ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى جانىنداعى «كاۋسار» مادەني-تانىمدىق بiرلەستiگiنiڭ (جەتەكشىسى – قازاقستاننىڭ ەڭبەك سىڭىرگەن ءارتىسى, اباي اتىنداعى مەملەكەتتىك سىيلىقتىڭ لاۋرەاتى, پروفەسسور كەنجەعالي مىرجىقباي) جاڭا وقۋ جىلىنداعى العاشقى قوناعى قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى, پروفەسسور قايرات بايبوسىنوۆ بولدى. «ايبوزىم» اتاۋىن العان سازدى سۇحبات بارىسىندا ۇلتتىق ونەرگە قاتىستى قازىرگى قوعامداعى وزەكتى ماسەلەلەر ايتىلىپ, اسەم اندەر اۋەلەدى.
بالالىق شاقتان ونەرگە قۇشتار بولىپ, «بالا ءبىرجان» اتانعان قايرات بايبوسىنوۆ كوزگە ەرتە ءتۇستى. سول كەزدەرى اكادەميك شاپىق شوكيندى, اتاقتى كۇيشى-كومپوزيتور, ديريجەر نۇرعيسا تىلەنديەۆتى ءتانتى ەتىپ, جۇسىپبەك ەلەبەكوۆتەن ءدارىس الدى. وسىدان قىرىق جىلعا جۋىق ۋاقىت بۇرىن ءوزى دە ۇستازدىق جولعا ءتۇسىپ, قازىرگە دەيىن قانشاما بۋىن شاكىرت تاربيەلەدى. 2009 جىلدان بەرى قازاق ۇلتتىق ونەر ۋنيۆەرسيتەتىندە ساباق بەرىپ كەلە جاتىر. وسى كەزدەسۋگە دە بۇگىنگى شاكىرتتەرىن ەرتە كەلىپ, توماعاسىن سىپىرعانداي بولدى.
الدىمەن ەرمەك نۇرپەيىسوۆ, كامال مايدانوۆ, اقنيەت سەرعازينا, بەك مىڭباي, كاميلا سايادىلقىزى, ەرقۇلانبەك ەرقانات سىندى شاكىرتتەرى اۋەلەتىپ ءان سالدى. شىرقاعان اندەرى دە كەز كەلگەن ءانشىنىڭ ىڭعايىنا كەلە بەرمەيتىن حالىق كومپوزيتورلارىنىڭ تۋىندىلارى. اتاپ ايتقاندا, ءبىرجان سالدىڭ «اقسەركەشى», اقان سەرىنىڭ «قۇلاگەرى», ماناربەك ەرجانوۆتىڭ «سايرا, بۇلبۇلى», ۇكىلى ىبىرايدىڭ «تولقىنى», يسا بايزاقوۆتىڭ «جەلدىرمەسى», زىلقارانىڭ «جيىرما بەسى». كورەرمەندەردىڭ سۇراۋىمەن قايرات بايبوسىنوۆتىڭ ءوزى دە ۇكىلى ىبىرايدىڭ «قالدىرعانىنا» سالدى.
سۇراق-جاۋاپ كەزەگى كەلگەندە, بىرقاتار ءداستۇرلى ءانشىنىڭ ەستراداعا بەت بۇرىپ, حالىق اندەرىن ناسيحاتتاماي كەتكەنى تۋرالى ساۋالعا قايرات اۋكەنۇلى «بۇل زاماننىڭ اعىمى شىعار. ءبىر جاعىنان قازىرگى ەسترادا انشىلەرىنىڭ كوبى حالىق اندەرىن دۇرىس ايتپايدى, ءسوزىن بۇرمالايدى. ءداستۇرلى انشىلەر سولارعا باعىت-باعدار بەرگىسى كەلەتىن شىعار» دەپ جاۋاپ بەردى.
كەزدەسۋ بارىسىندا حالىق اندەرى مەن حالىق كومپوزيتورلارىنىڭ مۇراسىن راديو مەن تەلەارنالاردا ناسيحاتتاۋ كەمشىن بولىپ جاتقانى, ءداستۇرلى انشىلەردى قولداۋ جوقتىڭ قاسى ەكەنى ايتىلدى. فيلولوگيا عىلىمدارىنىڭ دوكتورى, پروفەسسور سەرىك نەگيموۆ «قايرات بايبوسىنوۆتىڭ اندەرى – قازاقتىڭ كوركەمدىك ەنتسيكلوپەدياسى» دەي كەلە, ەستەلىكتەردى جاڭعىرتتى. قايرات اۋكەنۇلى 18 جاسىندا «قىز جىبەك» فيلمىندە تولەگەننىڭ اندەرىن سالعانى كوپشىلىككە بەلگىلى. سول ۋاقىتتا اتاقتى اكتەر ەلۋباي ومىرزاقوۆتىڭ 70 جاس مەرەيتويىنا ارنالعان سالتاناتقا قاتىسىپ, «ارداق» جانە «اقجايىق» اندەرىن شىرقادى. شۆەتسياعا بارعان ساپارىندا كونتسەرتىن كورگەن قانداستارىمىزدى ارۋاقتاندىردى. سەرىك نىعمەتوللاۇلى وسىنداي جانە باسقا دا قىزىقتى دەرەكتەردى ايتتى. قايرات بايبوسىنوۆپەن ەسترادا-تسيرك ستۋدياسىندا قاتار وقىپ, «گۇلدەر» انسامبلىندە بىرگە قىزمەت ىستەگەن بەلگىلى ءانشى-ۇستاز قاپاش قۇلىشەۆا, ءانشى, جىرشى-تەرمەشى ايگۇل ەلشىباەۆا ىزگى تىلەگىن جەتكىزدى. اتالمىش وقۋ ورنىنىڭ «تەلەراديو جانە قوعاممەن بايلانىس» كافەدراسىنىڭ مەڭگەرۋشىسى, اقىن سەرىكزات دۇيسەنعازى قايرات بايبوسىنوۆ پەن ءجۇرسىن ەرمان ەكەۋىنە قازاقستاننىڭ ەڭبەك ەرى اتاعىن بەرۋ كەرەكتىگى جونىندە پىكىرىن ايتىپ, ارناۋىن وقىدى. كەزدەسۋدى قورىتىندىلاعان ۋنيۆەرسيتەت رەكتورى ەرلان سىدىقوۆ جىلى لەبىزىن ايتىپ, ءانشىنىڭ كەۋدەسىنە «كۇلتەگىن» مەدالىن تاقتى.
