نۇر-سۇلتان قالاسىنىڭ اكىمى التاي كولگىنوۆ مەملەكەتتىك باسقارۋ اكادەمياسىنىڭ ماگيسترانتتارىمەن جانە دوكتورانتتارىمەن كەزدەستى. بۇل تۋرالى قالا اكىمى ءمالىم ەتتى.
«مەگاپوليستەردىڭ دامۋى قالادا جايلى ءومىر سۇرۋگە جانە ادامي كاپيتالعا تىكەلەي بايلانىستى. ادام – قالالاردى دامىتۋدىڭ باستى كۇشى. ەلوردامىزدا ءبىلىم الۋعا, كاسىبي تۇرعىدا وسۋگە, وتباسىن قۇرۋعا بارلىق جاعداي جاسالعان. «اشىق ميكروفون» رەجيمىندە مەملەكەتتىك باسقارۋ اكادەمياسىنىڭ ماگيسترانتتارىمەن جانە دوكتورانتتارىمەن كەزدەستىم. ولاردىڭ ارقايسىسىنىڭ مەملەكەتتىك قىزمەتتە جۇمىس تاجىريبەسى, مەملەكەتتىك باسقارۋ سالاسىن وزگەرتۋگە كوزقاراسى, ەڭ باستىسى, ەلدىڭ دامۋىنا ۇلەس قوسۋعا نيەتى بار. كەزدەسۋدە ەلوردانىڭ دامۋى, الەۋمەتتىك باعىتتار (الەۋمەتتىك تۇرعىن ءۇي, مەكتەپتەر, مەديتسينالىق ورتالىقتار, مادەنيەت, سپورت نىساندارى جانە تاعى باسقالارى) تۋرالى ايتىپ بەردىم» دەدى قالا باسشىسى.
سونداي-اق اكىم «نۇر-سۇلتان – جايلى قالا» باس جوسپارىنىڭ باعىتتارىنا بولەك توقتالدى. «ەلوردا ەڭ الدىمەن جاياۋ جۇرگىنشىلەرگە جاعداي جاساي وتىرىپ دامىپ كەلەدى. ول ءۇشىن سوڭعى ەكى جىلدا 400-دەن استام قوعامدىق كەڭىستىك پەن اۋلا اباتتاندىرىلدى» دەپ ءتۇسىندىردى ول.
التاي كولگىنوۆ كەزدەسۋدە ستۋدەنتتەردىڭ تايم-مەنەدجمەنت, قالا قۇرىلىسى, ەلوردانى دامىتۋدىڭ الداعى جوسپارى تۋرالى سۇراقتارىنا جاۋاپ بەردى. «مۇنداي كەزدەسۋلەر پىكىر الماسۋعا, حالىقپەن كەرى بايلانىس ورناتۋعا مۇمكىندىك بەرەدى. «اشىق ميكروفون» فورماتىنداعى كەزدەسۋلەردى ءارى قاراي دا وتكىزەمىز» دەدى قالا باسشىسى.
