ايىپپۇلدى SMS ارقىلى تولەۋ ءتيىمدى
استانا قالاسىنىڭ پروكۋراتۋراسىندا وتكەن جيىندا اكىمشىلىك ايىپپۇلدى SMS ارقىلى تولەۋدىڭ تيىمدىلىگى ءسوز بولدى.
وتكەن ون ايدىڭ قورىتىندىسى بويىنشا جول ءجۇرۋ ەرەجەسىن بۇزعان 140 مىڭنان اسا ەلوردالىق جۇرگىزۋشىگە حابارلاما SMS ارقىلى جىبەرىلگەن. سونىڭ ناتيجەسىندە ءبىر اپتانىڭ ىشىندە ايىپپۇل قارىزدارىن تولەۋشىلەر سانى 50579-دان 91580 ادامعا دەيىن وسكەن. بۇل دەگەنىڭىز, بارلىق ايىپپۇل قارىزى بار ادامداردىڭ 75 پايىزى بولىپ تابىلادى. بۇعان ەگەر ەرەجە بۇزعان جۇرگىزۋشى كورسەتىلگەن ايىپپۇلدى جەتى كۇننىڭ ىشىندە تولەسە, وعان ەلۋ پايىز جەڭىلدىك جاسالاتىنى تۋرالى قولدانىستاعى زاڭعا ەنگىزىلگەن تۇزەتۋ دە سەبەپ بولىپ وتىر.
– بۇل حالىققا دا, پوليتسيا قىزمەتىنە دە ءتيىمدى. بۇرىن تولتىرىلعان ايىپپۇل حاتتاما حابارلامالارى ەرەجە بۇزۋشىعا پوشتا ارقىلى ءجىبەرىلىپ, مەكەنجايلارىنىڭ اۋىسىپ كەتۋىنە نەمەسە پوشتا قىزمەتىنىڭ ساپاسىزدىعىنا بايلانىستى ۋاقىتىندا جەتپەي جاتاتىن. ساراپتاما كورسەتىپ وتىرعانداي, وتكەن بەس جىلدا بارلىق سالىنعان ايىپپۇلدىڭ تەك 50 پايىزى عانا تولەنىپ كەلىپتى. مىنە, ايىپپۇل تولەۋدىڭ جاڭا ءتاسىلى ەلوردادا وسى جىلدىڭ ءساۋىر ايىنان باستاپ ەنگىزىلە باستاعالى بۇل باعىتتاعى جۇمىستار جاندانا تۇسۋدە, – دەدى قالالىق پروكۋراتۋرانىڭ جاۋاپتى قىزمەتكەرى دوسبول ەسىمسەيىت.
راس, باستاپقى كەزدە تولتىرىلعان ايىپپۇل حاتتاماسىنا, ول جەتى كۇن ىشىندە تولەنسە, ەلۋ پايىز جەڭىلدىك بولاتىنى تۋرالى كەلگەن SMS حابارلاماعا كۇدىكپەن قاراعاندار دا بولدى. وسىنداي كۇدىكتەردى سەيىلتۋ ماقساتىندا استانا قالاسىنىڭ پروكۋراتۋراسى پوليتسيا دەپارتامەنتىمەن بىرلەسە وتىرىپ, قولعا العان وڭ تاجىريبەنى باسقا دا مەملەكەتتىك ورگانداردى قاتىستىرىپ, جەتىلدىرە ءتۇستى. ەندى جول ءجۇرۋ ەرەجەسى بۇزىلعان جاعدايدا, تولەنەتىن ايىپپۇل تۋرالى بارلىق مالىمەتتەر اكىمشىلىك قۇقىق بۇزۋشىلىقتىڭ بىرىڭعاي رەەسترىنە تىركەلەدى. سول ارقىلى «ەلەكتروندى ۇكىمەت» پورتالىنىڭ بىرىڭعاي بايلانىس ورتالىعى قۇقىق بۇزۋشىعا تولەنبەگەن ايىپپۇل كولەمىن كورسەتىپ, SMS حابارلاما جىبەرەدى. ءسويتىپ, ۋاقىتىڭىزدى دا, اقشاڭىزدى دا ۇنەمدەۋگە مۇمكىندىك تۋىپ وتىر.