شاھار باسشىسى باقىت سۇلتانوۆ اتاپ ايتقانداي, اكىمدىكتەر جۇمىسى اشىقتىققا نەگىزدەلگەن. قالانىڭ كەز كەلگەن تۇرعىنى ءوزىن تولعاندىرعان ماسەلەسىمەن اكىمدىكتەر كومەگىنە جۇگىنە الادى. قالا اكىمى بۇل جۇمىستى ودان ءارى دامىتۋ ماقساتىندا «اشىق ەسىك» اپتالىعىن ۇيىمداستىرۋدى تاپسىردى.
– بارلىق ازاماتتار وزدەرىن تولعاندىرعان ماسەلەلەر بويىنشا وتىنىشتەرىن جەتكىزۋ ءۇشىن اۋدان اكىمدەرى ۋاكىلەتتى ورگاندارمەن بىرلەسىپ, «اشىق ەسىك» اپتالىعىن وتكىزسىن. بىردە-ءبىر ماسەلە اكىمدىك نازارىنان تىس قالماسىن. اسىرەسە, كوپبالالى وتباسىلارعا كومەك كورسەتۋ كەرەك, – دەدى شاھار باسشىسى.
وتكەن اپتادا ەلوردانىڭ ءتورت اۋدانىنىڭ اكىمدەرى جەرگىلىكتى بيلىكتىڭ قولداۋىن قاجەت ەتەتىن كوپبالالى وتباسىلارمەن كەزدەسۋ وتكىزگەن. اتقارىلعان جۇمىس تۋرالى ولار قالا باسشىسىنا ەسەپ بەردى.
الماتى اۋدانىندا قازىرگى تاڭدا تۇراتىن 4543 كوپبالالى انانىڭ 49-ى اتاۋلى الەۋمەتتىك كومەك الادى. اۋدان اكىمىنىڭ اپپاراتىنا 8-11 اقپان ارالىعىندا مەملەكەتتىك ورگاندار قابىلداۋىنا 73 ادام كەلدى. ونىڭ 38-ءى – كوپبالالى وتباسىلاردىڭ مۇشەلەرى. جاقىن ارادا اكىمدىك
قىزمەتكەرلەرى تاعى 28 كوپبالالى وتباسىنا بارادى.
اكىمدىككە كەلگەندەردىڭ 85 پايىزدان استامى باسپانا ماسەلەسىن قوزعادى. «بارلىق ماسەلە بويىنشا تۇسىنىكتەمەلەر مەن ۇسىنىستار بەرىلدى. كومەككە مۇقتاج ازاماتتار ەسەپكە الىندى» دەدى اۋدان اكىمى ادىلبەك سارسەمباەۆ.
بايقوڭىر اۋدانىنداعى كوپبالالى وتباسىلاردىڭ ءبىر اپتا ىشىندە انىقتالعان ماسەلەلەرى بويىنشا تومەندەگىدەي كومەك كورسەتىلدى: 16 وتباسىعا ازىق-تۇلىك بەرىلدى; 8 وتباسى كومىرمەن قامتاماسىز ەتىلىپ, ءار وتباسىعا 2 تەكشە مەتر اعاش ءتۇسىرىلدى. سونىمەن قاتار, كوپبالالى وتباسىلاردان شىققان 22 بالاعا دەمەۋشىلەردىڭ كومەگىمەن كيىم اپەرىلدى.
«جەكە ۇيلەردە تۇراتىن ەكى وتباسى ءورت قاۋپىن حابارلاۋ دابىلىن ورناتۋعا نيەت ءبىلدىردى. جاستار جىلى اياسىندا 7 بالا اقىسىز نەگىزدە جەكە بالاباقشالاردا وقيتىن بولادى. جالپى العاندا, 24 وتباسىنا كومەك بەرىلەدى» دەدى اۋدان اكىمى ەرلان قاناليموۆ.
ەسىل اۋدانىنىڭ اكىمى تولەگەن زاكاريانوۆتىڭ ايتۋىنشا, اپپارات قىزمەتكەرلەرى كومەكتى قاجەت ەتەتىن 25 ادامنىڭ ءتىزىمىن جاسادى. «نەگىزىنەن, تۇرعىنداردى باسپاناعا يە بولۋ, الەۋمەتتىك كومىر الۋ, جاردەماقى مولشەرىن ارتتىرۋ, مەكتەپتەردە تەگىن تاماقتانۋ, قوعامدىق كولىكتە بالالارعا جەڭىلدىكپەن جول ءجۇرۋ بيلەتتەرىن بەرۋ, تۇرعىن ءۇيدى الۋ كەزىندە تىركەۋ جانە دەمەۋشىلىك كومەك كورسەتۋ ماسەلەلەرى الاڭداتتى. ازاماتتارعا وزدەرىن تولعاندىرعان ماسەلەلەر بويىنشا زاڭناما ءتۇسىندىرىلدى» دەدى ت.زاكاريانوۆ.
سارىارقا اۋدانىندا كوپبالالى وتباسىلاردى قابىلداۋ 8 اقپاندا باستالدى. ولاردىڭ بارلىعى تەلەفون قوڭىراۋى ارقىلى قابىلداۋعا شاقىرىلدى. قابىلداۋعا 127 ادام, سونىڭ ىشىندە 74 اتا-انا كەلدى. 12 ادام كەزدەسۋدەن باس تارتتى. تىزىمنەن تىس قابىلداۋعا 53 ادام كەلدى. بارلىق سۇراق بويىنشا قاجەتتى اقپارات بەرىلىپ, ماسەلەلەردى شەشۋ جولدارى كورسەتىلدى.
«قابىلداۋ بارىسىندا 286 ءوتىنىش كەلىپ ءتۇستى. ولاردىڭ باسىم بولىگى تۇرعىن ءۇي بەرۋگە قاتىستى بولدى. وسى 2-3 كۇن ىشىندە 14 وتباسىعا تەگىن كومىر جەتكىزىلسە, 30 وتباسى ازىق-تۇلىكپەن قامتاماسىز ەتىلدى. بارلىعىنا كومەك كورسەتەمىز» دەدى اۋدان اكىمى ارمان تۇرلىبەك.
اۋدان اكىمدەرىنىڭ باياندامالارىن تىڭداعان باقىت سۇلتانوۆ ولاردىڭ كوپبالالى وتباسىلارعا كومەك كورسەتۋ جۇمىسىنا وڭ باعا بەرىپ, بۇل ماسەلەنى ءتيىمدى شەشۋ كەرەكتىگىن اتاپ ءوتتى.
