الەم ساحناسىن باعىندىرعان قانداستارىمىز استانانىڭ دۋماندى تويىندا «تۋعان ەل توسىندەگى كونتسەرتىن» بەرمەك. الەمنىڭ ءتۇرلى ەلدەرىندەگى كلاسسيكالىق مۋزىكا ونەرىنىڭ مايتالماندارى اتاجۇرتتارىنا دەگەن ساعىنىشتارىن وسىلاي پاش ەتەدى. جەر بەتىندەگى ۇزدىك ساحنالاردا ونەر كورسەتكەن اتالمىش ارتىستەردى بىرىكتىرەتىن ورتاق وتان – قازاقستان.
الەم ەلدەرىن دارىنىمەن تامساندىرعان ورەندەرىمىز – قايىرجان جولدىباەۆ – تەنور ءانشى (گەرمانيا), سارا نايمان – سوپرانو ءانشى (اۆستريا), ءامىر تەبەنيحين – پيانيست (گەرمانيا), ەرجان كۋليباەۆ – سكريپكاشى (يسپانيا).
كەشتى ۇيىمداستىرۋشىلار قازىرگى كەزدە شەت ەلدە جۇمىس ىستەيتىن وسى وتانداس جاس مۋزىكانتتاردىڭ باسىن قوسىپ, ولاردىڭ شىعارماشىلىعىن استانا حالقىنا كورسەتپەك. «تۋعان ەل توسىندەگى كونتسەرت» يەلەرى تۋعان ەل مادەنيەتىنە دەگەن قۇرمەتتەرىن ءبىلدىرىپ, كلاسسيكالىق مۋزىكالىق ونەردىڭ بارلىق جانرىن دارىپتەيدى. وندا كلاسسيكالىق مۋزىكانىڭ الەمدىك جاۋھارلارى جاڭاشا سيپاتتا ورىندالادى ءارى كورەرمەندەر سيرەك تۋىندىلارمەن قۇلاق قۇرىشىن قاندىرا الادى» دەيدى ۇيىمداستىرۋشىلار.
كونتسەرت باعدارلاماسىنا ف.ليستتىڭ «ۆەنگەرسكايا راپسوديا», سۋ چونگتىڭ قىتاي حانزاداسىنىڭ ارياسى, دج.ۆەرديدىڭ «سيتسيليسكايا ۆەچەرنيا» وپەراسىنان ەلەنا بولەروسى جانە الەمنىڭ تانىمال تۋىندىلارى مەن وتاندىق اۆتورلاردىڭ شىعارمالارى ەنگىزىلگەن. مۋزىكانتتاردى ديريجەر ابزال مۇحيتدينوۆتىڭ جەتەكشىلىگىمەن «استانا وپەرا» سيمفونيالىق وركەسترى سۇيەمەلدەيدى.
كەز كەلگەن ءانشى ءۇشىن گاسترولدىك ساپار – تاجىريبە جيناقتاۋعا, شىعارماشىلىق ەرەكشەلىگىن باعالاۋعا مۇمكىندىك بەرەتىن جۇمىسىنىڭ ەڭ باستى بولىگى. ال وتانداستارىمەن جۇزدەسۋ – ارقاشان جۇرەكتە تولقىنىس تۋدىراتىن ەرەكشە ءسات. سەبەبى, جەرلەستەرى انشىلەردى بالا كەزىنەن بىلەدى. سوندىقتان, كەشكە قاتىساتىن تانىمال جۇلدىزدار بۇرىنعىدان دا تانىس ءارى جاقىن بولا تۇسپەك.
سالتاناتتى كەش 6 شىلدە كۇنى ساعات 20.00-دە «استانا وپەرا» تەاترىندا وتەدى.
