ەلىمىزدە قۇقىقتىق زاڭنامالاردى جەتىلدىرۋ جانە قاراپايىم ازاماتتار مەن بيزنەس وكىلدەرىنىڭ مۇددەلەرىن قورعاۋ جولىندا ءبىرشاما جۇمىستار قولعا الىنىپ جاتىر. وسى ماقساتتا ادىلەت مينيسترلىگى ارنايى زاڭ جوبالارىن دايىنداپ, اشىق تالقىلاۋلار وتكىزىپ, ءتۇسىندىرۋ جۇمىستارىن جۇرگىزىپ كەلە جاتقانى بەلگىلى.
كەشە دە استانا قالاسى ادىلەت دەپارتامەنتى قابىرعاسىندا پروكۋراتۋرا, قالالىق سوت, ادۆوكاتتار القاسى, زاڭگەرلەر وداعى, ورتا جانە ءىرى بيزنەس سۋبەكتىلەرى وكىلدەرىنىڭ قاتىسۋىمەن تاعى ءبىر اشىق تالقىلاۋ ءوتىپ, مەنشىك قۇقىعىن قورعاۋ, داۋلى ماسەلەلەر مەن اكىمشىلىك رەتتەۋدى ارتتىرۋ سەكىلدى وزەكتى ماسەلەلەر تالقىلاندى.
جيىندا باسىمدىق بەرىلگەن ماسەلەنىڭ ءبىرى «اكىمشىلىك راسىمدەر تۋرالى» زاڭ جوباسى بولدى. مامانداردىڭ ايتۋىنشا, بۇل قۇجات بويىنشا ازاماتتار مەن ۇيىمدارعا اكىمشىلىك شەشىمدەردى قابىلداۋ پروتسەسىندە ۇلكەن وكىلەتتىك بەرەتىنىن, سونداي-اق ولاردىڭ وي-پىكىرى مىندەتتى تۇردە ەسكەرىلىپ, قاجەتتى راسىمدەر ءۇشىن ماتەريالدارمەن تانىسۋ مۇمكىندىگى بەرىلەتىن بولادى. ءتۇسىندىرۋ بارىسىندا اكىمشىلىك شەشىمدەردى سوتقا دەيىن جوعارى تۇرعان ورگانعا نەمەسە وزگە ۋاكىلەتتى ورگانعا شاعىم بەرۋدىڭ زاڭ جوبا بويىنشا مۇمكىندىكتەرى مەن ارتىقشىلىقتارى ۋاكىلەتتى ورگانعا, سونىمەن قوسا جالپى «اكىمشىلىك يۋستيتسيا» دەپ اتالاتىن ورگانعا سوتتىق شاعىم بەرۋ مۇمكىندىگى قاراستىرىلعانى ايتىلدى.
بۇدان باسقا, پارلامەنت قاراۋىندا جاتقان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتىق زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ ەرەجەلەرى, سونداي-اق ازىرلەنىپ جاتقان قازاقستان رەسپۋبليكاسىنىڭ «اكىمشىلىك قۇقىق بۇزۋشىلىق تۋرالى كودەكسىنە وزگەرىستەر ەنگىزۋ تۋرالى» زاڭ جوباسى تالقىلاندى. «بۇگىندە ادىلەت مينيسترلىگىنىڭ باستاماسىمەن «اكىمشىلىك قۇقىق بۇزۋشىلىق تۋرالى كودەكسىنە وزگەرىستەر ەنگىزۋ تۋرالى» زاڭ جوباسى ازىرلەنۋدە. بۇل وزگەرىستەردىڭ نەگىزگى باعىتتارى – اكىمشىلىك ايىپپۇلداردى ازايتۋ. بۇل – كوپتەن بەرى ايتىلىپ جۇرگەن ماسەلە. باس-اياعى 400-گە جۋىق اكىمشىلىك قۇرام بويىنشا ايىپپۇل كولەمى 20-30 پايىزعا ازايادى. تىپتەن 50 پايىزعا دەيىن ازايتۋ تۋرالى ۇسىنىستار بار» دەيدى ادىلەت مينيسترلىگى زاڭناما دەپارتامەنتى ديرەكتورىنىڭ ورىنباسارى دارحان يگەنباەۆ.
اكىمشىلىك قۇقىق بۇزۋشىلىق دەمەكشى, اتالمىش قۇجاتتا ايىپپۇلدى ءبىر اپتانىڭ ىشىندە 50 پايىز جەڭىلدىكپەن تولەۋ مۇمكىندىگىن ودان ءارى جەتىلدىرۋ قاراستىرىلىپ وتىر. بۇعان دەيىن مۇنداي جەڭىلدىك تەك جەكە تۇلعالارعا عانا قاتىستى بولىپ كەلگەن بولاتىن. «بۇگىندە بۇل ەرەجەنى زاڭدى تۇلعالارعا قولدانۋ ماسەلەسى قارالىپ جاتىر. قۇجات اياسىندا قاراستىرىلىپ جاتقان تاعى ءبىر ماسەلە ەسكەرتۋ جازاسىنا قاتىستى بولىپ وتىر. بىزدە ەرەجە بۇزعاننىڭ بارلىعىنا اكىمشىلىك ايىپپۇل سالىنادى. ياعني, ەسكەرتۋ جازاسى ينستيتۋتىن كەڭەيتۋ ماسەلەسى قاراستىرىلىپ جاتىر. بۇل تۇرعىدا دا 100-دەن استام قۇرام بويىنشا ناقتى-ناقتى ۇسىنىستار ازىرلەندى. ماسەلەن, جول ەرەجەسىن بۇزعان ادامعا ءدال سول ۋاقىتقا دەيىن ءبىر جىل ارالىعىندا جاۋاپقا تارتىلماعان بولسا نەمەسە بۇزۋشىلىق وقيعاسى قوعام ءۇشىن اسا قاۋىپتى ارەكەت دەپ تانىلماسا, پوليتسيا قىزمەتكەرى ايىپپۇل سالماي-اق ەسكەرتۋ بەرۋمەن شەكتەلسە دە بولادى» دەيدى ادىلەت مينيسترلىگى زاڭناما دەپارتامەنتى ديرەكتورىنىڭ ورىنباسارى.
سونىمەن قاتار, قولدانىستاعى «مەدياتسيا تۋرالى», «قۇقىقتىق اكتىلەرى», «تورەلىك تۋرالى» زاڭدارعا قاتىستى پىكىرلەر ورتاعا سالىنىپ, مەدياتسيا, پارتيسيپاتيۆتىك راسىمدەر, تورەلىك سياقتى قورعاۋدىڭ سوتتان تىس ءتۇرلەرىنىڭ ارتىقشىلىقتارى ايتىلدى.
بۇركىت نۇراسىل
