, ءان سالىپ بەردى.
سونداي-اق, كونتسەرتكە ۇلىقپان جولداسوۆ, ايگۇل يمانباەۆا, قايرات باەكەنوۆ, نۇرعالي تۇرلىبەكوۆ سىندى تانىمال انشىلەر, «شاشۋ» بي توبى قاتىستى.
