ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «جاڭا قازاقستانداعى ءتىل ءبىلىمى جانە ءسوزجاسام ماسەلەلەرى» اتتى حالىقارالىق عىلىمي-پراكتيكالىق كونفەرەنتسياcى ءوتتى. كونفەرەنتسيا ۇلتتىق عىلىم اكادەمياسىنىڭ اكادەميگى, فيلولوگيا عىلىمدارىنىڭ دوكتورى, پروفەسسور, نۇر-سۇلتان قالاسى قوعامدىق كەڭەسىنىڭ مۇشەسى كارىمبەك قۇرماناليەۆتىڭ 60 جىلدىق مەرەيتويىنا ارنالدى.
ۋنيۆەرسيتەت پرورەكتورى, اكادەميك ديحان قامزابەكۇلى مودەراتور بولدى. عىلىمي جيىندا سەنات جانە ءماجىلىس دەپۋتاتتارى, عىلىم جانە جوعارى ءبىلىم مينيسترلىگى وكىلدەرى, نۇر-سۇلتان قالاسى اكىمدىگى وكىلدەرى قۇتتىقتاۋ لەبىزىن بىلدىرسە, ۇلتتىق عىلىم اكادەمياسىنىڭ مۇشەلەرى مەن ءتىلشى-عالىم, پروفەسسورلار, شەتەلدىك عالىمدار قاتىسىپ, بايانداما جاسادى. جيىندا ەلىمىزگە بەلگىلى عالىمدار جانە باۋىرلاس كورشىلەس ەلدەردىڭ ءتىلشى عالىمدارى سەكتسيالارعا توپتاسىپ, ءتىل عىلىمىنىڭ قازىرگى جاعدايى مەن بولاشاق زەرتتەۋ باعىتتارى تۋرالى پىكىرلەرىن ورتاعا سالدى. سونداي-اق قازاق ءتىل ءبىلىمىنىڭ جەكە سالاسى – ءسوزجاسامنىڭ قالىپتاسۋ مەن دامۋ بارىسى ارنايى تالقىلاندى.
باسقوسۋدا اكادەميك ك.قۇرماناليەۆتىڭ «قازاق تىلىندەگى سوزجاسامدىق ۇيا: تەوريا جانە پراكتيكا» اتتى كىتابى تانىستىرىلدى. مونوگرافيادا تىلىمىزدەگى ءتۇرلى ءسوزجاسام تاسىلدەرى ارقىلى جاسالعان سوزدەردىڭ ءبارى تۋىندى سوزدەرگە جاتاتىندىعى ايتىلا كەلىپ, تۋىندى ءسوز تەرمينىنىڭ ءمانى اشىلعان. سونداي-اق ەڭبەكتە سوزجاسامدىق ۇياداعى تىزبەكتەردىڭ ءوربۋ جولدارى, تىزبەكتەردىڭ قۇرامى, ونىڭ قۇرامىنداعى مۇشەلەردىڭ قىزمەتى عىلىمي تۇردە تياناقتى سيپاتتالعان. وقۋ قۇرالىنىڭ نەگىزگى ماقساتى – تىلىمىزدەگى سوزدەردىڭ سوزجاسامدىق سىر-سيپاتىن, سوزدەردىڭ جاسالۋ جولدارىن قالىپتاستىرۋ.
– ستۋدەنت سوزجاسامدىق ۇيا ماسەلەسىنىڭ تەوريالىق مالىمەتتەرىن سوزجاسامدىق تالداۋدا ءوز بەتىمەن مىسالدار كەلتىرىپ, جۇيەلى تۇردە پراكتيكادا قولدانا ءبىلۋى ءتيىس. سونداي-اق ستۋدەنت ءسوزجاسامنىڭ كۇردەلى ماسەلەسى – سوزجاسامدىق ۇياعا قاتىستى عىلىمي باعىت, پراكتيكالىق داعدى الا وتىرىپ, ءوزىنىڭ بولاشاقتا زەرتتەۋشىلىك قابىلەتىن دە ۇشتاستىرا السا, قۇبا-قۇپ. سول ماقساتتا وقۋ قۇرالىندا سوزجاسامدىق ۇيانىڭ زاڭدىلىقتارى جايىندا تەوريالىق مالىمەتتەر بەرىلسە, ستۋدەنتتەردىڭ تەوريالىق ءبىلىمىن پراكتيكادا قولدانا ءبىلۋ داعدىلارىن جەتىلدىرۋ ماقساتىندا پراكتيكالىق بلوك تاپسىرمالارى كورسەتىلدى, – دەدى اكادەميك كارىمبەك قۇرماناليەۆ.
وقۋ قۇرالى جوعارى وقۋ ورىندارىنىڭ فيلولوگيا فاكۋلتەتتەرىنىڭ ستۋدەنتتەرىنە, ماگيسترانتتار مەن دوكتورانتتارعا ارنالعان.
عىلىمي ءىس-شارا اياسىندا «ءتىل عىلىمى زەرتتەۋلەرىن ۇيلەستىرۋ ورتالىعى» قوعامدىق ۇيىمى قۇرىلدى. ۇيىم توراعالىعىنا اكادەميك كارىمبەك قۇرماناليەۆ سايلاندى. ورىنباسارى رەتىندە پروفەسسورلار انار سالقىنباي, جاڭالىق بالتاباەۆا جانە قالبيكە ەسەنوۆا بەكىتىلدى. ۇيىمنىڭ نەگىزگى ماقساتى – لينگۆيستيكا مەن فيلولوگيا سالاسى بويىنشا ەلىمىزدەگى دوكتورلىق ديسسەرتاتسيالىق كەڭەستەرگە ۇسىنىلاتىن جۇمىستاردىڭ قايتالانباۋىن, سالا بويىنشا باسىم باعىتتاردى زەرتتەپ, ديسسەرتاتسيالىق تاقىرىپتار تاڭداۋدى ۇيلەستىرۋدى كوزدەيدى. بۇل جۇمىستار اكادەميك شورا سارىباەۆتىڭ كونتسەپتسياسىن نەگىزگە الا وتىرىپ جاسالادى.
جيىن سوڭىندا ۋنيۆەرسيتەت رەكتورى, ۇعا اكادەميگى ەرلان سىدىقوۆ مەرەيتوي يەسىنە ۇلتتىق عىلىم اكادەمياسىنىڭ «قۇرمەت گراموتاسى» مەن ۋنيۆەرسيتەتتىڭ «كۇلتەگىن» مەدالىن تاپسىردى.
