«ءال-باراكات» ءىسى: 78 سوت وتىرىسىنىڭ قورىتىندىسى قانداي؟
ەستەرىڭىزدە بولسا, وسىدان ءتورت جىل بۇرىن «ءال باراكات» كومپانياسى قالا ىرگەسىندەگى قوسشى كەنتىنەن «جايلاۋ» تۇرعىن ءۇي كەشەنىن ارزان باعاعا تۇرعىزامىز دەپ, 200 ۇلەسكەردەن اقشا جيناعان بولاتىن. جالپى سوماسى 1 ملرد تەڭگەدەن استام قارجىنى قولدى قىلعان كومپانيا باسشىسى سوڭىندا الاياق دەپ تانىلىپ, 8 جىلعا سوتتالىپ كەتتى.
ال بار قاراجاتىن قۇيعان حالىق اقشاسىن قايتارا الدى ما؟ الدانعان ۇلەسكەرلەر بۇل تىعىرىقتان قالاي شىقتى؟
«ارزاننىڭ سورپاسى تاتىماس». حالىقتىڭ ەڭ وسال جەرىن ءدوپ باسقان كومپانيا سول جىلدارى جان-جاققا حابارلاندىرۋ تاراتتى. وندا پاتەر قۇنىنىڭ 25-30 پايىزىن قولما-قول تولەسەڭىز بولعانى, قالعان سومانى باسپاناعا كىرىپ العاننان كەيىنگى بەس جىل ىشىندە جابۋ قاجەتتىگى ايتىلعان ەدى. ءۇيسىز جۇرگەندەرگە ەڭ قولايلى باعا وسى بولدى. سوندىقتان قارجى قۇيعانداردىڭ قاتارىندا مەملەكەتتىك قىزمەتكەرلەر دە, قالام ۇستاعان جۋرناليستەر دە, قاراپايىم جۇمىسشىلار دا بولدى.
قۇر سوزبەن جۇرگىزىلگەن قۇرىلىس
ەگەر استانا قالاسىنىڭ اكىمدىگى الاياق كومپانيالاردىڭ ءتىزىمىن جاريالاماعاندا, «ءال-باراكات» ءوز كەڭسەسىندە اقشا جيناۋدى جالعاستىرا بەرەر مە ەدى؟!
انىعىندا قۇرىلىس تەك سوزبەن عانا جۇرگىزىلىپ جاتقانى ۇلەسكەرلەرگە دە بەلگىلى بولدى. سوندىقتان 2014 جىلدىڭ كۇزىندە قۇرىلىس سالۋشىعا قاتىستى قىلمىستىق ءىس قوزعالدى. تەرگەۋ جۇرگىزىلگەن ۋاقىت ىشىندە تۇرعىن ءۇي كەشەنى سالىنۋى ءتيىس جەر ۋچاسكەسى تۇسىنىكسىز تۇردە ساتىلىپ, يەسى باسقا ادام بولىپ شىعا كەلدى. الدانعان ۇلەسكەرلەر ءوز قۇقىقتارىن دالەلدەۋ ءۇشىن سوت كابينەتتەرىن قايتادان جاعالاۋعا تۋرا كەلدى. قولدى بولعان اقشالارىن قايتارىپ الۋ ءۇشىن ولار ەكونوميكالىق سوتقا جۇگىندى. ەكى جىل ىشىندە 78 سوت وتىرىسى وتكىزىلدى.
ناتيجەسىندە 2016 جىلى ۇلەسكەرلەردەن قۇرالعان كووپەراتيۆ جەر ۋچاسكەسىن يەلەنۋگە قۇقىق الدى.
قۇيعان قارجى قايتپادى
قۇرىلىسقا سالىنعان قاراجات تۋرالى قىسقاشا ايتساق, وكىنىشكە قاراي, ەشكىمنىڭ اقشاسى قايتارىلمادى. ويتكەنى تەرگەۋ كەزىندە قۇرىلىس سالۋشىنىڭ شوتتارىندا ءبىر تيىن دا قالماعان. وسىلايشا, جەكە باسپانالارى جوق, جالدامالى پاتەردە تۇراتىندار قيىن جاعدايدى باستان كەشتى. جالپى, الاياق كومپانيا مىڭداعان ادامدى الداعان بولىپ شىقتى. كەيىن انىقتالعانداي, ۇلەسكەرلەر كومپانيامەن ورتاق قۇرىلىس تۋرالى كەلىسىمگە كەلمەگەن. ينۆەستيتسيالىق كەلىسىمشارتتى ازىرلەۋشى كومپانيا «ينۆەستور» دەگەن ءساندى تەرميندى ءتيىمدى پايدالانعانى انىقتالعان. سەنگەن حالىق ءوز ەرىكتەرىمەن جوباعا قاراجات قۇيدى. ءبىر قىزىعى, وبەكتىلەردە ەشقانداي قۇرىلىس باستالماعانى جونىندە دابىل قاعا باستاعاندا كومپانيا باسشىسى ۇلەسكەرلەرمەن كەزدەسۋلەر وتكىزىپ, قۇرىلىستىڭ سوزىلۋىن شەنەۋنىكتەر مەن ونداعى وزگە دە ماسەلەلەرمەن بايلانىستىرىپ, تۇسىندىرۋمەن بولعان.
جەرگىلىكتى بيلىكتىڭ جاردەمى
ۇلەسكەرلەر ماسەلەسىنە استانا قالاسىنىڭ اكىمدىگى بەيجاي قارامادى. قۇرىلىستىڭ زاڭسىز, قۇجاتتاردىڭ جالعان ەكەندىگى تۋرالى مالىمەت بىردەن حابارلاندى. جەرگىلىكتى اتقارۋشى ورگاندار ماسەلەنى شەشۋگە بارىنشا قولداۋ كورسەتتى. باستاپقىدا استانا قالاسى اكىمدىگى جانىنداعى ۆەدومستۆوارالىق كوميسسياعا جۇگىنگەن ۇلەسكەرلەرگە ءماسەلەنى شەشۋدىڭ بارلىق جولدارى ەگجەي-تەگجەيلى ءتۇسىندىرىلدى. قۇرىلىس نىسانى استاناعا وتە جاقىن بولعانىمەن, تەرريتوريالىق اۋماعى اقمولا وبلىسىنا قارايتىن بولعان سوڭ ارمەن قاراي وبلىستىق اكىمدىك اينالىستى. اقمول اۋىلدىق اكىمدىگىنىڭ قىزمەتكەرلەرى دە بۇل پروتسەستى ءبىر ساتكە دە كەشىكتىرمەي شەشۋگە كومەكتەستى.
تىعىرىقتان شىعاتىن جول
سونىمەن اياقسىز قالعان تۇرعىن ءۇي قۇرىلىسىن جالعاستىرۋ ءۇشىن 200-دەن استام ۇلەسكەر كووپەراتيۆكە بىرىكتى. ياعني «جايلاۋ city» تۇرعىن ءۇي كووپەراتيۆىن قۇردى. ەندى الداعى 45 كۇننىڭ ىشىندە كوپتەن كۇتكەن تۇرعىن ءۇي كەشەنىنىڭ قۇرىلىسى باستالادى. ولاردىڭ ەڭ ۇلكەن جەڭىسى – جەر ۋچاسكەسىن يەلەنۋگە قۇقىق الۋى. قازىر جاڭادان «سيرەنەۆىي ساد» تۇرعىن ءۇي كەشەنىنىڭ قۇرىلىسى جوسپارلانىپ وتىر.
«جايلاۋ city» تۇرعىن ءۇي-قۇرىلىس كووپەراتيۆىنىڭ باسشىسى گۇلنار مەرمۇقانوۆانىڭ ايتۋىنشا, بۇگىندە تۇرعىن ءۇي كەشەندەرىنىڭ اتاۋى تولىعىمەن وزگەرگەن.
نىساننىڭ قۇرىلىسىنا ەشكىم اقشا تاپپاعاندىقتان, باعاسى دا وزىندىك قۇنى بويىنشا ساتىلماق. توعىز قاباتتى ءتورت ۇيدەن تۇراتىن تۇرعىن ءۇي كەشەنىندە بارلىعى 647 پاتەر بار. كووپەراتيۆكە قوسىلعىسى كەلگەن ادام پاتەر قۇنىنىڭ وتىز پايىزىن تولەيدى, قالعان سومانى ءۇش جىلعا دەيىن ءبولىپ تولەۋگە بولادى ەكەن.
P.S.: استانادا ۇلەسكەرلەر ماسەلەسى ءالى كۇنگە دەيىن وزەكتى. «العا, توقبولات», «ورال ديزاين ستروي», «تامىز ينۆەست گرۋپپ» سەكىلدى كومپانيالاردىڭ باسشىلارى ميللياردتاعان قارجىنى جىمقىرىپ, وزدەرى سوتتالىپ تىندى. ەلىمىزدە 2006 جىلى قابىلدانعان ۇلەستىك قاتىسۋ تۋرالى زاڭ پاتەر ساتىپ الۋشىلاردى مۇنداي الاياقتاردان قورعاي المادى. دەگەنمەن, 2016 جىلى 10 قازاندا كۇشىنە ەنگەن «تۇرعىن ءۇي قۇرىلىسىنا ۇلەستىك قاتىسۋ تۋرالى» جاڭا زاڭى جوعارىدا ايتىلعان قاتەلىكتەردىڭ قايتالانۋىنا ەندى جول بەرمەيدى.